თბილისის მერმა კახა კალაძემ კულტურის, განათლების, სპორტისა და ახალგაზრდობის პოლიტიკის მიმართულებით მიმდინარე და დასრულებულ პროექტებზე ისაუბრა. 

მისივე თქმით, ქვეყანაში ერთ-ერთი გამოწვევის - დასაქმების აღმოსაფხვრელად მუნიციპალიტეტის მერიის მიერ 2018 წლიდან დაწყებული პროგრამა „ისწავლე და დასაქმდი“ მნიშვნელოვან როლს ასრულებს.

„ბოლო წლების განმავლობაში იმ პოლიტიკით, რასაც „ქართული ოცნება“ ახორციელებს, უამრავი სამუშაო ადგილი შეიქმნა, თუმცა ერთ-ერთ მნიშვნელოვან გამოწვევად მაინც რჩება დასაქმება. ბიზნესი ეძებს კვალიფიციურ სპეციალისტებს. შესაბამისად, აღნიშნული პროგრამა გვაძლევს ცოდნას, რა სფეროებში სჭირდება ბიზნესს ძლიერი კადრები და ზუსტად ამ მიმართულებით ვაძლევთ ახალგაზრდებს შესაძლებლობას, რომ პროფესიულ საქმიანობაში განვითარდნენ და დასაქმდნენ. დასაქმების 75%-იანი მაჩვენებელი გვაქვს. მომდევნო წლებში კიდევ უფრო გაიზრდება ეს შესაძლებლობა“, - განაცხადა კახა კალაძემ.

დედაქალაქის მერის მოადგილე ანდრია ბასილაიას განმარტებით კი, განათლების და ახალგაზრდობის მიმართულებით 900-მდე პროექტი დაფინანსდა. 

„განათლების მიმართულებით არსებული პროექტები მიმართულია იმ საჭიროებებზე, რაც დედაქალაქში არსებობს. ჯამში, ნახევარმა მილიონმა ბენეფიციარმა ისარგებლა აღნიშნული პროგრამით. პრიორიტეტულია სწავლის დაფინანსება. მიგვაჩნია, რომ ყველას, ვისაც აქვს სწავლის სურვილი, ამის შესაძლებლობა უნდა მიეცეს. ამიტომ, არსებობს პროგრამა, რომლის ფარგლებშიც, სწავლა დაუფინანსდა 19 000-მდე სოციალურად დაუცველ სტუდენტს. ბოლო წლებში დაემატა მრავალშვილიანი და შშმ სტუდენტების სწავლის დაფინანსების კომპონენტი. უკვე 4 000-მდე სტუდენტმა ისარგებლა ამ შესაძლებლობით. ასევე, ვახალისებთ წარჩინებულ სტუდენტებს. ამისთვის შევიმუშავეთ წარჩინებული მაგისტრანტების სტიპენდია, რაც მუნიციპალიტეტის სახელით გაიცემა. 5 000-მდე მაგისტრანტმა ისარგებლა აღნიშნული პროგრამით“, - აღნიშნა ანდრია ბასილაიამ.

მისივე თქმით, ახალგაზრდობის ეროვნული სასახლე და მოსწავლე-ახალგაზრდობის სახლები მოსწავლეებს არაფორმალური განათლების მისაღებად მნიშვნელოვან შესაძლებლობას აძლევს.

„არაფორმალური განათლება მნიშვნელოვანი მიმართულებაა. მისი ერთ-ერთი კომპონენტია ახალგაზრდობის ეროვნული სასახლე. ყოველწლიურად 3 000-ზე მეტი მოსწავლეა ჩართული საგანმანათლებლო და შემოქმედებით საქმიანობაში 130-მდე მიმართულებით; მოსწავლე-ახალგაზრდობის სახლების ცხრა ფილიალში 4 000-მდე ახალგაზრდა ჩართულია საგანმანათლებლო, შემოქმედებით და სპორტულ წრეებში; მოქმედებს 34 მუსიკალური სკოლა, რომელიც იძლევა 15 მოთხოვნადი მუსიკალური პროფესიის დაუფლების შესაძლებლობას. ჯამში, 9 000-მდე ჩვენი მოქალაქე სარგებლობს ამ პროგრამით“, - განაცხადა ანდრია ბასილაიამ. 

მერის მოადგილის განცხადებით, მუნიციპალიტეტი აქტიურად მუშაობს იმაზე, რომ რაც შეიძლება ხელმისაწვდომი გახდეს კულტურული და განათლების სხვადასხვა პროგრამა.

„ინკლუზიური ხელოვნებისა და განათლების მიმართულებით აქტიურად ფინანსდება სხვადასხვა პროექტი. ჩვენთვის მნიშვნელოვანია, რომ რაც შეიძლება ხელმისაწვდომი იყოს სხვადასხვა კულტურული თუ განათლების კომპონენტი, მათთვის, ვისაც სჭირდებათ დამატებითი ხელშეწყობა“, - აღნიშნა ანდრია ბასილაიამ.