გორში, „გორი ინნ“-ის ეზოში, 30 ოქტომბრიდან 1 ნოემბრის ჩათვლით ვაშლის სამდღიანი ფესტივალი „ვაშლი ფესტი“ გაიმართება. როგორც სასტუმროს მფლობელი ერეკლე კოკაია Business Insider Georgia-სთან საუბრისას აღნიშნავს, ფესტივალი წელს პირველად ჩატარდება და, წარმატების შემთხვევაში, ყოველწლიურ ღონისძიებად იქცევა.

„წელს პირველად ვახორციელებთ ახალ ღონისძიებას, რომელიც, იმედია, სამომავლოდ ყოველწლიურ ტრადიციად გადაიქცევა. ფესტივალს „ვაშლი ფესტი“ ერქმევა და ის გორში, „გორი ინნ“-ის ეზოში გაიმართება, სადაც წარმოდგენილი იქნებიან ადგილობრივი მცირე და საშუალო ბიზნესის წარმომადგენლები და ფერმერები.

საშუალებას ვაძლევთ ადგილობრივ ბიზნესებს, წარმოადგინონ თავიანთი პროდუქცია და ცნობადობის ამაღლებაშიც ვუწყობთ ხელს. ამავე დროს, გვექნება სხვადასხვა გასართობი ღონისძიება როგორც უფროსებისთვის, ისე ბავშვებისთვის. ბავშვებისთვის ცალკე ანიმატორები გვეყოლება მთელი დღის განმავლობაში.

ფესტივალი სამი დღის განმავლობაში გაგრძელდება - 30 და 31 ოქტომბერსა და 1 ნოემბერს. მისი ძირითადი მიზანია როგორც ადგილობრივი მეწარმეების ხელშეწყობა, ისე ტურიზმის განვითარება. ამასთან, ჩატარდება კიდევ ერთი ღონისძიება, რომელიც გართობასთან, შემოდგომასა და ვაშლთან იქნება დაკავშირებული. გორი ისედაც ასოცირდებოდა ვაშლთან და ახლა გვინდა, ეს ასოციაცია უფრო დადებითად გამოვიყენოთ.

გარდა ამისა, სიახლე ის იქნება, რომ გვინდა, საქართველოში ვაშლის გამოყენების ისეთი კულტურა დავნერგოთ, რომელიც აქამდე ფართოდ გავრცელებული არ ყოფილა. მაგალითად, გვინდა, სხვადასხვა ქვეყნის გამოცდილებაზე დაყრდნობით შევქმნათ მენიუ, რომელშიც ვაშლი მთავარი ინგრედიენტი იქნება. ეს იქნება ვაშლის ღვეზელები, ვაშლის შტრუდელი, ვაშლის ფრიტერი თუ ვაშლის სიდრი. ამით ადგილობრივ კულინარიაშიც ნელ-ნელა მეტ მრავალფეროვნებას შევიტანთ.

წელს ჩვენთვის საპილოტო ფესტივალია, რადგან, სრულიად ახალ ტრადიციას არაფრიდან ვიწყებთ. თუ ღონისძიება წარმატებით ჩაივლის, რა თქმა უნდა, მას ყოველწლიურად გავმართავთ. ჩვენი მიზანიც ეს არის - გვინდა, რომ ეს ყოველწლიურ ფესტივალად იქცეს. როგორც, მაგალითად, რთველი ასოცირდება კახეთთან, ისე გვინდა, რომ შემოდგომა „ვაშლი ფესტთან“ ასოცირდებოდეს. ვეცდებით, ყოველწლიურად რაღაც ახალი შევთავაზოთ სტუმრებს.

აქვე აღვნიშნავ, რომ ფესტივალი ყველასთვის ღიაა და აბსოლუტურად უფასოა“, - აცხადებს ერეკლე კოკაია.