ეკონომიკისა და მდგრადი განვითარების მინისტრის მოადგილის ვახტანგ ცინცაძის შეფასებით, 2025 წლის პირველ ნახევარში ეკონომიკური აქტივობის მაღალი მაჩვენებლები დაფიქსირდა, ეკონომიკური ზრდის მაჩვენებლები კი სექტორულ დონეზე საკმაოდ დივერსიფიცირებულია. 

„2025 წლის პირველ ნახევარში საშუალო ეკონომიკური ზრდა 8.3%-ს შეადგენს, აღსანიშნავია რომ ივნისის თვეში ეკონომიკურმა ზრდამ 6.3% შეადგინა. ეკონომიკური ზრდა საკმაოდ დივერსიფიცირებულია და სექტორების მიხედვით ზრდაში მაღალი წვლილი შეიტანა ინფორმაციისა და კომუნიკაციის, დამამუშავებელი მრეწველობის, განათლების, ტრანსპორტისა და დასაწყობების, საფინანსო და სადაზღვევო საქმიანობების სექტორებში ეკონომიკური აქტივობის ზრდამ", - აღნიშნა ვახტანგ ცინცაძემ.

ამასთან, მინისტრის მოადგილის ინფორმაციით, ზოგადად, ეკონომიკური ზრდის ხელშემწყობი იყო საგარეო ვაჭრობის კუთხით დაფიქსირებული პოზიტიური ტენდენციები, კერძოდ - ექსპორტის 10%-ზე მაღალი ზრდა დაფიქსირდა და მისმა მოცულობამ 640 მლნ აშშ დოლარი შეადგინა, რაც ივნისის თვეების რეკორდული მაჩვენებელია. ვახტანგ ცინცაძე ხაზს უსვამს, რომ ასევე რეკორდულია მეორე კვარტალში ტურიზმიდან მიღებული შემოსავლებიც - 1,145.0 მილიონი აშშ. დოლარი. 

ვახტანგ ცინცაძის შეფასებით, ეკონომიკური ზრდის არსებული შედეგების მიღწევა შესაძლებელი გახდა საქართველოს მთავრობის გონივრული და თანმიმდევრული მაკროეკონომიკური პოლიტიკის შედეგად, რომელიც გამოიხატება სხვადასხვა მიმართულებით, მათ შორის  მცირე და საშუალო მეწარმეობის მხარდამჭერი პროგრამების ეფექტიანობით და მნიშვნელოვანი ინფრასტრუქტურული პროექტების უწყვეტ რეჟიმში განხორციელებით. მინისტრის მოადგილე კიდევ ერთ ხელშემწყობ ფაქტორად სტრუქტურულ ეკონომიკურ რეფორმებს ასახელებს.   

„აღნიშნული პოზიტიური ტენდენციების ფონზე არაერთმა საერთაშორისო საფინანსო ინსტიტუტმა გადახედა საქართველოს ეკონომიკური ზრდის პროგნოზს ზრდის მიმართულებით. კერძოდ, სულ ახლახან საერთაშორისო სავალუტო ფონდმა საქართველოს ეკონომიკური ზრდის პროგნოზი 2025 წლისთვის 6%-დან 7.2%-მდე გაზარდა. ასევე ეროვნულმა ბანკმა მიმდინარე წლის ეკონომიკური ზრდის პროგნოზი 7.4%-მდე გაზარდა. ჩვენი მოლოდინია, რომ ეკონომიკური ზრდის არსებული პოზიტიური ტენდენციები შენარჩუნდება და გაძლიერდება წლის ბოლომდე და საქართველო შეძლებს 2025 წლის მაღალი ეკონომიკური ზრდით დახურვას", - განაცხადა ეკონომიკისა და მდგრადი განვითარების მინისტრის მოადგილემ.