გრძელვადიან პერიოდში ალბათ დიდი გამოწვევა იქნება ხელოვნური ინტელექტი და დასაქმება - ლაშა ქავთარაძე
ბევრი კომპანია ხელოვნურ ინტელექტს ნერგავს, რაც იმას ნიშნავს, რომ პროდუქტიულობა იზრდება, - ამბობს რადიო „სივრცის“ ეთერში გადაცემა Business Insider Georgia-ში სტუმრობისას Galt & Taggart-ის ეკონომისტი ლაშა ქავთარაძე. მისივე თქმით, გარკვეულ დარგებში სამუშაო ძალის მისაზიდად ხელფასების ზრდა უწევთ. მისი აზრით, გრძელვადიან პერსპექტივაში ხელოვნური ინტელექტი და დასაქმება მნიშვნელოვან გამოწვევად დარჩება.
მისივე განმარტებით, მაკროდონეზე სამუშაო ძალის პრობლემა არ შეიმჩნევა, საკმარისია. თუმცა მიკროდონეზე, გარკვეულ სექტორებში, გვხვდება შემთხვევები, როდესაც მოთხოვნა მაღალია, ხოლო მიწოდება დაბალი.
„შესაბამისად, შემდგომ უხდებათ ის, რომ არ ჩერდება ხელფასების ზრდის ტემპი. სწორედ ერთ-ერთი განმაპირობებელი ეს არის, რომ ზოგიერთ დარგში მაგალითად სტუმარ-მასპინძლობის დარგში არის დიდი მოთხოვნა, ასევე სამშენებლო სექტორში დიდი მოთხოვნაა სამუშაო ძალაზე. დეფიციტი არის შესაბამისად მათ, რომ მიიზიდონ სამუშაო ძალა უწევთ ხელფასების ზრდის ტემპი ყოველწლიურად ჰქონდეთ მაღალი. ჩვენ ვფიქრობთ, რომ ეს გაგრძელდება მომდევნო პერიოდებში, თუმცა არიან დარგები სადაც სამუშაო ძალა შეიძლება არ დასჭირდეთ იმდენი რამდენიც დღეს არის. ხელოვნური ინტელექტით იქნება განპირობებული. ბევრი კომპანია ხელოვნურ ინტელექტს ნერგავს რაც იმას ნიშნავს, რომ პროდუქტიულობა უფრო და უფრო იზრდება. ინფორმაციისა და კომუნიკაციების დარგი ავიღოთ, შესაძლოა აქ დასაქმება შემცირდეს, მაგრამ მისი გამოშვება გაიზრდება იმიტომ რომ ხელოვნური ინტელექტის დიდი ინტენსივობით დანერგვა ხდება ეს იქნება პროგრამირების კუთხით და ასე შემდეგ და ამაზე არის მოთხოვნა დღეს. უცხოეთიდან არის დიდი დაკვეთები და სწორედ ამ დაკვეთების ფონზე უწევს ამ დარგს, რომ გაზარდონ პროდუქტიულობა და რაც შეიძლება დიდი დოზით შემოიყვანონ ხელოვნური ინტელექტი. ვფიქრობთ, რომ გრძელვადიან პერიოდში ალბათ დიდი გამოწვევა იქნება ხელოვნური ინტელექტი და დასაქმება. ანუ ეკონომიკური ზრდა შესაძლოა იყოს მაღალი ბევრ ქვეყანას შეარჩუნებული, თუმცა სამუშაო ძალაზე მოთხოვნა არ იქნება დიდი. ეს დილემა შეიძლება შეგვექმნას“, - განმარტავს ლაშა ქავთარაძე.
