ბათუმში კიდევ ერთი ახალი სასტუმრო გაიხსნა. სასტუმრო Landmark-მა სტუმრების მიღება უკვე დაიწყო და ზაფხულის ცხელი სეზონისთვის მაღალი დატვირთულობის მოლოდინშია. 

Landmark-ი ჰაიდარ აბაშიძის #26-ში მდებარეობს და ის კომპანია „გესთ გრუპის“ საკუთრებაა.

როგორც Business Insider Georgia-სთან კომპანია „გესთ გრუპის“ ერთ-ერთმა მფლობელმა და დირექტორმა ნუკრი შარაძემ განაცხადა, განთავსების ობიექტი 45 ნომერზეა გათვლილი.

„სასტუმრო  Landmark-მა სტუმრების მიღება უკვე დაიწყო და ჩვენი სასტუმროს დაჯავშნა თითქმის ყველა საერთაშორისო პლატფორმიდან არის შესაძლებელი. რაც შეეხება ადგილობრივ ჯავშნებს მივიღებთ ვებ-გვერდის და სასტუმროს სოციალური ქსელების მეშვეობით. ასევე ვაპირებთ, რომ  Landmark-ის შეთავაზებები გავაკეთოთ HotSale-სა და Swoop-ის მეშვეობით. 

იმისათვის, რომ სასტუმროს ცნობადობის გაზრდა მოხდეს, ჩვენ აქტიურად ვთანამშრომლობთ სხვადასხვა ტურისტულ კომპანიასთან, მით უმეტეს პარტნიორი სასტუმრო „მონარქიდან“ გამომდინარე ამისი დიდი გამოცდილება გაგვაჩნია“, - აცხადებს ნუკრი შარაძე.

Landmark-ში დატვირთულობის ზრდას ერთ თვეში ელოდებიან, რადგანაც ზაფხულის ტურისტული სეზონი მალე ოფიციალურად გაიხსნება. როგორც სასტუმროში განმარტავენ, უკვე შემოსულია ჯგუფური ჯავშნებიც.

Landmark-ის მშენებლობაში „გესთ გრუპმა“ 3 მლნ დოლარის ინვესტიცია განახორციელა. სასტუმრო საშუალო შემოსავლიან სეგმენტზე გათვლილი.

აღსანიშნავია, რომ “გესთ გრუპის“ ერთ-ერთი თანამფლობელი ბიზნესმენი გია ლომინაძეა, რომლის „ინს გრუპი“ ბათუმში მაღალი კლასის სასტუმრო სასტუმრო „მონარქს“ უკვე ფლობს.

სასტუმრო „მონარქი“ ბათუმში 2022 წლიდან ფუნქციონირებს. სასტუმრო ბათუმის ძველ, ცენტრალურ უბანში, ახმედ მელაშვილის #37-ში მდებარეობს. პროექტში კომპანიამ 12 მილიონი ლარის ინვესტიცია განახორციელა.

სამომავლოდ კი „ინს გრუპი“ გაფართოებასა და სასტუმროს გახსნას თბილისშიც განიხილავს, რომლისთვისაც ფართის მოძიებას უკვე 2025 წლიდან დაიწყებს.