Galt & Taggart-ის მიერ საქართველოს ეკონომიკურ ზრდის პრონგოზის გადახედვას გამოეხმაურა რადიო „სივრცის“ ეთერში გადაცემა Business Insider Georgia-ში სტუმრობისას Galt & Taggart-ის ეკონომისტი ლაშა ქავთარაძე.

მისი განმარტებით, 2025 წელს 7.5%-იანი ეკონომიკური ზრდა რეალისტურია. 

„დიდი ხანი არ გასულა, რაც ერთად გვქონდა ეკონომიკური შეხვედრა და მაშინ გავაჟღერე, რომ თუ ეკონომიკური აქტივობის ასეთი ტენდენცია გაგრძელდა, მაშინ პროგნოზის გადახედვა მოგვიწევდა და მართლაც ეს განხორციელდა. ეკონომიკური აქტივობა საკმაოდ ძლიერი იყო პირველ კვარტალში. საქსტატმა კვარტალურ მონაცემებზე დაყრდნობით გამოაქვეყნა პირველი კვარტლის ოფიციალური მონაცემები და ამის მიხედვით საქართველოს ეკონომიკა გაზრდილი არის 9.8% -ით. ეს არის ზრდის მიმართულებით გადახედვა იმიტომ, რომ წინასარი შეფასება იყო 9.3%. შემდგომ აპრილის და მაისის წინასწარი შეფასებები არის და ეს არის 7.5%-იანი ზრდა და სწორედ ეს გახდა საფუძველი იმისა, რომ ჩვენ ზრდის მიმართულებით გადაგვეხედა 2025 წლის ეკონომიკური ზრდის პროგნოზისთვის. 6.8% გქონდა მანამდე და ახლა უკვე ჩვენი პროგნოზით საქართველოს ეკონომიკა მიმდინარე წელს უნდა გაიზარდოს 7.5%-ით. ფაქტობრივად, რომ შევადაროთ სხვა ინსტიტუტებს, საერთაშორისო სავალუტო ფონდს აქვს ასევე მაღალი ეკონომიკური ზრდის  პროგნოზი - 7.2%. შევაფასოთ, რამ განაპირობა ეს ეკონომიკური აქტივობა. პირველი კვარტალის მონაცემებზე  დაყრდნობით ჩვენ სექტორულ ჭრილში შეგვიძლია შევხედოთ თუ რომელი სექტორები განსაზღვრავდა ამ ზრდას და ისევ რჩება დომინანტურ პოზიციაზე ის სექტორები, რომელიც 2024 წელს დომინირებდა. ეს არის  ინფორმაცია და კომუნიკაცია, განათლება, ტრანსპორტი, ვაჭრობა, საფინანსო სექტორი და ასე შემდეგ. განსაკუთრებით აღსანიშნავია მიმდინარე წლის პირველ კვარტალში იმ დარგების კიდევ უფრო გააქტიურება, რომელსაც საგადასახადო შეღავათები აქვთ და შესაბამისად ამიტომაც არის, რომ როდესაც ეკონომიკური ზრდა უფრო მაღალია და ეს საგადასახადო შემოსავლებში მეტ-ნაკლებად არ ჩანს. ეს განპირობებული არის იმით, რომ სწორედ იმ დარგებზე არის კონცენტრირებული ეკონომიკური აქტივობა, რომელსაც გარკვეული შეღავათები აქვთ. მაგალითად, ინფორმაცია და კომუნიკაციის დარგი. მაგალითად, კომპანია, რომელიც საქართველოში ოპერირებს საერთაშორისო კომპანიის სტატუსით, მას 20%-ის ნაცვლად აქვს 5%-იანი საშემოსავლო გადასახადი. შესაბამისად, ეს მათთვის სტიმულია და თუ შევხედავთ ეროვნული ბანკის მიერ გამოქვეყნებულ საგადასახდელო ბალანსს, იქ პირველ კვარტალში ინფორმაცია და კომუნიკაციიდან მიღებული შემოსავლები მნიშვნელოვნად არის გაზრდილი. მაგალითად, თუ შარშან პირველ კვარტალში 200 მილიონი შემოსავლები მიიღო ამ დარგმა,  წელს 300 მილიონი, ანუ 100 მილიონის ზრდა ეს საკმაოდ სოლიდურია. რაც შეეხება უფრო ანალიტიკური თვალსაზრისითაც, რომ შევხედოთ ჩვენ პირველი კვარტალის ეკონომიკური ზრდის მაჩვენებელს, მოხმარებასთან ერთად ჩვენ ვხედავთ, რომ  ინვესტიციები  არის საკმაოდ გააქტიურებული. 9,8%-ით, რომ გაიზარდა საქართველოს ეკონომიკა აქ ინვესტიციების კონტრიბუცია დაახლოებით 5.4% იყო. ეს პოზიტიურ სიგნალზე მიუთითებს და ზოგადად ინვესტიციები, როდესაც იზრდება, ინვესტიციების ზრდა დაკავშირებულია ქვეყნის პოტენციურ დონესთან. როდესაც ვსაუბრობთ და ვადარებთ პოსტ პანდემიურ პერიოდს პანდემიამდე პერიოდს, ჩვენ ვხედავთ რომ გაზრდილი არის საქართველოს ეკონომიკური ზრდის პოტენციური დონე და ასევე პროდუქტიულობის ზრდის ტემპი და პირველ კვარტალში ეს კარგად გამოჩნდა.  უფრო თუ ვფოკუსირდებით სამუშაო ძალის პროდუქტიულობაზე მაგალითად, პირველ კვარტალში სამუშაო ძალის  პროდუქტიულობის ზრდის ტემპმა 2021 წლის პირველი კვარტლის შემდეგ პირველად გადააჭარბა რეალური ხელფასის ზრდის ტემპს. ეს პოიზტიური სიგნალი არის, რაც აისახა ეკონომიკურ მაჩვენებლებში. ის პროგნოზი, რაც ჩვენ გადავხედეთ, ანუ ზრდის მიმართულებით ვფიქრობთ, რომ საკმაოდ რეალისტურია და ასე ვთქვათ პირველი ნახევარი ჯერჯერობით არ არის ცნობილი, თუმცა გვაქვს წინასარი მონაცემები ივნისთან დაკავშირებით და ვფიქრობთ, რომ ივნისში უფრო უკეთესი ეკონომიკური ზრდა გვექნება, ვიდრე აპრილში გვქონდა“ - აღნიშნა ლაშა ქავთარაძემ.

მისივე თქმით, ეკონომიკური ზრდის ბევრი ფუნდამენტური ფაქტორია.

„ჩვენ ვუყურებთ სავალუტო შემოდინებებს და სავალუტო შემოდინებების რიცხვი პირველ ნახევარში საკმაოდ სოლიდური იყო. თუ დავაჯამებთ, ავიღებთ ექსპორტს, ავიღებთ ტურიზმს, ავიღებთ ფულად გზავნილებს, დაახლოებით 7 მილიარდი დოლარის შემოსავალი მიიღო ქვეყანამ პირველ ნახევარში და ეს წინა წლის ანალოგიურ პერიოდთან შედარებით 600 მილიონით არის გაზრდილი. სწორედ ეს 600 მილიონი არის, რომელიც ეკონომიკურ ზრდაზეც პოზიტიურად მოქმედებს და ასევე გაცვლით  კურსზეც.  ტურიზმს თუ დავაკვირდებით,  ტურიზმში საკმაოდ ძლიერი იყო მეორე კვარტალი“, - განმარტავს ქავთარაძე.