ღვინის კომპანია „ბოსტოღანამ“, რომლის ისტორიაც 2021 წლიდან იწყება ექსპორტი იტალიაში განახორციელა. ამის შესახებ, Business Insider Georgia -ს კომპანიის მარკეტინგის მენეჯერმა ნინი ბაშარულმა განუცხადა.

როგორია კომპანიის მიმდინარე სიახლეები?

„ბოსტოღანა“ ბოლო 6 თვეა აქტიურად მუშაობდა ექსპორტის მიმართულებით. მოლაპარაკებები გვქონდა სხვადასხვა მიმართულებით. საბოლოოდ მოვახერხეთ და „ბოსტოღანას“, უღალატო ქიზიყური ღვინის გასინჯვა ღვინის მოყვარულებს უკვე იტალიაში, კერძოდ რომში შეუძლიათ. ეს კომპანიისთვის განსაკუთრებული მომენტია, ვინაიდან ეს იყო ჩვენი პირველი ექსპორტი ევროპაში.

ამავდროულად, მოუთმენლად ველოდებით ჩვენთვის განსაკუთრებულ ცერემონიას. „ბოსტოღანა“ შეირჩა IWSC-ის 2025 წლის 50 საუკეთესო მეღვინეობებს შორის. ცერემონია ლონდონში 12 ნოემბერს გაიმართება. ამ აღიარებას იღებენ ის მეღვინეები, რომლებიც მუდმივად აწარმოებენ უმაღლესი ხარისხის ღვინოს.

ეს აღიარება მნიშვნელოვანია „ბოსტოღანასთვის“, ჩვენს თითოეულ ნაბიჯში იგრძნობა ის პრინციპები და დამოკიდებულებები, რომელიც ჩვენი საქმის და ქართული მეღვინეობის მიმართ გვაქვს. ამიტომაც არის „ბოსტოღანა“ უღალატო, არასდროს არ დააღალატებს ადამიანებს და იქნება მათი ცხოვრების თანმდევი გულისა და სულის საამებლად.

როგორ აფასებთ მოთხოვნას და ინტერესს?

მიუხედავად იმისა, რომ ბოლო წლებში საქართელოში იმატა ღვინის წარმოებამ, მაინც არის ხარისხთან დაკავშირებული პრობლემები. ამიტომაც ხარისხიან ღვინოზე მოთხოვნა სულ არის და შესაბამისად ინტერესიც. თუკი გადავხედავთ ღვინის ფესტივალებზე ადამიანების ჩართულობას ვნახავთ რომ ყოველ წელს ინტერესი იზრდება. მაგრამ მხოლოდ ინტერესი არ კმარა ამ ეტაპზე მეღვინეები ისევ ვდგავართ გამოწვევის წინაშე, რაც არის ღვინის სწორად მოხმარების კულტურა. ვფიქრობ, რომ ადამიანებთან მუდმივი კომუნიკაცია აუცილებლად გამოიღებს შედეგს დროთა განმავლობაში.

როგორია "ბოსტოღანას" სამომავლო გეგმები საექსპორტო ბაზრებისა და
ასორტიმენტის ზრდის თვალსაზრისით?

სამომავლოდ, „ბოსტოღანა“ ფიქრობს ექსპორტის გაფართოებას, რა თქმა უნდა მხოლოდ იტალიაზე არ გავჩერდებით, ამაზე ყოველდღიურად ძალიან ბევრს ვფიქრობთ და ვმუშაობთ. გვინდა რომ ბევრ ადამიანს მოვუყვეთ ქვეყნის გარეთ ქართულ მეღვინეობაზე და კერძოდ, ქიზიყზე და ჩვენს უღალატო მეომარზე, რომელიც უცხოელი მომხმარებლების ძალიან დიდ მოწონებას იმსახურებს. ყველას აინტერესებს ამბები მეომარზე და განსაკუთრებული დიზაინი, რომელიც „ბოსტოღანას“ გამოარჩევს სხვა მეღვინეობებისგან.

ამ ეტაპზე „ბოსტოღანა“ მიყვება ტრადიციულ კახურ მეღვინეობას, ტიბაანის მიკროზონაში ჩვენი პირადი ვენახებიდან ვაწარმოებთ: საფერავს, ქისს, მწვანე კახურსა და რქაწითელს. გეგმაშია როზე, რომელსაც სამომავლოდ ვპირდებით ღვინის მოყვარულებს. და რადგან ვამბობთ გავაკეთებთ ჩვენ ხომ ქიზიყელები ვართ და სიტყვას არასდროს ვღალატობთ.