აღნიშნულ თემაზე საურისას ქავთარაძემ ასევე აღნიშნა, რომ აქ ძირითადი განმსაზღვრელი იქნება განათლების სისტემა, ესა თუ ის დარგი რამდენად კვალიფიციურ კადრებს გამოუშვებს, რადგანაც ამ კვალიფიციურმა ხალხმა შემდეგ უნდა აითვისონ ხელოვნური ინტელექტი
„ერთ-ერთი მნიშვნელოვანი ფუნდამენტური საკითხი ეს არის, რომელიც რა თქმა უნდა შემდგომ განსაზღვრავს ჩვენს პოტენციურ დონესაც, ანუ პოტენციური დონე შეგვინარჩუნდება რაზეც ახლა შეფასებებს ვაკეთებთ, თუ შეიძლება ქვემოთ წამოვიდეს. ამისი ძირითადი განმსაზღვრელი იქნება სწორედ განათლების სისტემა. აი ეს დარგი რამდენად კვალიფიციურ კადრებს გამოუშვებს. იმიტომ, რომ ამ კვალიფიციურმა ხალხმა შემდეგ უნდა აითვისონ ხელოვნური ინტელექტი. თუ აქ იქნება დაბალი დონე, შესაბამისად ათვისებაც ვერ იქნება, ანუ აქ კონკურენციას ჩვენ დავკარგავთ სხვა ქვეყნებთან შედარებით ამიტომ არის, რომ ჩვენ გვჭირდება კვალიფიციური კადრები ყველა მიმართულებით, ჯერ-ჯერობით სანამ ხელოვნური ინტელექტი გარკვეულწილად გათანაბრდება. თუმცა ეს გრძელვადიანი პერსპექტივა არის“, - აცხადებს ქავთარაძე.
სხვა სიახლეები
ჩინეთს ცენტრალური ადგილი უკავია საქართველოსთვის, როგორც საექსპორტო ბაზარს - ის ძალიან მნიშვნელოვანი პარტნიორია, თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება | ირაკლი ნადარეიშვილი CGTN-თან ინტერვიუში
11.09.2026.18:29
„ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს - შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - ამის შესახებ ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა ჩინურ ტელეარხ CGTN-ისთვის (China Global Television Network) მიცემულ ინტერვიუში განაცხადა, სადაც საქართველოს ჩინეთის მომსახურებით ვაჭრობის საერთაშორისო გამოფენაში CIFTIS-ში მონაწილეობასა და ფორუმის მნიშვნელობაზე ისაუბრა.
ირაკლი ნადარეიშვილმა აღნიშნა, რომ CIFTIS-ში მონაწილეობა მნიშვნელოვანია არა მხოლოდ გამოცდილების გაზიარებისთვის, არამედ კონტაქტების დამყარებისა და ახალი პარტნიორობების ჩამოყალიბებისთვისაც.
„მოუთმენლად ველოდებით, რომ ქართული ბიზნესი და კერძო სექტორი ახალ პარტნიორებს შეხვდება. მაგალითად, IT და ტექნოლოგიების სექტორს თუ ავიღებთ, ბოლო ხუთი წლის განმავლობაში ეს საქართველოსთვის ძალიან საინტერესო წარმატების ისტორიად იქცა, ვინაიდან თითქმის ნულოვანი ნიშნულიდან განვითარდა და დღეს საქართველოს მშპ-ის (GDP) თითქმის 10%-ს შეადგენს. ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს. შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - აღნიშნა ირაკლი ნადარეიშვილმა.
მინისტრის მოადგილემ CGTN-თან ინტერვიუში განმარტა, რომ საქართველო CIFTIS-ში მონაწილეობას პირველად იღებს. მანვე იმ შესაძლებლობებზე გაამახვილა ყურადღება, რომელსაც ეს პლატფორმა მონაწილე კომპანიებსა და ქვეყნებს სთავაზობს.
ირაკლი ნადარეიშვილმა ყურადღება გაამახვილა საქართველო-ჩინეთის ურთიერთობებზე და აღნიშნა, რომ ჩინეთს, როგორც საექსპორტო ბაზარს, საქართველოსთვის ცენტრალური ადგილი უკავია.
„უპირველეს ყოვლისა, ეს ერთ-ერთი უდიდესი ბაზარია, საქართველოს კი ნამდვილად სჭირდება ბაზრების დივერსიფიკაცია ერთი კონკრეტული რეგიონიდან უფრო ფართო გეოგრაფიაზე. ჩინეთი ძალიან მნიშვნელოვანი პარტნიორია. თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება. როდესაც CIFTIS-სა და მომსახურების სექტორზე ვსაუბრობთ, ვფიქრობ, ეს ჩვენს ორმხრივ თანამშრომლობას კიდევ ერთ ახალ განზომილებას შემატებს, რათა ანალოგიურად ვიმუშაოთ მომსახურების სფეროს განვითარებაზე, ექსპორტსა და ინვესტიციებზე. სწორედ ამის მიღწევას ველით ამ ღონისძიებიდან და ზოგადად, ჩვენი ორმხრივი ურთიერთობების დღის წესრიგიდან", - განაცხადა ირაკლი ნადარეიშვილმა ჩინურ ტელეარხთან საუბრისას.
