Palomino Ranch • რანჩო პალომინო, რომელიც მომხმარებლებს საცხენოსნო ტურებსა და ბუნებაში აქტიური დასვენების შესაძლებლობას სთავაზობს, მომსახურების გაფართოებას აგრძელებს. რანჩომ ტერიტორიაზე კვების ობიექტი დაამატა,- ამის შესახებ, Business Insider Georgia-ს კომპანიის თანადამფუძნებელმა ლაშა გაგოიძემ განუცხადა.

„მთავარი სიახლე არის ის რომ საცხენოსნო ტურებთან ერთად კვების ობიექტიც დავამატეთ. თუ აქამდე მომხმარებლებს მხოლოდ საცხენოსნო გამოცდილებას ვთავაზობდით, ახლა მათ ადგილზე კვების სერვისით სარგებლობაც შეუძლიათ, რაც ვიზიტს უფრო კომფორტულს ხდის. ასევე გავაფართოვეთ მოსასვენებელი სივრცეები, რათა სტუმრებმა დრო უფრო სასიამოვნო გარემოში გაატარონ.

გარდა ამისა, მოთხოვნის გათვალისწინებით, ახალი მარშრუტიც დავამატეთ. აქამდე მომხმარებლებს 1-საათიანი, 2-საათიანი და 4-საათიანი საცხენოსნო ტურების არჩევა შეეძლოთ, ახლა კი მათთვის ხელმისაწვდომია 6-საათიანი მარშრუტიც“,- აცხადებს ლაშა გაგოიძე.

კომპანიის სერვისებისადმი მოთხოვნა და ინტერესი სტაბილურად მზარდია.

„წელი საკმაოდ წარმატებით დაიწყო. პირველ კვარტალში, გასული წლის ანალოგიურ პერიოდთან შედარებით, დაახლოებით 130%-იანი ზრდა გვქონდა. თუმცა მოგვიანებით რეგიონში განვითარებულმა მოვლენებმა, მათ შორის ირანსა და ისრაელთან დაკავშირებულმა ვითარებამ და ფრენების შეზღუდვამ, გარკვეული გავლენა მოახდინა ტურისტულ ნაკადებზე. შედეგად, შემცირდა ვიზიტორების რაოდენობა გალფის ქვეყნებიდან და ისრაელიდან.

მიუხედავად ამისა, ივნისიდან ამ ბაზრებიდან მოთხოვნა კვლავ გააქტიურდა. პარალელურად, გასულ წელთან შედარებით, გაიზარდა ევროპელი ვიზიტორების რაოდენობაც. დადებითი ტენდენცია ფიქსირდება ადგილობრივი მომხმარებლების მიმართულებითაც. ახალი კვების ობიექტის დამატების შემდეგ, მომხმარებლები ჩვენთან მხოლოდ საცხენოსნო ტურებისთვის აღარ მოდიან - იზრდება ინტერესი სხვადასხვა ღონისძიების, მათ შორის დაბადების დღეებისა და კერძო შეკრებების გამართვის მიმართ. არსებული ინფრასტრუქტურა გვაძლევს შესაძლებლობას, შედარებით დიდი ჯგუფებიც მივიღოთ“,- ამბობს კომპანიის თანადამფუძნებელი.

„რანჩო პალომინო“ სამომავლოდ მომხმარებლისთვის დამატებითი სერვისების შეთავაზებას გეგმავს.

„წელს მთავარი აქცენტი ინფრასტრუქტურის გაუმჯობესებაზე, გარემოს უსაფრთხოებასა და სივრცის კიდევ უფრო გალამაზებაზე გვექნება, რათა სტუმრებისთვის უფრო კომფორტული გარემო შევქმნათ.

გეგმაში გვაქვს საბავშვო სივრცის მოწყობაც, რაც კომპლექსს უფრო მიმზიდველს გახდის როგორც ბავშვიანი ოჯახებისთვის, ისე სხვა ვიზიტორებისთვის. ასევე ვმუშაობთ დამატებითი გასართობი აქტივობების დანერგვაზე. ერთ-ერთი პროექტი 100 მეტრიანი zip line-ის მოწყობაა, რომლის განხორციელებასაც უახლოეს პერიოდში ვგეგმავთ“,- აღნიშნავს ლაშა გაგოიძე.

ინფორმაციისთვის, ობიექტი თბილისიდან სულ რაღაც 30 წუთის სავალზე, კასპის მუნიციპალიტეტის სოფელ ფერმაში მდებარეობს. რანჩო სტუმრებს სთავაზობს უნიკალურ შესაძლებლობას, გაეცნონ ადგილობრივი თუშური ჯიშის ცხენებს, რომლებიც თავისი გრაციოზულობითა და გამძლეობით არიან ცნობილები.

ადგილზე მოქმედებს საცხენოსნო სკოლა, სადაც სწავლება ინოვაციური მეთოდებით მიმდინარეობს.

„პალომინო რანჩოს“ ერთ-ერთი მთავარი პრიორიტეტი ინკლუზიურობაა. გარემო სრულად არის ადაპტირებული ეტლით მოსარგებლე პირებისთვის, რაც მათ საშუალებას აძლევს სრულფასოვნად ჩაერთონ რანჩოს ცხოვრებაში.