თბილისის პირველ ფინანსურ სამიტზე დასწრება ერთდროულად დროულიც იყო და შთამაგონებელიც. საქართველოს ამბიცია, გახდეს ნამდვილი ფინანსური ჰაბი ევროპისა და აზიის გზაჯვარედინზე, მისასალმებელია და სამიტმაც ხაზს გაუსვა, თუ რამდენად მნიშვნელოვანი ხდება რეგიონი ციფრული ფინანსური ტრანსფორმაციისთვის, - ამის შესახებ მსოფლიოს ერთ-ერთი უმსხვილესი კომპანიის Ant International-ის უფროსმა ვიცე პრეზიდენტმა ლეიმინგ ჩენმა განაცხადა.

მისივე თქმით, სამიტმა გაამყარა მოსაზრება, რომ ფინტექის შემდეგი დიდი ისტორია დაიწერება ისეთ ადგილებში, როგორიცაა თბილისი.

„Ant International-ის მსგავს მონაწილეებთან თანამშრომლობით კი მოხდება ეკოსისტემის განვითარება. მოუთმენლად ველი სამიტზე მოსმენილი იდეების ქმედებად გადაქცევას და საქართველოსა და მისი რეგიონული კავშირების გამოყენებას ფინანსური ტრანსფორმაციისა და ინოვაციის შემდეგი ტალღისთვის“, - ამბობს ლეიმინგ ჩენი.

ოქტომბრის ბოლოს საქართველოს დედაქალაქში გამართული „თბილისის ფინანსური სამიტი“ მსოფლიო ფინანსური და ტექნოლოგიური სექტორის წარმომადგენლების შეხვედრის პლატფორმად იქცა. ღონისძიებაში მონაწილეობა მიიღეს სხვადასხვა ქვეყნის ცენტრალური ბანკების ხელმძღვანელებმა, მსხვილი საერთაშორისო კომპანიების ტოპ-მენეჯერებმა და ფინტექ ინდუსტრიის წამყვანმა ექსპერტებმა.

სამიტი საქართველოს ეროვნული ბანკის, ეკონომიკისა და მდგრადი განვითარების სამინისტროსა და სინგაპურის გლობალური ფინანსური და ტექნოლოგიური ქსელის (GFTN) ორგანიზებული იყო და მასში 50-ზე მეტი ქვეყნის 1000-ზე მეტი დელეგატი მონაწილეობდა.