2023 წლის ზაფხულის ტურისტული სეზონი ჯერჯერობით ნაკლებად აქტიურია. გარდა იმისა, რომ გარკვეულ დისკომფორტს უამინდობა ქმნის, კონკურენციის ფაქტორიც დიდია.
როგორც კომპანია Inn Group-ის ხელმძღვანელი ერეკლე კოკაია Busienss Insider Georgia - თან ამბობს, განსაკუთრებით შემცირდნენ ტურისტები არაბული ქვეყნებიდან, რადგან არჩევანი თურქეთზე გააკეთეს, რომელიც შედარებით დაბალი ტარიფებით გამოირჩევა.
„სეზონი ჯერჯერობით დიდი აქტიურობით ვერ გამოირჩევა, შეიძლებოდა, უკეთესი ყოფილიყო. თვითონ ტურისტულმა კომპანიებმა ჯგუფები ვერ შეავსეს, ადგილები დაახლოებით 10-15%-ით შეუმცირდათ და ასეა ჩვენთანაც. თუმცა სეზონი ჯერ კიდევ წინ არის და ვიმედოვნებთ, რომ სიტუაცია გამოსწორდება. ამინდის გავლენაც ნეგატიურია, თუმცა ეს არ არის მთავარი პრობლემა. სამწუხაროდ, წელს არ მოხდა ადგილების შევსება იმ რაოდენობით, როგორსაც ველოდით“, - ამბობს კოკაია და ტურისტების რაოდენობის კლების მიზეზზეც დასძენს.
„ტურისტები ყველაზე მეტად არაბული ქვეყნებიდან დაგვაკლდა. ზოგადად, მაღალმხარჯველი სეგმენტია და ეს სექტორზე ნეგატიურად მოქმედებს. სტატისტიკურად ყველაზე მეტი ტურისტი ამ ქვეყნებიდანაა, მაგრამ შემცირებული რაოდენობით. კონკურენტ ქვეყნებზე გააკეთეს არჩევანი, მაგალითად თურქეთზე, რომელიც ჩვენზე დაბალ ფასს სთავაზობს.
ვერ ვიტყვი, რომ მხოლოდ ფასის ფაქტორია, შეიძლება სხვა ქვეყნებშიც ფასი დაბალია, ვიდრე საქართველოში, მაგრამ მაინც ჩვენზე ქვეყანაზე აკეთებენ აქცენტს, თუმცა თურქეთის შემთხვევა სხვაა. ამ ქვეყნის კურორტები შედარებით იაფია, კარგი და გამორჩეულია, რამაც ასევე მიიზიდა ტურისტები“, - ამბობს ერეკლე კოკაია.
ცნობისთვის, Inn Group ერთ-ერთი უდიდესი ბიზნესჯგუფია საქართველოში, რომელიც 7 სასტუმროს, 3 საწარმოსა და 1 სამშენებლო კომპანიას აერთიანებს.
