Kiwi Post • კივი პოსტი დაფარვის არეალს აფართოებს. როგორც Business Insider Georgia-სთან საუბარში Kiwi Post-ის საოპერაციო მენეჯერმა ქეთევან შანიძემ განაცხადა, რამდენიმე კვირის წინ კომპანიამ ფილიალი ქუთაისში გახსნა, ახლა კი ახალ ფილიალს გლდანში ამატებს.

„წელს უკვე დავამატეთ KiwiDrive, რაზეც ჩვენს მომხმარებელს უკვე აქვს ინფორმაცია. ეს არის KiwiDrive ამაშუკელი, რომელიც ლისის მიმდებარედ მდებარეობს, და ასევე KiwiDrive დიდი დიღომი, რომელიც თბილისი მოლის მოპირდაპირე მხარესაა განთავსებული. გარდა ამისა, Kiwi Post-მა ფილიალი დაამატა ქუთაისში - ეს ჩვენი პირველი გასვლაა რეგიონში. ახლა ვამატებთ ფილიალს გლდანში. ფილიალი ფაქტობრივად უკვე გახსნილია და ორშაბათს მისი ოფიციალური გახსნა გაიმართება. მომხმარებელს უკვე შეუძლია საკუთარ ექაუნთში აირჩიოს გლდანის ლოკაცია ამანათების მისამართად. ახალი ფილიალი მდებარეობს ანგია ბოჭორიშვილის 33ა-ში,“ - აცხადებს ქეთევან შანიძე.

მისი თქმით, კომპანია სამომავლოდ გაფართოებას გეგმავს როგორც თბილისის მასშტაბით, ასევე რეგიონებშიც.

„დღეისათვის Kiwi Post, KiwiDrive-ს ჩათვლით, 6 ფილიალს აერთიანებს. რა თქმა უნდა, აქტიურად ვმუშაობთ როგორც თბილისში, ისე რეგიონებში ახალი ფილიალების დამატებაზე. ჩვენთვის ძალიან საინტერესო პროდუქტია KiwiDrive - სერვისი, სადაც მომხმარებელს შეუძლია მანქანიდან გადმოუსვლელად მიიღოს თავისი გზავნილი. ეს, რა თქმა უნდა, ხელს უწყობს პარკინგის პრობლემის გადაწყვეტას, რომელიც ჩვენს ქალაქში საკმაოდ მწვავეა. განვიხილავთ, რომ რაც შეიძლება მეტ ლოკაციაზე დავამატოთ KiwiDrive. ჩვენი მიზანია მომდევნო 1 წლის განმავლობაში 20-მდე ლოკაციის დამატება - ეს არის KiwiDrive-ის განვითარების გეგმა. რაც შეეხება ფილიალებს - მათაც ეტაპობრივად დავამატებთ,“ - ამბობს ქეთევან შანიძე.

ქეთევან შანიძის განცხადებით, Kiwi Post აქტიურად მუშაობს ახალი ქვეყნების დამატების მიმართულებითაც.

„ინტენსიურად ვმუშაობთ. ბოლო ორი დამატებული ქვეყანა იყო საბერძნეთი და პოლონეთი. ვგეგმავთ, რომ წლის ბოლომდე კიდევ ერთი ევროპული ქვეყანა დავამატოთ. ასევე ვმუშაობთ სხვა რეგიონული მიმართულებების დამატებაზე,“ - აცხადებს კომპანიის წარმომადგენელი.

რაც შეეხება კითხვას, რამდენად გაამართლა პოლონეთის მიმართულებამ და რამდენად მზარდია მოთხოვნა პოლონეთიდან ამანათებზე, Kiwi Post-ის წარმომადგენელი ამბობს, რომ პოლონეთი საკმაოდ აქტიური ბაზარია ტექნიკისა და ავტონაწილების მიმართულებით.

„ამ მიმართულებამ გაამართლა. პოლონეთში ბრენდული პროდუქცია საკმაოდ იაფია - ხშირად საბერძნეთთან შედარებითაც კი. განსაკუთრებით მოთხოვნადია ავტონაწილები და ტექნიკა. პოლონეთში ძალიან საინტერესო ონლაინ პლატფორმებია, რაც ზრდის ამ მიმართულებით მოთხოვნას,“ - ამბობს შანიძე.

მისი ინფორმაციით, Kiwi Post-ის მეშვეობით ამანათების რაოდენობა მზარდია.

„სტანდარტულად 20-25%-იანი ზრდა ფიქსირდება ყველა მიმართულებით. გამოვარჩევდი ინგლისსა და აშშ-ს - ეს ორი მიმართულება ჩვენთვის განსაკუთრებით აქტიურია. თუმცა ზრდა შეინიშნება ყველა მიმართულებაზე. ზოგადად, საქართველოში e-commerce-ის განვითარება სწრაფია, და ეს, ბუნებრივია, აისახება ჩვენს კომპანიაზეც,“ - განმარტავს ქეთევან შანიძე.