20 წლის წინ, როცა „ტავ ჯორჯიამ“ საქართველოში საქმიანობა დაიწყო, თბილისის საერთაშორისო აეროპორტს წლიურად მხოლოდ 500 ათასი მგზავრი ჰყავდა, ბათუმს კი – 30 000. წლევანდელი მონაცემებით, ეს რიცხვი თბილისში 5,3 მილიონს გადააჭარბებს, ბათუმის საერთაშორისო აეროპორტში კი – 1,2 მილიონს, – ასე აფასებს „ტავ ჯორჯიას“ საქართველოში ოპერირების 20-წლიან ისტორიას „ტავ ჯორჯიას“ გენერალური მენეჯერი თეა ზაქარაძე. მისი თქმით, ციფრები ყველაზე კარგად გამოხატავენ იმ პროგრესს, რასაც კომპანიამ ამ 20 წლის განმავლობაში მიაღწია.

„დღეს განსაკუთრებული დღე გვაქვს – დღეს „ტავ ჯორჯიას“ დაბადების დღეა. კომპანია 20 წელია, რაც მოღვაწეობს საქართველოში და ოპერირებს თბილისისა და ბათუმის აეროპორტებში. წელს გვაქვს ძალიან წარმატებული და პოზიტიური დინამიკა: თბილისის საერთაშორისო აეროპორტში მგზავრთნაკადი წელს 5,3 მილიონამდე გაიზრდება, ხოლო ბათუმში წელს დავხურავთ 1 მილიონ 200 ათასი მგზავრით.

რა თქმა უნდა, ძალიან შთამბეჭდავი ციფრებია, რადგან 2005 წელს თბილისში გვყავდა 550 000 მგზავრი, ხოლო ბათუმში – 30 000. ჩვენ ძალიან ბევრი ვიმუშავეთ – მართლა ძალიან ბევრი ვიმუშავეთ ჩემს არაჩვეულებრივ, პროფესიონალურ გუნდთან ერთად და ყველა იმ პარტნიორთან, რომელმაც წვლილი შეიტანა ამ ორი აეროპორტის განვითარებაში. გამოვყოფდი ავიაკომპანიებს – იმ მთავარ და დიდ ავიაკომპანიებს, როგორიც არის Georgian Airways, Turkish Airlines, რომლებიც დღესდღეობით თბილისის საერთაშორისო აეროპორტში ყველაზე დიდი გადამზიდავები არიან.

რაც შეეხება სერვისებს – ჩვენ გვაქვს ძალიან ბევრი სიახლე. დღეს უკვე გაიცანით ჩვენი ახალი თანამშრომელი – რობოტი ტიჯი 1, ასევე გვყავს რობოტი ტიჯი 2, რომლებიც უკვე თბილისის საერთაშორისო აეროპორტში პირველი ოქტომბრიდან მგზავრებს მოემსახურებიან. ასევე, ჩვენ ზამთრის სეზონს გამოვიყენებთ იმ პროექტებისთვისა და სარეაბილიტაციო სამუშაოებისთვის, რომელსაც ყოველწლიურად ვახორციელებთ ამ ორ აეროპორტში.

რაც შეეხება აეროპორტის გაფართოებას და იმ დიდ პროექტს, რაზეც ჩვენ ვმუშაობთ – ვფიქრობ, რომ მოლაპარაკებები უკვე თითქმის ბოლოშია გასული ეკონომიკის სამინისტროსთან, და ოქტომბრის ბოლოსთვის უკვე თქვენთვის უფრო მნიშვნელოვანი სიახლეები გვექნება,“ – აცხადებს თეა ზაქარაძე.