საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) საჯარო სხდომაზე „საქართველოს ზოგადი ადმინისტრაციული კოდექსის მე-3 თავის (ინფორმაციის თავისუფლება) მოთხოვნათა შესრულების შესახებ“ ანგარიში დაამტკიცა. ანგარიში მოიცავს სემეკში ინფორმაციის თავისუფლების უზრუნველყოფის, საჯარო ინფორმაციის ხელმისაწვდომობის, აგრეთვე საჯარო ინფორმაციის გაცემის ვალდებულების შესრულებისა და კოდექსში მითითებული ვადების დაცვის მდგომარეობას.

ანგარიშის მიხედვით, 2024 წლის 1 დეკემბრიდან 2025 წლის 1 დეკემბრამდე კომისიაში საჯარო ინფორმაციის გაცემის თაობაზე შემოვიდა 33 წერილობითი მოთხოვნა, აქედან სრულად დაკმაყოფილდა 22, ნაწილობრივ – 10 და არ დაკმაყოფილდა ერთი მოთხოვნა. ინფორმაციის გაცემის შესახებ მოთხოვნის ნაწილობრივ დაკმაყოფილება და უარის თქმა მის დაკმაყოფილებაზე გამოწვეული იყო მოთხოვნილი ინფორმაციის კომისიაში არარსებობით, კონფიდენციალურობით ან შესაბამისი სამართლებრივი საფუძვლის არარსებობით.

აღნიშნულ პერიოდში ჩატარდა კომისიის 58 სხდომა, რომლებზეც კომისიამ მიიღო 54 დადგენილება და 1257 გადაწყვეტილება, ხოლო ზეპირი მოსმენის გარეშე მიიღო 233 გადაწყვეტილება. კომისიის სხდომები საჯაროა, საანგარიშო პერიოდში სხდომის ნაწილის დახურვის თაობაზე გადაწყვეტილება მიღებული არ ყოფილა.

მოთხოვნის შემთხვევაში კომისია იღებს გადაწყვეტილებას ლიცენზიის მფლობელი კომპანიების მიერ წარმოდგენილი ინფორმაციის კომერციულ საიდუმლოებად ცნობის თაობაზე. სემეკი საჯარო ინფორმაციის გაცემაზე გადაწყვეტილების მიღებისას ხელმძღვანელობს საქართველოს კონსტიტუციითა და საქართველოს ზოგადი ადმინისტრაციული კოდექსით.

საჯარო ინფორმაცია სრულად გამოქვეყნებულია კომისიის ვებგვერდზე: www.gnerc.org და ხელმისაწვდომია ყველა დაინტერესებული პირისათვის.