ახალგაზრდების სიყვარული ქვეყნისა და ქალაქისადმი გვაძლევს იმედს, რომ თბილისი ნამდვილად იქნება ცოცხალი, თანამედროვე და განახლებაზე ორიენტირებული ქალაქი - კახა კალაძე
თქვენი ენერგია და იდეები ჩვენი ქალაქის მთავარი მამოძრავებელი ძალაა, - ასე მიმართა ახალგაზრდებს თბილისის მერმა, პარტია „ქართული ოცნება-დემოკრატიული საქართველოს“ თბილისის მერობის კანდიდატმა კახა კალაძემ.
როგორც მან სიტყვით გამოსვლისას აღნიშნა, მომავალშიც ახალგაზრდული ძალა ქალაქის კიდევ უფრო განვითარებისკენ იქნება მიმართული.
„თბილისი შესაძლებლობების ქალაქია, ამის გარანტი კი ხართ თქვენ, ახალგაზრდები, მომავალი თაობა - ჩვენი ხვალინდელი დღის საყრდენი და იმედი. მე თითქმის ყოველდღიური შეხება მაქვს ახალგაზრდობასთან, რომელთა ენერგია და იდეები ჩვენი ქალაქის მთავარი მამოძრავებელი ძალაა. გაძლევთ პირობას, ამ ძალას მომავალშიც გამოვიყენებთ მეტი განვითარებისთვის, შენებისთვის. ეს არ გულისხმობს მხოლოდ ქალაქის განვითარებას – ესაა პასუხისმგებლობის გაზიარება, იდეების გაცვლა და ერთობლივი შრომა უკეთესი თბილისისთვის. ჩემო ახალგაზრდა მეგობრებო, თქვენი სიყვარული ქვეყნისა და ქალაქისადმი გვაძლევს იმედს, რომ თბილისი ნამდვილად იქნება ცოცხალი, თანამედროვე და განახლებაზე ორიენტირებული ქალაქი“, - განაცხადა კახა კალაძემ.
მანვე განმარტა, რომ მასზე დაკისრებული პასუხისმგებლობის ტარება შეუძლებელი იქნებოდა რიგითი თბილისელების, თბილისის მერიის თანამშრომლებისა და ძლიერი პოლიტიკური გუნდის - „ქართული ოცნების“ გარეშე.
„რასაკვირველია, ამხელა ტვირთს საკუთარ თავზე ვერ ავიღებდი, რომ არ მქონდეს თქვენი, თბილისელების დიდი მხარდაჭერა. რომ არ იდგეს ჩემს ზურგს უკან ძლიერი პოლიტიკური გუნდი - „ქართული ოცნება - დემოკრატიული საქართველო“, რომელსაც გამორჩეული წვლილი აქვს შეტანილი აქვს ქართული სახელმწიფოს განვითარებაში, ჩვენი ქვეყნის ნათელი მომავლის განმტკიცებაში. რთული იქნებოდა დედაქალაქში არსებული გამოწვევების დაძლევა, რომ არა თბილისის მერიის გამოცდილ, პროფესიონალ თანამშრომელთა უზარმაზარი არმია. მინდა, ვისარგებლო შემთხვევით და მუნიციპალიტეტის თითოეულ თანამშრომელს მადლობა გადავუხადო იმისთვის, რომ 24-საათიან რეჟიმში ვართ ქალაქის, თბილისელების სამსახურში. აქვე მინდა, ვისარგებლო შემთხვევით და მადლობა გადავუყხადო ჩემს ოჯახს - ჩემს მეუღლეს და ჩემს უფროს ვაჟს, ლევანს, მხარდაჭერისა და თანადგომისთვის“, - აღნიშნა კახა კალაძემ.
მისივე თქმით, მიუხედავად ბევრი მიღწევისა და წინსვლისა, ქალაქის კიდევ უფრო განვითარება თანმიმდევრული ხედვითა და გეგმითაა შესაძლებელი.
