Lineate Dev School-ის სტუდენტების პირველმა ნაკადმა სწავლა უკვე დაასრულა და სკოლა შემოდგომიდან ახალი ნაკადის მისაღებად ემზადება. Lineate Dev School-ი ეს არის Lineate Georgia-ს მიერ დაარსებული სასწავლო კურსი, რითაც კომპანია დამწყები დეველოპერების გადამზადებაზე და მათ დასაქმებაზე ზრუნავს. Lineate Dev School-ში სწავლა უფასოა, ხოლო სწავლის ხანგრძლივობა 3 თვეა.

რას სთავაზობს Lineate Dev School-ი სტუდენტებს და რატომ უნდა იყოს დამწყები დეველოპერი Lineate Dev School-ში სწავლით დაინტერესებული, Business Insider Georgia-ს ​Lineate Georgia-ს ბიზნეს-განვითარების მენეჯერი თორნიკე სულაბერიძე ესაუბრა.

Lineate Dev School-ი კომპანიის შიდა გადამზადების პროგრამაა, რომელშიც მონაწილეობა მიიღეს როგორც შიდა კადრებმა, ასევე უნივერსიტეტის სტუდენტებმა. აქვე უნდა გამოვყო, რომ ამ ნაკადში გვყავდა სკოლის მოსწავლეებიც, გამომდინარე იქიდან, რომ მათ ტესტირებებში და გასაუბრებებში საკმაოდ მაღალი ქულები მიიღეს. ამიტომ გადავწყვიტეთ, რომ ასაკობრივი ზღვარი არ გვქონოდა. პირველმა ნაკადმა სწავლა მიმდინარე წლის აპრილში დაიწყო.

• როგორ გაავრცელეთ Lineate Dev School-ის მიღების დაწყების შესახებ ინფორმაციია? უბრალოდ მიღება გამოაცხადეთ თუ სხვადასხვა უნივერსიტეტებში გამართეთ პრეზენტაციები?

ჩვენ საკმაოდ აქტიურად ვთანამშრომლობთ საქართველოს წამყვან უნივერსიტეტებთან და როდესაც Lineate Dev School-ის კურსი შევქმენით, ერთ-ერთი ნაწილი იყო ამ უნივერსიტეტებში შეხვედრების გამართვა. სასწავლო კურსის ნაკადში ჩვენი თანამშრომლების ჩათვლით, ჯგუფში 25 ადგილი გვქონდა გამოყოფილი. შერჩევის პროცესში შემოვიდა 500-მდე აპლიკაცია. შემდეგი ეტაპები იყო აპლიკაციის გადარჩევა, ტესტირება.

ჩვენ გავუგზავნეთ აპლიკანტებს ტესტები, რაც გადარჩევის ერთგვარი ფილტრი იყო. შემდეგ გაიარეს გასაუბრება და 500 მსურველიდან 25 შეირჩა. საკმაოდ დიდი ინტერესი იყო. Lineate Dev School-ი არის უფასო და ეს არ არის მხოლოდ განათლების კომპონენტი, ასევე არის სტაჟირება.

სტუდენტებს, რომლებიც წარმატებით დაასრულებენ კურსს, კომპანიაში ანაზღაურებად სტაჟირებას ვთავაზობთ და შემდგომ უკვე დამწყებ დეველოპერად დასაქმებას.

• კურსის დასრულების შემდეგ სტუდენტები რა ტიპის სერტიფიკატებს მიიღებენ?

Lineate Dev School-ის კურსდამთავრებულებს ვაძლევთ 2 სახის სერტიფიკატს, ჩვენი პროგრამა 2 ეტაპისგან შედგება. შუალედში სტუდენტები წერენ ტესტირებას და შემდგომ გადადიან მენტორშიპის ეტაპზე. იმ სტუდენტებს, რომლებმაც პირველი ეტაპი დაასრულეს წარმატებით, გადაეცემათ დასწრების სერტიფიკატი, ხოლო მათ ვინც მთლიან კურსს გაივლის, კურსის წარმატებით დასრულების სერტიფიკატი გადაეცემათ. როგორც მოგეხსენებათ ჩვენ ვართ ამერიკული კომპანია და გამომდინარე აქედან ჩვენს მიერ გაცემული სერტიფიკატი საერთაშორისოა, რადგანაც ის ამერიკული კომპანიის სახელითაა გაცემული.

• სწავლების მეთოდებზე, რომ ვისაუბროთ, რა მოდელით ხდება Lineate Dev School-ში სწავლება?

ეს ჰიბრიდული მოდელია, რაც გულისხმობს იმას, რომ კვირაში ერთხელ დაახლოებით 4 საათი სასწავლო პროცესი მიმდინარეობს ადგილზე, ჩვენს ოფისში, ხოლო შემდგომ უკვე  ონლაინ სწავლება. სპეციალური გაკვეთილები ჩაწერილია ჩვენი ლექტორების მიერ, რომელსაც სტუდენტები სახლში გადიან.

სტუდენტებისთვის კვირაში ერთხელ არის ე.წ სამუშაო საათები, სადაც ადგილზე და ონლაინ მასალებს ლექტორებთან ერთად გადიან. რაც შეეხება პირველ ნაკადს, ჩვენი პროგრამა იყო java პროგრამულ უზრუნველყოფაზე. ჩვენ ვგეგმავთ სამომავლოდ, რომ გავაკეთოთ სხვადასხვა მიმართულებით ტრენინგები. შემდეგი კურსი დაგეგმილი გაქვს ე.წ. Front end, რომელსაც ვარაუდობთ, რომ შემოდგომაზე გავუშვებთ.

