გრუმინგ სალონმა „ცუგრუმელამ“ ლოკაცია შეიცვალა და მომხმარებელს ახალ მისამართზე ემსახურება. ამის შესახებ, Business Insider Georgia - ს გრუმინგ სალონის დამფუძნებელმა მერი ლორთქიფანიძემ განუცხადა.

„ლოკაცია შევცვალეთ ჩვენი ძირითადი ფილიალის და გადავედით ზოოპარკის ტერიტორიაზე. მთავარი მიზეზი პარკინგის პრობლემა იყო. ძველ მისამართზე საპარკინგე ადგილები სრულად გაუქმდა, რაც მომხმარებლებისთვის სირთულეს ქმნიდა. ამიტომ გადავწყვიტეთ ლოკაციის შეცვლა. ზოოპარკის ტერიტორია კი ბევრად კომფორტული და ხელსაყრელია. მდებარეობს ქალაქის შუაგულში და ყველა უბნიდან უფრო მარტივად მისადგომია “, - ამბობს მერი ლორთქიფანიძე.

„ცუგრუმელა“ გეგმავს ეტაპობრივად გააფართოოს საქმიანობა და პატარა ფილიალები გახსნას თბილისის ყველა უბანში.

„საგურამოში ფილიალი სატესტო რეჟიმში გავხსენით, თუმცა შედეგმა მოლოდინი ვერ გაამართლა. ორი თვის განმავლობაში ვმუშაობდით, მაგრამ მიუხედავად ზაფხულის სეზონისა, გახსნა ნაადრევი აღმოჩნდა. ამიტომ ფილიალი დავხურეთ და ახალი, პატარა ფილიალი გავხსენით მთაწმინდაზე, ალექსანდრე ჭავჭავაძის ქუჩაზე.

ამასთან, გარკვეულწილად შევიცვალეთ ბიზნესმიმართულებაც: თუ ადრე ვფიქრობდით, რომ ერთი დიდი, ძირითადი ფილიალი უნდა გვქონოდა და მასთან ასოცირებული რამდენიმე მცირე, ახლა მივხვდით, რომ ერთ უბანში დიდი და გრანდიოზული ფილიალი არარენტაბელურია. შესაბამისად, გადავწყვიტეთ, თითოეულ უბანში პატარა ფილიალების გახსნა, სადაც იმუშავებს ერთი ან ორი გრუმერი, რათა შევძლოთ ყველა უბნის მომსახურება “, - აღნიშნავს კომპანიის დამფუძნებელი.

გრუმინგ სალონი მომხმარებლებს ახალ, ბეწვის გაჯანსაღების სერვისს სთავაზობს.

„ახლახანს დავამატეთ ბეწვის გაჯანსაღების სერვისი, რომელიც პაკეტის სახით არის და რამდენიმე ვიზიტს მოიცავს. პროცედურა საკმაოდ ეფექტურია. ვიყენებთ ესპანურ, მაღალი ხარისხის კოსმეტიკას “, - აცხადებს მერი ლორთქიფანიძე.

ცნობისთვის, გრუმინგ ცენტრი დაახლოებით სამი წელია, რაც არსებობს და საკუთარ მომხმარებელს მეგობარი ცხოველებისთვის სხვადასხვა სერვისს სთავაზობს.