კონკურენციის ზრდამ დაბალი ტარიფებიც მოიტანა, რაც კიდევ უფრო ხელმისაწვდომს ხდის ფრენას როგორც ქართველებისთვის, ისე უცხოელი ვიზიტორებისთვის, - აცხადებს საქართველოს აეროპორტების გაერთიანების გენერალური დირექტორი ლევან მოსეშვილი.

მისი თქმით, ეს ფაქტორი ერთ-ერთ მთავარ მიზეზად შეიძლება ჩაითვალოს იმისა, რომ 2025 წლის პირველი ცხრა თვე მგზავრთნაკადისა და რეისების კუთხით რეკორდული აღმოჩნდა.

„თბილისთან ერთად განსაკუთრებული ზრდა ქუთაისისა და ბათუმის აეროპორტებშიც ფიქსირდება. ორივე მათგანში მიმდინარეობს მსხვილი ინფრასტრუქტურული პროექტები, რაც საშუალებას მისცემს აეროპორტებს ახალ ავიაკომპანიებთან თანამშრომლობა კიდევ უფრო გააფართოონ. საერთო ჯამში, ევროპული გადამზიდავების გააქტიურება ზრდის საქართველოს საერთაშორისო მიმზიდველობას, ავითარებს ტურიზმს და ქმნის ბაზრის უფრო კონკურენტულ და დივერსიფიცირებულ გარემოს.
მომავალ კვირას საქართველოს აეროპორტების გაერთიანების ორგანიზებით თბილისში გაიმართება საერთაშორისო სამოქალაქო ავიაციის ორგანიზაციის,  ICAO-ს რეგიონული ვორქშოფი — “ICAO EUR/NAT Workshop on Pavement Rating System”, რომელიც 11–12 ნოემბერს გაიმართება სასტუმრო „Paragraph“-ში. ვორქშოფი სრულად ეძღვნება აეროპორტების ხელოვნური საფარის მდგომარეობის შეფასებისა და კლასიფიკაციის ახალ სისტემას. მისი მიზანია აეროპორტების ინჟინრებისა და ტექნიკური სპეციალისტების გადამზადება საერთაშორისო სტანდარტების შესაბამისად. როგორ უნდა შეფასდეს ასაფრენ-დასაფრენი ზოლების, სამიმოსვლო ბილიკისა და თვითმფრინავების სადგომის საფარის მდგომარეობა და როგორ უნდა დაინერგოს ეს შეფასების მეთოდოლოგიები პრაქტიკაში. ICAO-ს ეს ინიციატივა მიმართულია იმისკენ, რომ აეროდრომების ინფრასტრუქტურა იყოს უფრო უსაფრთხო, გამძლე და საოპერაციოდ ეფექტური, ხოლო წევრმა სახელმწიფოებმა შეძლონ ახალი მოთხოვნების სწორად დანერგვა. ჩვენთვის, როგორც ქვეყნისთვის, რომელიც აქტიურად ახორციელებს ინფრასტრუქტურულ პროექტებს ქუთაისში, ბათუმსა და თბილისში მსგავსი ტიპის ტექნიკური თანამშრომლობა განსაკუთრებით მნიშვნელოვანია. ეს ნიშნავს, რომ საქართველო სრულად ემთხვევა საერთაშორისო სტანდარტებს და მუდმივად თანამედროვე და ახლებური ხედვით განაგრძობს აეროპორტების განვითარებას“, - ამბობს ლევან მოსეშვილი.