ლარი არის საკმაოდ მყარი და მიმზიდველი ინვესტორებისთვის - ლაშა ხუციშვილი
ბოლო პერიოდში საკმაოდ იზრდება არარეზიდენტების, უცხოური კომპანიების მონაწილეობა ქართულ, ფინანსთა სამინისტროს მიერ გამოშვებულ სახაზინო ობლიგაციებზე, - განაცხადა გადაცემაში „იმედი LIVE“ ფინანსთა მინისტრმა ლაშა ხუციშვილმა.
მან აღნიშნა, რომ ლარში დენომინირებული ფასიანი ქაღალდების გამოშვება ბევრი მიზეზის გამო საინტერესო მიმართულებაა.
„მათ შორის იმის გამო, რომ შედარებით ნაკლებრისკიანია, როდესაც ქვეყანა არ არის დამოკიდებული უცხოურ ვალუტაზე. ყველა ქვეყანა ცდილობს, რომ საკუთარი კაპიტალის ბაზარი განავითაროს. ამ მიმართულებითაც ჩვენ ვხედავთ, რომ ბოლო პერიოდში საკმაოდ იზრდება არარეზიდენტების, უცხოური კომპანიების მონაწილეობა ქართულ, ფინანსთა სამინისტროს მიერ გამოშვებულ სახაზინო ობლიგაციებზე.
როდესაც მიმდინარე გამოშვების ფარგლებში ჩვენ შეხვედრები გვქონდა ინვესტორებთან, მათ ძალიან დიდი ინტერესი გამოიჩინეს ადგილობრივ ბაზარზე ფასიანი ქაღალდების შესყიდვასთან დაკავშირებით. ჩვენ შევთანხმდით, რომ მათ მოვიწევთ საქართველოში, გვექნება ცალკე ფორმატში შეხვედრები და ვფიქრობ, რომ მიმდინარე წელს ჩვენ უკვე გვექნება ხელშესახები შედეგი იქიდან გამომდინარე, რომ ვაპირებთ უფრო დიდი აუქციონების გამართვას ქართულ ფასიან ქაღალდებთან მიმართებაში.
ვხედავთ, რომ ინტერესი არის ძალიან დიდი. ეს რამდენიმე ფაქტორით არის განპირობებული. საკმაოდ მდგრადია ის ფისკალური და მონეტარული პოლიტიკა, რომელსაც ეროვნული ბანკი ახორციელებს. ლარი არის საკმაოდ მყარი და მიმზიდველი ინვესტორებისთვის. ხოლო მეორეს მხრივ, გლობალურ ბაზრებზე საკმაოდ არასტაბილური მათ უბიძგებს, რომ სხვადასხვა ვალუტაში მოახდინონ თავიანთი თანხების ინვესტირება. ამ მიმართულებით ჩვენ გვექნება წარმატებული გამოშვებები უკვე მიმდინარე წელს”, - განაცხადა ლაშა ხუციშვილმა.
სხვა სიახლეები
ჩინეთს ცენტრალური ადგილი უკავია საქართველოსთვის, როგორც საექსპორტო ბაზარს - ის ძალიან მნიშვნელოვანი პარტნიორია, თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება | ირაკლი ნადარეიშვილი CGTN-თან ინტერვიუში
11.09.2026.18:29
„ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს - შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - ამის შესახებ ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა ჩინურ ტელეარხ CGTN-ისთვის (China Global Television Network) მიცემულ ინტერვიუში განაცხადა, სადაც საქართველოს ჩინეთის მომსახურებით ვაჭრობის საერთაშორისო გამოფენაში CIFTIS-ში მონაწილეობასა და ფორუმის მნიშვნელობაზე ისაუბრა.
ირაკლი ნადარეიშვილმა აღნიშნა, რომ CIFTIS-ში მონაწილეობა მნიშვნელოვანია არა მხოლოდ გამოცდილების გაზიარებისთვის, არამედ კონტაქტების დამყარებისა და ახალი პარტნიორობების ჩამოყალიბებისთვისაც.
„მოუთმენლად ველოდებით, რომ ქართული ბიზნესი და კერძო სექტორი ახალ პარტნიორებს შეხვდება. მაგალითად, IT და ტექნოლოგიების სექტორს თუ ავიღებთ, ბოლო ხუთი წლის განმავლობაში ეს საქართველოსთვის ძალიან საინტერესო წარმატების ისტორიად იქცა, ვინაიდან თითქმის ნულოვანი ნიშნულიდან განვითარდა და დღეს საქართველოს მშპ-ის (GDP) თითქმის 10%-ს შეადგენს. ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს. შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - აღნიშნა ირაკლი ნადარეიშვილმა.
მინისტრის მოადგილემ CGTN-თან ინტერვიუში განმარტა, რომ საქართველო CIFTIS-ში მონაწილეობას პირველად იღებს. მანვე იმ შესაძლებლობებზე გაამახვილა ყურადღება, რომელსაც ეს პლატფორმა მონაწილე კომპანიებსა და ქვეყნებს სთავაზობს.
ირაკლი ნადარეიშვილმა ყურადღება გაამახვილა საქართველო-ჩინეთის ურთიერთობებზე და აღნიშნა, რომ ჩინეთს, როგორც საექსპორტო ბაზარს, საქართველოსთვის ცენტრალური ადგილი უკავია.
„უპირველეს ყოვლისა, ეს ერთ-ერთი უდიდესი ბაზარია, საქართველოს კი ნამდვილად სჭირდება ბაზრების დივერსიფიკაცია ერთი კონკრეტული რეგიონიდან უფრო ფართო გეოგრაფიაზე. ჩინეთი ძალიან მნიშვნელოვანი პარტნიორია. თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება. როდესაც CIFTIS-სა და მომსახურების სექტორზე ვსაუბრობთ, ვფიქრობ, ეს ჩვენს ორმხრივ თანამშრომლობას კიდევ ერთ ახალ განზომილებას შემატებს, რათა ანალოგიურად ვიმუშაოთ მომსახურების სფეროს განვითარებაზე, ექსპორტსა და ინვესტიციებზე. სწორედ ამის მიღწევას ველით ამ ღონისძიებიდან და ზოგადად, ჩვენი ორმხრივი ურთიერთობების დღის წესრიგიდან", - განაცხადა ირაკლი ნადარეიშვილმა ჩინურ ტელეარხთან საუბრისას.
