უმალი • Umali ასორტიმენტს სისტემატურად ზრდის და რამდენიმე თვეში ბაზარს ნახევარფაბრიკატებსაც შესთავაზებს. როგორც Business Insider Georgia-სთან „უმალის“ აღმასრულებელმა დირექტორმა დიმიტრი წვერავამ განაცხადა, ნახევარფაბრიკატების წარმოებას „უმალი“ ახალი დანადგარების დამონტაჟების შემდეგ შეძლებს, რომელიც კომპანიას უკვე შეძენილი აქვს და ამ დროისათვის საქართველოსკენ ტრანსპორტირების რეჟიმშია.  დიმიტრი წვერავას განმარტებით „უმალი“ ნახევარბაფრიკატების წარმოებას უკვე სექტემბრის ბოლოდან შეძლებს. საწარმოს გაფართოების შემდეგ „უმალი“ ბაზარს პირველ პროდუქტად თევზის ბურგერს შესთავაზებს, რომელიც მოთხოვნადი იქნება, როგორც ჰორეკა სექტორის მიერ, ასევე სუპერმარკეტების ქსელებიდანაც. 

კომპანიაში განმარტავენ, რომ ზაფხულის პერიოდში ძირითადი მოთხოვნა ლუდთან დაკავშირებულ პროდუქტებზე იზრდება, თუმცა ზოგადად თევზის პროდუქტების მოხმარება იკლებს. 

„ამ პერიოდში მოთხოვნა იზრდება გამომშრალ თევზზე, თევზის ჩხირები.დავამატეთ თევზის სნექი და უახლოეს მომავალში ეს პროდუქტი უკვე წარმოდგენილი იქნება „მაგნიტის“ ქსელში“. თუმცა ამ დროისათვის იყიდება ლუდის სახლებში. ასევე დავამატეთ შებოლილი შპროტი 300 გრამიანი შეფუთვით. 

ივნისი-ივლისი-აგვისტო ზოგადად ნაკლებად პროდუქტიულ პერიოდად ითვლება. ამ დროს გაყიდვების ზრდაზე არაა საუბარი, საუბარია მის შენარჩუნებაზე. შესაბამისად გეტყვით, რომ იგივე ტენდენციას ვინარჩუნებთ, რაც იყო მაისში გვქონდა.ზოგადად აგვისტოში თევზი ნაკლებად მოხმარებადი პროდუქტია“, - აცხადებს  „უმალის“ აღმასრულებელი დირექტორი.
თანამედროვე ტექნოლოგიებით აღჭურვილი თევზის გადამამუშავებელი საწარმო - "უმალი" ქარელის მუნიციპალიტეტის სოფელ ურბნისში მდებარეობს და მასში ძირითადად ადგილობრივი მოსახლეობაა დასაქმებული. საწარმოს სრული ფართი შეადგენს 1 ჰექტარს.
საწარმოს, მისი მასშტაბებიდან და წარმოების შესაძლებლობებიდან გამომდინარე, საქართველოში ანალოგი არ ჰყავს. ასევე ის, ევროპული სტანდარტების მიხედვით, ყველაზე დიდი თევზის გადამამუშავებელი ქარხანაა ამიერკავკასიაში.