საპარლამენტო დროებითი ფასების შემსწავლელი კომისიის პირველი სხდომა კითხვა-პასუხის რეჟიმში წარიმართა, სადაც კომისიის წევრებმა ადგილობრივ მწარმოებლებისგან დამატებითი ინფორმაციები მოისმინეს და მათ მოსაზრებებს გაეცნენ.

როგორც კომისიის თავმჯდომარემ შოთა ბერეკაშვილმა გამოსვლაში აღნიშნა: „ კომისიის მიზანია სწორედ შეისწავლოს თუ რა პრობლემები აქვს სექტორს და მნიშვნელოვანია, რომ ბიზნესის წარმომადგენლები საკითხის მიმართ დადებითად და კონსტრუქციულად არიან განწყობილი. მხარეები ვთანხმდებით, რომ პროდუქციაში  ფასნამატი მაღალია, რომელიც სტრუქტურულ პრობლემებზე მიუთითებს, რაც სისტემურ მიდგომებს საჭიროებს. ჩვენ გვინდა ისეთი ცვლილებები მივიღოთ, რომ სექტორი სისტემურად გაჯანსაღდეს, რაც შედეგობრივად პროდუქციაზე ფასების შემცირებას განაპირობებს.

ადგილობრივ მწარმოებლებთან შეხვედრაზე ხუთი ძირითადი პრობლემა გამოიკვეთა, რომელთა სწორად იდენტიფიცირება უაღრესად მნიშვნელოვანია, რადგან თუ გვეცოდინება პრობლემის არსი შემდგომ სწორი ანალიზით შევძლებთ შესაბამისი მექანიზმების ჩართვას. ეს კი სექტორის გაჯანსაღებამდე და კმაყოფილ მომხმარებლამდე მიგვიყვანს“.

მისი თქმით, დღევანდელი შეხვედრის ფარგლებში მოსმენილი ინფორმაციებიდან შემდეგი გამოწვევები გამოიკვეთა:

• მწარმოებლები მნიშვნელოვანწილად  დამოკიდებული არიან იმპორტირებულ ნედლეულზე, რაც თავის მხრივ  იმპორტის ინფლაციურ წნეხს ქმნის. 
• საოპერაციო ხარჯების ნაწილში მნიშვნელოვანი წილი უკავია გაყიდვებისა და მარკეტინგის ხარჯებს - ქეშბექები, ქსელში შესვლის საფასური, თაროს გადასახადი და სხვა.
• მწარმოებელს, დისტრიბუტორსა და ქსელურ მარკეტებს შორის შეინიშნება ასიმეტრიული ურთიერთობები, რაც ზედა რგოლს  გადამეტებულ მოლაპარაკების ძალაუფლებას ანიჭებს. 
• სამუშაო კაპიტალის მოცულობა, კაპიტალის ღირებულება და გადახდის დაგვიანების შემთხვევები პირდაპირ აისახება თვითღირებულებაზე. გადახდების გაჭიანურება ზრდის ფინანსურ ხარჯებს და საბოლოოდ ქმნის დამატებით ზეწოლას პროდუქციის ერთეულის ღირებულებაზე.
• რიგ შემთხვევებში ადგილი აქვს ნაშთების არაეფექტურ მართვას და შედეგობრივად მაღალ დანაკრგებს, რაც ასევე ზრდის პროდუქციის თვითღირებულებას.