საქართველოს ნახშირწყალბადების მოხმარება, ბენზინისა და დიზელის ჩათვლით, თითქმის სრულად იმპორტზეა დამოკიდებული. ამის შესახებ თიბისი კაპიტალის მიერ მომზადებულ პუბლიკაციაში „საქართველოს საწვავის საცალო ბაზრის მიმოხილვაშია“ აღნიშნული. 

კვლევის მიხედვით, 2024 წელს ქვეყანაში იმპორტირებული იყო 918 მილიონი ლიტრი ბენზინი (+7.6%, წ/წ) და 770 მილიონი ლიტრი დიზელი (+9.4%, წ/წ).

საქართველოს ავტოპარკის მზარდი ტენდენციის ფონზე მოსალოდნელია ბენზინისა და დიზელის იმპორტის ზრდა. 2025 წლის პირველ 9 თვეში ავტოპარკს 125.3 ათასი ავტომობილი დაემატა, რომლის 61% ბენზინს მოიხმარს, 21% ჰიბრიდული ძრავით, ხოლო 14%-ს დიზელის ძრავითაა.

„ამჟამად საქართველოს ავტოპარკი დაახლოებით 1.9 მილიონ ავტომობილს ითვლის, რომლის 64% ბენზინის ძრავითაა, 12% ჰიბრიდულძრავიანია, თუმცა ძირითად საწვავად ბენზინს მოიხმარს. ავტოპარკის 23%-ს აქვს დიზელის ძრავი.

2024 წელს საქართველოსთვის ბენზინის მთავარი მომწოდებლები ბულგარეთი (32%), რუსეთი (26%), და რუმინეთი (24%) იყვნენ. საექსპორტო შეზღუდვებისა და კვოტების შედეგად, საქართველოს იმპორტში რუსეთის წილი 2022-2023 წლების შემდეგ შედარებით შემცირდა.

2024 წელს საქართველოს დიზელის იმპორტის 74% რუსეთიდან, ხოლო 14% აზერბაიჯანიდან განხორციელდა.

2024 წელს, საცალო ბაზარზე საშუალო ფასი 1 ლიტრი ბენზინისთვის 3.1 ლარი, ხოლო დიზელისთვის 3.3 ლარი იყო.

ბაზრის 5 მთავარი მოთამაშის ამონაგები 2024 წელს 3.3 მილიარდ ლარს გაუტოლდა, რაც წლიურად 33%-იანი ზრდაა. ვისოლი რჩება ბაზრის უდიდეს მოთამაშედ და ბაზრის 26%-ს იკავებს. ამავე წელს, საერთო მოგების საშუალო მარჟა 10%-ის ტოლი იყო.

2024 წლის მონაცემებით, საქართველოში ავტოგასამართი სადგურების ნახევარზე მეტი, დაახლოებით 670 სადგური, ორგანიზებულ ბაზარზე ოპერირებს.

2025 წლის ოქტომბერში ამერიკის შეერთებული შტატების ხაზინამ დაასანქცირა Lukoil PJSC, საქართველოში მოქმედი კომპანიის, ლუკოილის, საბოლოო მაკონტროლებელი მხარე“, - განმარტავენ თიბისი კაპიტალში.