„სიამაყით შემიძლია ვთქვა, რომ სიძველის მიუხედავად, დღეს თბილისი საოცრად თანამედროვე ქალაქია, თავისი პარკებით, სკვერებით, კულტურული სივრცეებით, სპორტული მოედნებით, მოდერნიზებული ქუჩებით, ახალი საზოგადოებრივი ტრანსპორტით. მაგრამ თბილისი კიდევ უფრო უნდა განვითარდეს - უნდა განვითარდეს სწორად, თანმიმდევრულად, სწორი და ზუსტი ხედვითა და გეგმით“, - განაცხადა კახა კალაძემ.
სხვა სიახლეები
ქვეშეთი–კობის გზაზე თაღოვანი ხიდის თაღის მშენებლობა დასრულდა
17.11.2026.11:03
ქვეშეთი–კობის ახალი გზის მშენებლობის ფარგლებში, ხადის ხეობაში, თაღოვანი ხიდის ორი ნაწილი შეერთდა და 300 მეტრი სიგრძის თაღის მშენებლობა დასრულდა. ხიდის საერთო სიგრძე 437 მეტრი იქნება, ხოლო სიმაღლე ხეობის ფსკერიდან — 166 მეტრი. ამ მასშტაბის თაღოვან ხიდს საქართველოში ანალოგი არ აქვს.
მშენებლობის მომდევნო ეტაპზე თაღზე ხიდის ბურჯები მოეწყობა, შემდეგ კი აშენდება მალის ნაშენი — კონსტრუქცია, რომელზეც საავტომობილო გზა გაივლის.
თაღოვანი ხიდი ქვეშეთი–კობის 23-კილომეტრიანი ახალი გზის ერთ-ერთი ყველაზე რთული საინჟინრო ნაგებობაა. პროექტს საქართველოს ინფრასტრუქტურის სამინისტროს საავტომობილო გზების დეპარტამენტი ახორციელებს. პროექტის ფარგლებში შენდება ორზოლიანი ასფალტბეტონის გზა, ხუთი ახალი ხიდი და ხუთი გვირაბი. რეაბილიტაცია უტარდება ერთ არსებულ ხიდსაც. ხუთი ახალი ხიდიდან ერთის მშენებლობა დასრულებულია, ოთხზე კი სამუშაოები გრძელდება.
დასრულებულია ჯვრის უღელტეხილის ქვეშ გამავალი 9-კილომეტრიანი ძირითადი გვირაბისა და მის პარალელურად მდებარე, იმავე სიგრძის საევაკუაციო გვირაბის გაჭრა. ძირითად გვირაბში დასრულებულია სავენტილაციო ფილების დამზადება, საევაკუაციო გვირაბში კი — რკინაბეტონით მოპირკეთება. ამ ეტაპზე ელექტრომექანიკური სისტემების მოწყობა მიმდინარეობს.
ახალი გზა დუშეთისა და ყაზბეგის მუნიციპალიტეტებს დააკავშირებს. ის ქვეშეთიდან ხადის ხეობის გავლით სოფელ კობამდე მივა და სტეფანწმინდისკენ მიმავალ არსებულ გზას შეუერთდება. ახალი მარშრუტი შეამცირებს დიდთოვლობისა და ზვავსაშიშროების გავლენას გადაადგილებაზე და ხადის ხეობის სოფლების მოსახლეობას მთელი წლის განმავლობაში საჭირო მომსახურებებზე უფრო საიმედო წვდომას შეუქმნის.
გზის ამოქმედების შემდეგ სატრანზიტო მოძრაობა, მათ შორის სატვირთო მიმოსვლა, გუდაურის საკურორტო ზონას გვერდს აუვლის, რაც კურორტზე მოძრაობის დატვირთვასა და ხმაურს შეამცირებს. პროექტის ფარგლებში შენდება გუდაურამდე მისასვლელი ახალი, 5-კილომეტრიანი გზაც.
ქვეშეთი–კობის ახალი გზა ჩრდილოეთ–სამხრეთის სატრანსპორტო დერეფნისა და ევროპული საერთაშორისო მარშრუტის - E117-ის, ნაწილია. პროექტი სახელმწიფო ბიუჯეტის, აზიის განვითარების ბანკისა (ADB), ევროპის რეკონსტრუქციისა და განვითარების ბანკის (EBRD) და სახელმწიფო ბიუჯეტის თანადაფინანსებით ხორციელდება. მისი საერთო ღირებულება 1,2 მილიარდი ლარია.