ივლისი საპენსიო ფონდის პორტფელებისათვის სტაბილური ზრდის თვე აღმოჩნდა. გლობალური ბაზრების სისუსტისა და ლარის აშშ დოლართან მიმართებით გამყარების ტენდენციის ფონზე, რაც უცხოურ ვალუტაში დენომინირებული აქტივების შემოსავლიანობას ამცირებს, ივლისის თვის პოზიტიური დინამიკა ძირითადად ადგილობრივ ვალუტაში დენომინირებული აქტივების მაღალ და სტაბილურ ამონაგებს უკავშირდება.

ივლისის თვეში, ყველაზე მაღალი - 0.62%-იანი - ზრდა კონსერვატიულმა პორტფელმა აჩვენა, ხოლო დაბალანსებული და დინამიკური პორტფელები შესაბამისად 0.51% და 0.20%-ით გაიზარდნენ. ამასთან, აღსანიშნავია, რომ ივლისში სამომხმარებლო ფასების ინდექსის კლებამ 0.17% შეადგინა, რაც პორტფელების რეალურ ამონაგებზე დადებითად აისახა.

მიუხედავად იმისა, რომ თვე დინამიკური პორტფელისთვის შედარებით სუსტი აღმოჩნდა, წლის დასაწყისიდან დღემდე შემოსავლიანობის კუთხით აღნიშნული პორტფელი ლიდერობს. თუმცა, შემოსავლიანობა სამივე პორტფელში საკმაოდ მაღალ ნიშნულზე ნარჩუნდება:

• კონსერვატიული – 6.00%
• დაბალანსებული – 6.50%
• დინამიკური – 7.08%

აღსანიშნავია, რომ დინამიკური პორტფელი გრძელვადიანი შემოსავლიანობის კუთხითაც ლიდერობს - პორტფელების შექმნიდან (2023 წლის 6 აგვისტო) დღემდე მისი გაწლიურებული ამონაგები 13.3%-ია, ხოლო დაბალანსებული და კონსერვატიული პორტფელებისათვის შესაბამისი მაჩვენებლები 12.5% და 11.5%-ს შეადგენენ.

საქართველოს საპენსიო ფონდის აქტივებმა ივლისის ბოლოსთვის 7.2 მილიარდ ლარს, ხოლო დაგენერირებულმა ამონაგებმა – 1.8 მილიარდ ლარს გადააჭარბა.

ფონდის აქტივების, საინვესტიციო პორტფელების განაწილებისა და შედეგების დეტალური მიმოხილვისთვის, გთხოვთ ეწვიოთ ჩვენს ინტერაქტიულ ანგარიშებს. ვრცლად ანგარიშები შეგიძლიათ იხილოთ ბმულზე.