„რადარის“ ეკოსისტემას ახალი ფუნქციონალი – „ვაკანსიები“ დაემატა. სიახლის ფარგლებში პლატფორმაზე ინტეგრირდა სპეციალური გვერდი, სადაც სასტუმროებს შესაძლებლობა ექნებათ განათავსონ საკუთარი ვაკანსიები და მართონ კანდიდატებთან დაკავშირებული პროცესი ერთიან სისტემაში.

როგორც „რადარის“ დამფუძნებელი მაია მახათაძე განმარტავს, პლატფორმის ახალი ფუნქცია ხელს შეუწყობს დასაქმების პროცესის გამარტივებას და გააძლიერებს კავშირს პროფესიონალ კანდიდატებსა და დამსაქმებელ სასტუმროებს შორის.

„პირველ რიგში გეტყვით, რომ სასტუმრო ინდუსტრიისთვის ეს არის საკმაოდ მსხვილი და აქტუალური გამოწვევა. ჩვენ გვესმის, რომ სტუმარმასპინძლობა არის ძალიან ცოცხალი, ორგანული პროცესი, რომელიც დიდი რაოდენობით ადამიანურ რესურსს მოითხოვს – მიუხედავად ციფრული საუკუნისა ჯერ კიდევ გვჭირდება ვიყოთ მაქსიმალურად კომუნიკაციაში ჩვენს სტუმრებთან და მომხმარებლებთან. შესაბამისად, ადამიანური რესურსების შევსება ჩვენთვის დიდი გამოწვევა.

დღევანდელ სამყაროში, როცა სერვისების დიჯიტალიზაცია აქტიურად მიმდინარეობს, მაღალი ტექნოლოგიური უნარების მქონე ადამიანები მარტივად ტრანსფორმირდებიან ამ სფეროში. ამავდროულად, რჩება დიდი სივრცე იმისთვის, რომ ინტელექტუალურად დატვირთული ახალგაზრდები დავიტოვოთ სექტორში. დღეს გვაკლია ძალიან ყოჩაღი ახალგაზრდები და ეს დეფიციტი განსაკუთრებით იგრძნობა მსხვილი ბიზნეს ოპერატორების – სასტუმროებისა და რესტორნებისთვის – მხრიდან, რომლებსაც დიდი რაოდენობით დასაქმებული კადრი სჭირდებათ.

ამ გამოწვევების საპასუხოდ შევქმენით სპეციალური გვერდი და დავამატეთ „რადარის“ პლატფორმაზე. აქ სასტუმროს მარტივად შეუძლია განათავსოს ნებისმიერი ვაკანსია, რომელიც ინდუსტრიაში სჭირდება. მომხმარებელმაც ზუსტად იცის, რომელ დამსაქმებელს, რომელ ვაკანსიაზე, სად და ერთ კონკრეტულ წერტილში უნდა მიმართოს. აღარ უწევს ცალკე თითოეული სასტუმროს ძებნა სხვადასხვა საიტებზე, რაც ხშირად იწვევს ინფორმაციის დაკარგვას და შესაძლებლობების გამოტოვებას.

„რადარის“ საშუალებით შევძელით ის, რომ დავამატეთ სპეციალური გვერდი, სადაც კონცენტრირებულად ყველა სასტუმრო, რომელსაც სურს ვაკანსიის განთავსება, ყოველგვარი დამატებითი საფასურის გარეშე აქვეყნებს ვაკანსიას. აპლიკაციები პირდაპირ ვარდება მის პირად ჩატში. ამით ავარიდებთ კომპანიებსა და სასტუმროებს იმ გრძელ, შრომატევად პროცესს, როგორიც არის რეზიუმეების დახარისხება და კლასიფიკაცია. ამ პროცესს მთლიანად ჩვენი პლატფორმა იღებს თავის თავზე“, – აცხადებს მაია მახათაძე.

„რადარის“ დამფუძნებელი, რომელსაც სტუმარმასპინძლობის ინდუსტრიაში მუშაობის დიდი გამოცდილება აქვს, აღნიშნავს, რომ დღეს სასტუმრო ბიზნესში ვაკანსიები ძირითადად საშუალო და დაბალი რგოლის პოზიციებზეა.

„ყველაზე მეტად დეფიციტურ ვაკანსიებად რჩება საშუალო და დაბალი რგოლის პოზიციები – იქ, სადაც გვჭირდება ადამიანები, რომლებიც უშუალოდ ურთიერთობენ სტუმრებთან და მომსახურების სხვადასხვა საფეხურებთან. ისინი პირდაპირ ემსახურებიან ჩვენს სტუმრებს. ამიტომ სწორედ ამ რგოლებშია დეფიციტი ყველაზე ინტენსიური“, – აცხადებს მაია მახათაძე.

აღსანიშნავია, რომ „რადარის“ ციფრულ ეკოსისტემაში დამატებულ გვერდზე – „ვაკანსიები“, სასტუმროებს შესაძლებლობა აქვთ ატვირთონ საკუთარი ვაკანსიები პირდაპირ პლატფორმაზე, მიიღონ დაინტერესებული კანდიდატების აპლიკაციები პირად კაბინეტში და მართონ კანდიდატების ნაკადი ერთიანი და ორგანიზებული სისტემით.