წალკის მუნიციპალიტეტში, სოფელ დაშბაშში მდებარე საოჯახო სასტუმრო „ედის დაჩა“ დიდი პოპულარობით სარგებლობს. ობიექტი, ადგილზე მისულ სტუმარს მრავალსაუკუნოვან სახლში დასვენების შესაძლებლობას სთავაზობს. არსებულ სიახლეებსა და სამომავლო გეგმებზე Business Insider Georgia სასტუმროს დამფუძნებელს ედვარდ მკრტიჩიანს ესაუბრა.

როგორია კომპანიის მიმდინარე სიახლეები?

ჩვენი მთავარი სიახლე უკავშირდება სასტუმროს კიდევ უფრო მეტად განვითარებას.
ახლახანს დავასრულეთ 1936 წლის სახლის მასშტაბური რესტავრაცია, შევინარჩუნეთ ძველი სტილი.

გარდა ამისა დავამატეთ ახალი სერვისები, რომელიც ვიზიტორების მხრიდან განსაკუთრებული ინტერესით სარგებლობს :კანიონის კიდეზე აუზი თბილი წყლით, კლდეში გამოკვეთილი ორი საუნა და ეკო-სამზარეულო კულინარიული წარმოდგენებით.

როგორ აფასებთ მოთხოვნას და დატვირთულობას მიმდინარე სეზონზე?

ამ სეზონზე, ჩვენს სასტუმროზე მოთხოვნა ძალიან მაღალია. რეგიონში საუკეთესო მაჩვენებლები გვაქვს, Booking-ზე რეიტინგი 9.8. სტუმრები აღნიშნავენ ჩვენს ავთენტურობას, ეკო-მიმართულებას და სიმყუდროვეს. განსაკუთრებით პოპულარულია კანიონის ხედით ნომრები და კულინარიულ აქტივობებში მონაწილეობა.

როგორია კომპანიის სამომავლო გეგმები?

ჩვენი მიზნები უკავშირდება გაფართოებასა და განვითარებას. უკვე პროცესში ვართ და უახლოეს მომავალში გვინდა ავაშენოთ ახალი კოტეჯები კანიონის პირას ეთნო-სტილში, თუმცა თანამედროვე ხედვით. ეს იქნება ძველისა და ახლის ჰარმონიული ნაზავი, ისე რომ საერთო კონცეფციიდან ამოვარდნილი არ იყოს, მაგრამ ამავდროულად შეინარჩუნოს თანამედროვეობის ელემენტები. ამით შევძლებთ უფრო მეტი სტუმრის მიღებას, თუმცა აუცილებლად დავიცავთ სიმყუდროვესა და ბუნებასთან ჰარმონიას.

ასევე ვგეგმავთ ეკო-ტურიზმის განვითარებას: მეტი ღონისძიების ჩატარებას სტუმრების ჩართულობით, ხეების დარგვის გაგრძელებას და ეკოლოგიური ინიციატივების გაძლიერებას.

ცნობისთვის, სასტუმროს ნომრები სრულად აღჭურვილია თანამედროვე ტექნიკითა და დასვენებისთვის საჭირო ინვენტარით. საოჯახო სასტუმროს გააჩნია მოსასვენებელი სივრცე და ბარი.