GPR Nuts-ი ქართული თხილის საექსპორტო არეალის გაფართოებას აგრძელებს. სკანდინავიის ბაზარზე წარმატებული შესვლის შემდეგ, კომპანია ახალი სეზონიდან აზიის მიმართულებით ექსპორტის დაწყებას გეგმავს - ამის შესახებ, Business Insider Georgia-ს კომპანიის თანადამფუძნებელმა ბაია სალუქვაძემ განუცხადა.

რა არის GPR Nuts-ის მთავარი სიახლეები ამ ეტაპზე და რა მიმართულებებზეა კომპანია დღეს ორიენტირებული?

მიმდინარე თხილის სეზონი არაერთი გამოწვევით გამოირჩეოდა. თურქეთში, რომელიც მსოფლიოში თხილის მთავარი მწარმოებელი ქვეყანაა, მოსავლის სიმცირემ და ხარისხთან დაკავშირებულმა პრობლემებმა საექსპორტო ფასების ზრდა გამოიწვია. შედეგად, გლობალურ ბაზარზე თხილზე მოთხოვნა შემცირდა, თუმცა ქართული თხილი, თურქულთან შედარებით უფრო კონკურენტული ფასის გამო, კვლავ მაღალი მოთხოვნით სარგებლობდა. ფაქტობრივად, 2025 წლის ქართული თხილის თითქმის მთელი მოსავალი უკვე ექსპორტირებულია, მაშინ როდესაც თურქეთში გასული სეზონის მოსავლის ნაწილი კვლავ გაუყიდავია.

როგორ აფასებთ მიმდინარე სეზონს როგორც მოსავლის, ისე მოთხოვნის კუთხით? რომელ ბაზრებზე ფიქსირდება ყველაზე მაღალი ინტერესი ქართული თხილის მიმართ?

ახალ 2026 წლის მოსავლზე მოლოდინები ხარისხისა და რაოდენობის კუთხით დამაიმედებელია არამხოლოდ საქართველოში, არამედ ძირითადად ყველა მწარმოებელ ქვეყანაში, მათ შორის თურქეთშიც. გამომდინარე აქედან, ფასის მეტად დასტაბილურებას ველოდებით. მთავარია ივლისის თვეში გარემო პირობებმა არ გააუარესოს თხილის ხარისხი და ასევე მოსავლის აღების პერიოდში მოხერხდეს მოსავლის სწორად დაბინავება, მისი დროული კრეფა, შრობა და დასაწყობება.

გაფართოვდა თუ არა GPR Nuts-ის საექსპორტო არეალი? თუ კი, რომელ ახალ ბაზრებზე დაიწყეთ ოპერირება ან რომელ მიმართულებებზე მუშაობთ?

GPR- ის საექსპორტო ბაზრების არეალი დიდია, არსებულ, ტრადიციულ შემსყიდველებთან მსოფლიოს სხვადასხვა ქვეყნებიდან ყოველ წელს ვახდენთ თხილის მიწოდებას, თუმცა ასევე ვცდილობთ გავაცნოთ ქართული თხილი ჯერ კიდევ აუთვისებელ ბაზრებს, როგორიცაა აზიის მიმართულება, სკანდინავიის ქვეყნები და სხვა. წელს უკვე ტრადიციული ევროპული ქვეყნების გარდა, მიწოდებები განვახორციელეთ სკანდინავიის ქვეყნებში, სადაც ხარისხზე მოთხოვნა ბევრად მკაცრია და შესაბამისად ავითვისეთ ახალი ბაზრები.

რა არის კომპანიის სამომავლო მთავარი პრიორიტეტები? გეგმავთ თუ არა ახალი პროდუქტების, პარტნიორობების ან სხვა მნიშვნელოვანი პროექტების განხორციელებას?

კომპანია ახორციელებს მაღალ ხარისხიანი ქართული თხილის ექსპორტირებას. შესაბამისად, ადგილობრივ ბაზარზე ფერმერებთან მუდმივად მუშაობს თხილის ხარისხისა და პირველადი წარმოების გაუმჯობესების გზებზე, ისევე როგორც საექსპორტო პოტენციალის გაზრდაზე მსოფლიოს სხვადასხვა ქვეყანაში. წელს, ახალი სეზონიდან აუთვისებელი აზიის ბაზრებთან აქტიური მოლაპარაკებების საფუძველზე, ვგეგმავთ მათთან ქართული თხილის მიწოდების დაწყებას.