„ქართული ორნამენტი“ აქსესუარების მწარმოებელი ბრენდია, რომელიც ეთნოგრაფიულ ორნამენტებზე დაფუძნებულ პროდუქტებს ქმნის. კომპანიაში არსებულ სიახლეებსა და სამომავლო გეგმებზე Business Insider Georgia „ქართული ორნამენტის“ წარმომადგენელს ინა სოხაძეს ესაუბრა.

“სულ ახლახანს დავამატეთ მამაკაცის ხაზი - ყელსახვევები და პიჯაკის ცხვირსახოცები. თითოეული მათგანი დამზადებულია ჩვენი ბრენდის პრინტით და წარმოდგენილია ოთხ განსხვავებულ ფერში.

გარდა ამისა, ქართულ თემატიკაზე გვაქვს ახალი ტიპის დიზაინები, რომლებიც სიუჟეტურად და თემატიკურად კვლავ ერგება ორნამენტის ძირითად ხაზს, თუმცა განსხვავებულია ფერებითა და პრინტებით. ასევე დავიწყეთ ახალი პროექტი - „მოგზაურობა შარფით“, რომლის ფარგლებშიც ვახორციელებთ კოლაბორაციებს სხვადასხვა ქვეყნებთან და მუზეუმებთან. უკვე შევქმენით ახალი ბერძნული სტილის პრინტები აკროპოლისის მუზეუმთან თანამშრომლობით, მათ შორის სამი განსხვავებული დიზაინი.

ასევე გვაქვს ეგვიპტური პრინტი, რომელიც ჩვენს ხელოვნებათმცოდნეებთან ერთად შეიქმნა დამოუკიდებლად, პარტნიორობის გარეშე. ეტაპობრივად დაემატება სხვა ქვეყნების კულტურებზე შექმნილი დიზაინებიც, მათ შორის ინდური მანდალა, პორტუგალიური აზულეჟუ, იტალიური სტილის ორნამენტი და სხვა. ჩვენი მიზანია, რომ თანდათანობით მოვიცვათ სხვადასხვა ქვეყნების ძირითადი კულტურული მახასიათებლები ორნამენტების სახით. ჩვენი ბრენდი არ არის ორიენტირებული მხოლოდ ბიზნეს მოდელზე, ჩვენ ვართ სოციალური საწარმოს ტიპის ინიციატივა, რომლისთვისაც უმნიშვნელოვანესია კულტურის პოპულარიზაცია. ჩვენი დევიზია: მეტი ხელოვნება ყოველდღიურ ცხოვრებაში და შესაბამისად გვინდა რომ თანდათანობით მოვიცვათ სხვადასხვა ქვეყნები “, - ამბობს ინა სოხაძე.

ბრენდის პროდუქციაზე მოთხოვნა და ინეტესი სტაბილურად მაღალია, როგორც ადგილობრივების, ისე უცხოელების მხრიდან.

„ქართული ხაზი საკმაოდ დიდი მოთხოვნით სარგებლობს, როგორც უცხოელი მომხმარებლების, ასევე ადგილობრივი მყიდველების მხრიდან. ჩვენი მომხმარებლები ძირითადად სამ კატეგორიად იყოფა:

1. უცხოელი ტურისტები ან უცხოელები, რომლებიც საქართველოში ცხოვრობენ ან აქ ყოფნის შემდეგ ბრუნდებიან საკუთარ ქვეყნებში და სურთ, თან წაიღონ ქართული საჩუქარი;
2. ქართველები, რომლებიც საზღვარგარეთ მიემგზავრებიან და სურთ, იქ წაიღონ ქართული ნივთები საჩუქრად;
3. ადგილობრივი მომხმარებელი, რომელიც ან საკუთარ თავისთვის ყიდულობს პროდუქციას, ან საქართველოში დარჩენილი ადამიანისთვის “, - აღნიშნავს კომპანიის წარმომადგენელი.

კომპანია ამჟამად საიტის გაუმჯობესებაზე მუშაობს, რომელიც უახლოეს პერიოდში მზად იქნება.

„ამ ეტაპზე ვმუშაობთ ვებგვერდის გაუმჯობესებაზე. ის უკვე ხელმისაწვდომია ყველა მომხმარებლისთვის და შეიძლება დათვალიერება, თუმცა ამჟამად ჯერ კიდევ სატესტო რეჟიმშია. მიმდინარეობს პროდუქციის დამატება. სავარაუდოდ, თვის ბოლომდე ყველაფერი დასრულდება და სრულად ფუნქციონალური გახდება.
ჩვენი მთავარი ფოკუსია საერთაშორისო გაყიდვები, რადგან უკვე დავიწყეთ სხვადასხვა ქვეყნების კულტურისა და ორნამენტების თემატური წარმოჩენა. სწორედ ამ მიმართულებით გვსურს გააქტიურება. პირველ ეტაპზე ევროპაზე ვართ ორიენტირებულნი და მას შემდეგ, რაც ევროპის ბაზარს მოვიცავთ, ვგეგმავთ განვითარებას ამერიკის მიმართულებით “, - აცხადებს ინა სოხაძე.

ცნობისთვის, პროდუქცია ადგილობრივი ნედლეულით იქმნება. „ქართული ორნამენტი“ 100%-ით ქართულია.