„ინფრასტრუქტურის მიმართულებით, ჩვენ საკმაოდ მძიმე მემკვიდრეობა გვერგო - ძალიან ბევრი სპორტული მოედანი და დარბაზი ან გასხვისებული იყო ან, პრაქტიკულად, ჩამოშლის პირას“, - ამის შესახებ დღეს კულტურის, განათლების, სპორტისა და ახალგაზრდობის პოლიტიკის მიმართულებით ბოლო წლების პროექტების პრეზენტაციისას, თბილისის მერის მოადგილე ანდრია ბასილაიამ აღნიშნა.

მან განხორციელებულ და მიმდინარე ინფრასტრუქტურულ პროექტებზე გაამახვილა ყურადღება.

„განხორციელდა 500-ზე მეტი ღია სპორტული მოედნის რეაბილიტაცია, რაშიც აქტიურად მონაწილეობდა, როგორც საქალაქო სამსახური, ისე რაიონული გამგეობები; 12 ცენტრს ჩაუტარდა სრული რეაბილიტაცია; 11 სპორტულ ობიექტს სრულად განუახლდა ეკიპირება და ინვენტარი. ასევე, აქტიურად მიმდინარეობს ღია ფიტნეს ზონების, სატრენაჟორო სივრცეების მოწყობა და ეს მიმართულება სულ უფრო მოთხოვნადი ხდება. ჩვენ გავაგრძელებთ შესაბამისი ზონების მოწყობას მოქალაქეებისთვის“, - განაცხადა ანდრია ბასილაიამ.

მისი თქმით, პარალელურად, აშენდა ახალი სპორტული ობიექტები, მათ შორის ისეთ რაიონებში, სადაც სპორტული ცენტრები მანამდე არასდროს ყოფილა.

„მნიშვნელოვანია, რომ ბევრ რაიონში არასდროს ყოფილა მსგავსი ინფრასტრუქტურა და ვცდილობთ, შევიდეთ იქ, სადაც ყველაზე დიდი მოთხოვნაა ამ მიმართულებით. ცოტა ხნის წინ ჩვენ გავხსენით დიდი დიღმის მულტიფუნქციური საზოგადოებრივი ცენტრი, რომელიც ჩვენს დედაქალაქში პირველი მულტიფუნქციური ცენტრია. ასეთი ცენტრების მიზანია, რომ ყველა რაიონში გაჩნდეს შესაბამისი სპორტული ინფრასტრუქტურა, კერძოდ, საცურაო აუზები, მოედნები, სატრენაჟორო სივრცეები. ასეთ ცენტრებში, ასევე, ფუნქციონირებს მედიათეკა და სხვადასხვა კულტურული წრე“, - აღნიშნა ანდრია ბასილაიამ.

მან ასევე გამოყო ნაძალადევის სპორტული კომპლექსი და სპორტული ცენტრი ლადო ასათიანის ქუჩაზე, სადაც კალათბურთის ისტორიული დარბაზი ფუნქციონირებდა და იგი, პრაქტიკულად, ნანგრევებად იყო ქცეული.

ანდრია ბასილაიას თქმით, ფაქტობრივად, ეს დარბაზი თავიდან აშენდა და მას თავისი ისტორიული ფუნქციაც დაუბრუნდა.

ასევე, აშენდა სპორტული ცენტრი დაბა წყნეთში და ლილოს დასახლებაში არსებული სპორტული ცენტრის ტერიტორიაზე მოეწყო საცურაო აუზი.

როგორც თბილისის მერის მოადგილემ განაცხადა, ინფრასტრუქტურული პროექტები აქტიურად ხორციელდება კულტურის სფეროშიც. სრული რეაბილიტაცია ჩაუტარდა ილია ჭავჭავაძის ლიტერატურულ-მემორიალურ მუზეუმს, რომელიც „თბილისის განვითარების ფონდმა“ განახორციელა. ასევე, სრულად განახლდა გალაკტიონის მუზეუმი და სრულდება მერაბ კოსტავას სახლ-მუზეუმის რეაბილიტაცია.

გრძელდება სახელოვნებო სკოლების, მედიათეკებისა და ბიბლიოთეკების რეაბილიტაცია და მათი ტრანსფორმირება მულტიფუნქციურ მედიათეკებში. ასევე, რეაბილიტირდა სამგორის მოსწავლე-ახალგაზრდობის სახლი, მულტიფუნქციურ სივრცედ გარდაიქმნა ხუთი ბიბლიოთეკა, ზღვის უბანში გაიხსნა მედიათეკა, რეაბილიტირდა და აღიჭურვა ელენე ახვლედიანის სახელობის ბავშვთა სურათების გალერეაც.

„სექტემბერში გაიხსნება უკვე განახლებული ახალგაზრდობის ეროვნული სასახლე, რომელიც მნიშვნელოვანი ისტორიული ძეგლია ჩვენი დედაქალაქისთვის და განხორციელდა ძალიან რთული და მნიშვნელოვანი პროექტი. შესაბამისად, სექტემბერში გვექნება შესაძლებლობა ვიხილოთ, თუ რა მასშატაბის სამუშაოები ჩატარდა ეროვნულ სასახლეში“, - განაცხადა თბილისის მერის მოადგილემ.

რაც შეხება მიმდინარე ინფრასტრუქტურულ პროექტებს, როგორც ანდრია ბასილაიამ აღნიშნა, ძალიან ბევრ მისამართზე აქტიურად მიმდინარეობს მუშაობა.

„ისანი-სამგორის კომპლექსური სპორტული ცენტრის ტერიტორიაზე შენდება ბევრი ღია სპორტული მოედანი პადელის, ფეხბურთისა და კალათბურთისთვის. ასევე, სექტემბერში გავხსნით კიდევ ერთ მრავალფუნქციურ სპორტულ ცენტრს ვარკეთილში, რომელიც 10 000-ზე მეტ მომხმარებელს მოემსახურება. გარდა ამისა, სოფელ დიდ ლილოში, სადაც არასდროს ყოფილა მსგავსი ინფრასტრუქტურა, შენდება სპორტული კომპლექსი. ტაბახმელაში სრულდება ღია მოედნების კომპლექსის რეაბილიტაცია“, - განაცხადა ანდრია ბასიალაიამ.

მისი თქმით, მიმდინარეობს ილია ჭავჭავაძის სახლის აღდგენა-რესტავრაციაც, ხოლო სათამაშოებისა და თოჯინების მუზეუმისთვის გამოიყო შესაბამისი სივრცე.

„ეს ერთ-ერთი მნიშვნელოვანი მუზეუმია და, სამწუხაროდ, ათეულობით წელია მისი კოლექცია საცავშია ჩაკეტილი. მოხერხდა შესაბამისი სივრცის გამოყოფა და აღნიშნული პროექტის განხორციელება წელსვე დაიწყება“, - განაცხადა ანდრია ბასილაიამ.