• რაც შეეხება შემდეგ ნაკადს, რადგან მოთხოვნა ასეთი მაღალი იყო, ხომ არ იგეგმება კონტინგენტის გაფართოება,?

სავარაუდოდ ისევ 25 სტუდენტისგან შემდგარი ჯგუფი გვექნება, რადგანაც 25 მეტი სტუდენტის აყვანის შემთქვევაში სასურველ შედეგს ვერ მივიღებთ. აქედან გამომდინარე კვლავ 25 სტუდენტს მივიღებთ. რადგან Lineate არის ე.წ. Full Stack კომპანია.

ვაპირებთ, რომ პროგრამები ყველა მიმართულებით ჩავუშვათ - იქნება ეს frontend, back-end, QA, თუ IT მენეჯმენტის მიმართულება.

• იმ 25-მა სტუდენტმა, რომელიც Lineate Dev School-ი პირველ ნაკადზე მიიღეთ, რამდენად წარმატებულად გაიარა კურსი?

რადგან შერჩევის კრიტერიუმები საკმაოდ მაღალი იყო, ოცდახუთივე სტუდნტი შუალედურამდე წარმატებულად გამოგვყვა. შემდეგ იყო გაცხრილვის ეტაპი, რომელიც ყველამ ბოლომდე გაიარა. საკმაოდ მოტივირებული ადამიანები გადავიდნენ შემდეგ ეტაპზე.

რამდენი კურსდამთავრებულის აყვანას გეგმავს სტაჟირებაზე Lineate Georgia?

ჩვენ რაოდენობაში შეზღუდულები არ ვართ. ყველაფერი დამოკიდებულია იმაზე, თუ როგორ წარადგენენ პროექტებს. თუ ყველა იქნება საუკეთესო, ცხადია, ყველას ავიყვანთ. გეტყვით, რომ სტაჟირებისას ისინი იმუშავებენ რეალურ პროექტებზე და ჩვენს ამერიკელ მომხმარებლებთან. უკვე გაქვს თანხმობა, რომ მათ პროექტზე მივამაგროთ სტაჟიორი და ისინი პროგრამული უზრუნველყოფის მიმართულებით რეალური პროგრამის განხორციელებას დაიწყებენ. სტაჟირება 3-თვიანია. თუ დავალებებს კარგად გაართმევენ თავს, კომპანია მიიღებს გადაწყვეტილებას, რომ 1 თვის შემდეგ მათ ხელშეკრულება გაუფორმოს და Lineate Georgia-ს სრულფასოვანი თანამშრომლები გახდნენ.

• თქვენ თქვით, რომ Lineate Dev School-ის კურსის 25 ადგილზე 500 აპლიკაცია შემოვიდა. როგორ შეაფასებთ ბაზარზე არსებულ ვითარებას, ანუ როგორაა ამ სექტორში კადრების კუთხით მოთხოვნა-მიწოდება?

გადამზადების პროგრამა არ არის ჩვენი ძირითადი ბიზნესი, თუმცა გამომდინარე იქიდან რომ ბაზარზე კვალიფიციური კადრების დეფიციტია ვახორციალებთ Lineate Dev School-ს  არიან ბაზარზე ტრენინგ პროვაიდერები, უნივერსიტეტები და ასე შემდეგ. ხაზი მინდა გავუსვა იმას, რომ ეს არ არის უნივერსიტეტის ალტერნატივა.

ჩვენ არ ვასწავლით ნულიდან, ჩვენი პროგრამა არის გათვლილი იმაზე, რომ ზემოდან ის პრაქტიკული ცოდნა დავამატოთ და შევავსოთ ის თეორიული ცოდნა, რომელსაც სტუდენტები იღებენ უნივერსიტეტებში. არ შევდივართ კონკურენციაში არც ტრენინგ-პროვაიდერებთან და არც უნივერსიტეტებთან. ჩვენი პროგრამა უფასოა,  თუ დავინახავთ რომ ბაზარზე მიწოდების კუთხით კვალიფიციური კადრები, ჩვენი ტრენინგის გარეშეც არსებობენ, რა თქმა უნდა კურსს აღარ განვაგრძობთ. დღეს ჩვენ ვხედავთ, რომ ბაზარზე ამის საჭიროება არსებობს და Lineate Dev School-ის შექმნის გადაწყვეტილება მივიღეთ. მივცეთ შესაძლებლობა იმ სტუდენტებს, რომლებიც ამთავრებენ უნივერსიტეტებს, რომ შრომით ბაზარზე უკვე მაღალი კვალიფიკაციით შევიდნენ.

• იმ აბიტურიენტებს, რომელთაც ჯერ არ გადაუწყვეტიათ საით წავიდნენ, რას ურჩევდით, რამდენად შემოსავლიანი პროფესიაა ვებ დეველოპმენტი და ყველა ის მიმართულება, რასაც ამ სკოლაში ასწავლით?

ყოველთვის მომყავს მაგალითი, თუ რატომ გვყავს ამდენი იურისტი, ფინანსისტი და ეკონომისტი. 2000-იან წლებში მაღალი შემოსავალის მიღების მიზნით იურიდიული ან  ეკონომიკური განათლება უნდა მიგეღოთ. დღეს Lineate-ს მსგავსად ბევრი საერთაშორისო კომპანიაა საქართველოში, რომელსაც პროექტები აქვთ მთელს მსოფლიოში და ჩვენს სექტორში ანაზღაურება 3 ჯერ მეტია ვიდრე საშუალო ხელფასი საქართველოში. აქედან გამომდინარე იმედი მაქვს, რომ ბევრად უფრო მეტი სტუდენტი გადაწყვეტს ამ მიმართულებით სწავლის გაგრძელებას.