ტურისტს აუცილებლად სჭირდება ახალი ინფრასტრუქტურა, - ამის შესახებ საქართველოს ტურიზმის ასოციაციის ხელმძღვანელმა ნატა კვაჭანტირაძემ რადიო „სივრცის“ ეთერში გადაცემა Business Insider Georgia-ში სტუმრობისას ტურიზმის განვითარებაზე საუბრისას გააკეთა. ნატა კვაჭანტირაძის თქმით, ეს ინფრასტრუქტურა აუცილებლად უნდა განვითარდეს და ვითარდება კიდეც რეგიონებშიც და არ მოხდეს მხოლოდ დედაქალაქზე ფოკუსირება. 

„როცა ჩვენ ვსაუბრობთ ტურიზმის განვითარებაზე, პირდაპირ შეგვიძლია ვიმსჯელოთ იმაზე თუ რა სჭირდება ტურისტს. და ტურისტს აუცილებლად სჭირდება ახალი ინფრასტრუქტურა, რომელიც შეიძლება იყოს, როგორც ახალი ინფრასტრუქტურის მიმართულებით - ზოგადად ჰორეკა სექტორის მიმართულებით. ჰორეკა სექტორი დიდ როლს თამაშობს ტურიზმის ნაწილში. როდესაც ჩვენ მომხმარებელს ვთავაზობთ სხვადასხვა კატეგორიის ობიექტებს, ეს შეიძლება იყოს სასტუმრო, რესტორანი თუ ასე შემდეგ, ძალიან აქტიურად არიან ასევე ღვინის მიმართულებით მარნები და საოჯახო ბიზნესები ჩნდება ჩვენს რეალობაში. ასევე მნიშვნელოვანია მაღალი კატეგორიის ინფრასტრუქტურა - სასტუმრო, რომელიც პირდაპირ შესაძლებლობას გვაძლევს, რომ ტურიზმი უფრო მაღალ სეგმენტზე გავიდეს ტურისტული კომპანია და თავისთავად როცა მათი მხრიდან საერთაშორისო ბაზრებზე ამხელა დანახარჯები კეთდება, რომელიც ითვალისწინებს საერთაშორისო გამოფენებში მონაწილეობას, პრეზენტაციების გამართვას ამა თუ იმ ქვეყანაში, თავისთავად უნდა არსებობდეს შესაძლებლობა შეთავაზების ჭრილში, როგორც დაბალი კატეგორიის, ისე მაღალი და უმაღლესი კატეგორიის - ლაქშერი - მიმართულებით. რაც დამატებით სტიმულს აძლევს ბიზნესს ტურისტების მოზიდვის ნაწილში, უფრო ძლიერი პარტნიორების გაჩენის ნაწილში, და ძალიან მისასალმებელია, როცა ასეთი ობიექტები ჩნდება რეგიონებში. ნებისმიერ რეგიონს სჭირდება სტიმული, წახალისება. არ უნდა იყოს მხოლოდ თბილისზე ფოკუსირება.

ჩვენს ასოციაციაში სასტუმროების მართვის ბევრი კომპანიაა გაწევრიანებული. ისინი ფოკუსს აკეთებენ რეგიონებზე, დაბალანსება ხდება მშენებლობის და ინფრასტრუქტურის მოწესრიგების. ამის ძალიან კარგი მაგალითები არსებობს და ძალიან მისასალმებელია, როცა ინვესტორი ცდილობს რეგიონის გამოცოცხლებას ტურისტული კუთხით“, - განაცხადა ნატა კვაჭანტირაძემ.