„ტირიფონის ბაღები“, რომელიც ბაზარზე „გორჯის“ ბრენდის მფლობელია, ვაშლის მოსავლის პროგნოზირებადობის პრობლემის მოგვარებას იწყებს. გორის რაიონის სოფელ კვარხეთში მდებარე კომპანია, „ტირიფონის ბაღები“, რომელის ბაღებიც 31 ჰექტარზეა გაშენებული, მოსავლის სტაბილიზაციისკენ სერიოზულ ნაბიჯებს დგამს. როგორც „ტირიფონის ბაღების“ დამფუძნებელი, ზურაბ გოჯიაშვილი აცხადებს, ამ მიმართულებით მუშაობა უკვე დაწყებულია და მოსალოდნელია, რომ შედეგები 2-3 წელიწადში დადგება.

ზურაბ გოჯიაშვილის თქმით, წელს საქართველოში ვაშლის მოსავალი შედარებით ნაკლები იქნება, რაც ნაწილობრივ საგაზაფხულო წვიმებმა გამოიწვია. ეს პრობლემა დიდ გავლენას ახდენს ფერმერების ეკონომიკაზე, რადგან მოსავლიანობის დაგეგმვა და შემოსავლების პროგნოზირება რთული ხდება.

„ვაშლი იმისთვის ისხამს, რომ თავისი გენეტიკური ინფორმაცია გაავრცელოს. თუ ერთ წელს ხეზე ბევრი ნაყოფია, ის საგაისოდ საყვავილე კვირტს აღარ იკეთებს და მოსავლიანობა მცირდება. სწორედ ამის გამო გვაქვს ერთ წელს ბევრი, მეორე წელს კი ცოტა მოსავალი“, - აღნიშნავს გოჯიაშვილი.

ამ გამოწვევის დასაძლევად, „ტირიფონის ბაღებმა“ ქიმიური დანორმების პრეპარატების გამოყენება დაიწყო, რაც ვაშლის მოსავალს უფრო პროგნოზირებადს გახდის. გოჯიაშვილის თქმით, ამ პრეპარატების შემოტანა საქართველოში წელს დაიწყო და კომპანია უკვე თანამშრომლობს იტალიურ კომპანიასთან, რომელიც ფერმერებს მოსავლის დაგეგმვაში ეხმარება.

მიუხედავად იმისა, რომ წელს მოსავალი ნაკლებია, „ტირიფონის ბაღები“ 1 ჰექტარზე საშუალოდ 40 ტონაზე მეტ მოსავალს ელოდება. ზურაბ გოჯიაშვილი აღნიშნავს, რომ მსოფლიოში ვაშლის ფასი გაიზარდა, რაც საქართველოზეც აისახება. მისი თქმით, ქვეყანა ვაშლის ნეტო იმპორტიორია, რაც იმით აიხსნება, რომ არ არსებობს საკმარისი სამაცივრე საცავები და პროდუქციის შენახვის შესაძლებლობა.

„ტირიფონის ბაღების“ ბრენდი „გორჯი“ საქართველოს ბაზარზე წარმოდგენილია 7 სახეობის ვაშლითა და 2 სახეობის მსხლით. კომპანია ქვეყანაში ერთადერთია, რომელსაც Global G.A.P. სერტიფიცირება აქვს გავლილი 2017 წლიდან. მისი სამაცივრე საცავი ასევე სერტიფიცირებულია ISO 22000:2018 სტანდარტის შესაბამისად.