ბლუმი • Bloom არის ქართული ბრენდი, რომელმაც ბაზარზე ოპერირება სულ ახლახანს დაიწყო და მომხმარებელს ახალშობილებისთვის და მათი მშობლებისთვის საჭირო სასაჩუქრე ბოქსებს სთავაზობს. მეტი ინფორმაციისთვის, Business Insider Georgia კომპანიის დამფუძნებელს სოფიო მუზაშვილს ესაუბრა.

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

Bloom არის ახალი ქართული ბრენდი, რომელიც ახალშობილთა მშობლებისთვის შექმნილ სასაჩუქრე ბოქსებს აწარმოებს. ჩვენს ბოქსებში თავს იყრის ნივთები და სერვისები, რომლებიც ეხმარება მშობლებს ბავშვის დაბადების შემდგომ მენტალური და ფიზიკური მდგომარეობის გაუმჯობესებაში.
ბაზარზე ოპერირება დავიწყეთ სულ რამდენიმე კვირის წინ და ამ ეტაპზე ვმუშაობთ მხოლოდ ონლაინ რეჟიმში.
ბრენდი შეიქმნა ზრუნვის, სითბოსა და მხარდაჭერის იდეის გარშემო. გამომდინარე იქედან, რომ მე თავად ვარ ორი შვილის დედა, საკუთარ თავზე მაქვს გამოცდილი, თუ რაოდენ მნიშვნელოვანია ბავშვის გაჩენის შემდეგ ოჯახის წევრების, მეგობრებისა და ახლობლების დახმარება, მხარდაჭერა და მზრუნველობა. თითოეული ბოქსი ქმნის განცდას რომ მშობლები მარტო არ არიან, რომ მათზე ზრუნავენ. ეს არის საუკეთესო საჩუქარი მათთვის, ვინც ახლახანს შეუდგა მშობლობის სასიამოვნო, მაგრამ მეტად რთულ და საპასუხისმგებლო საქმეს.

როგორია მიმდინარე ასორტიმენტი?

ამ ეტაპზე გვაქვს სამი სახის ბოქსი, რომლებიც ერთმანეთისგან განსხვავდებიან კომპლექტაციით, დიზაინითა და ფასით. ესენია :

• Classic White
• Elegant Purple 
• Premium Blue

თითოეული ნივთი და სერვისი, რომლებსაც ჩვენს ბოქსებში იხილავთ, დიდი სიფრთხილით არის შერჩეული. საკუთარ და სხვის გამოცდილებაზე დაკვირვებით, ასევე პროფესიონალების რჩევის გათვალისწინებით ჩამოვყალიბდით ისეთ ნივთებზე და სერვისებზე, რომლებიც მშობლებს დაეხმარება ბავშვის მოვლაში, დასვენებაში, სტრესის მოხსნასა და განტვირთვაში. მაგალითად: პერსონალური განვითარების ქოუჩის ვაუჩერი, რომლის საშუალებითაც ისინი კვალიფიციურ რჩევებს მიიღებენ მათთვის მეტად მნიშვნელობან საკითხებზე; იოგას მასტერკლასის ვაუჩერი ჩვენ გვჯერა რომ, მშობლის მენტალური ფიზიკური ჯანმრთელობა მეტად მნიშვნელოვანია ბავშვის სწორი აღზრდისათვის; კერამიკის მასტერკლასი წყვილებისთვის, რაც მათ საშუალებას მისცემს ბავშვის გაჩენის შემდეგაც დაუთმონ დრო პარტნიორულ ურთიერთობებს; ვიდეო ძიძა, რომელიც ეხმარება მშობლებს ბავშვის მოვლის ყოველდღიური რუტინის გამარტივებაში; წიგნები, რომლებიც მშობლების მრჩეველები გახდებიან შვილებთან ჯანსაღი ურთიერობების ჩამოყალიბების საკითხებში; პრემიუმ ხარისხის თავის მოვლის საშუალებები. ეს მხოლოდ არასრული ჩამონათვალია იმ საჭირო და საინტერესო ნივთებისა, რასაც ჩვენს ბოქსებში აღმოაჩენთ.

რას მიიჩნევთ კომპანიის კონკურენტულ უპირატესობად?

BLOOM-ის მთავარი უპირატესობა მისი სიღრმე და შინაარსია. ჩვენ არ ვყიდით შემთხვევით ნივთებს, როგორიც შეიძლება იყოს ეტლი, ბავშვის ტანსაცმელი ან საწოვარა ბოთლი, რაც ისედაც გავრცელებული და ბანალური საჩუქარია. გვინდოდა, რომ თავად მშობლებისთვისაც და სხვებისთვისაც შეგვეხსენებინა რომ ამ დროს ბავშვზე არანაკლებ მნიშვნელობანი მშობელი, მისი ფსიქო-ემოცური და ფიზიკური მდგომარეობაა. ჩვენ ვქმნით გამოცდილებას, რომელიც რეალურად ეხმარება ახალბედა მშობლებს. ბოქსები გამოირჩევა ელეგანტური, დახვეწილი სასაჩუქრე დიზაინით, რაც იძლევა სიხარულის და კმაყოფილების განცდას, პროდუქტი თავისი ვიზუალითაც და შინაარსითაც იდეალურია მათთვის, ვინც ეძებს გააზრებულ, საჭირო და გამორჩეულ საჩუქარს ოჯახის წევრისთვის, მეგობრისთვის, თანამშრომლისთვის თუ პარტნიორისთვის, რომელიც დგას ახალი გამოწვევის წინაშე. BLOOM-ის ჩუქებისას თქვენ ჩუქნით სითბოს, მზრუნველობას, მხარდაჭერასა და სიყვარულს.

როგორია კომპანიის სამომავლო გეგმები?

მიზნად გვაქვს ფიზიკური გაყიდვების წერტილის დამატება. ასევე ვაპირებთ ახალი ბოქსების ხაზის დამატებას, რომლებიც სხვადასხვა თემატიკასა და საჭიროებას მოიცავს, მათ შორის შეიძლება იყოს ბოქსები ორსულებისთვის, ბავშვის პირველი დაბადების დღისთვის და ა.შ.
გრძელვადიან პერიოდში გვინდა BLOOM გახდეს ასოციაცია- ორსულების, მომავალი მამების და ახალბედა მშობლების თავშყრის ადგილი, სადაც ისინი თავის გამოცდილებას გაუზიარებენ ერთმანეთს. მათ გვერდით იქნებიან პროფესიონალები პედიატრები, ფსიქოლოგები, გინეკოლოგები, ძიძები და ა. შ. რომლებისგანაც მშობლები მიიღებენ სანდო და კვალიფიციურ ინფორმაციას მათთვის მნიშვნელოვან საკითხებზე. გაეცნობიან თანამედროვე მიდგომებს ბავშვის გაზრდასთან და მშობლების ფსიქო-ემოციურ მდგომარეობასთან დაკავშირებით. დაიგეგმება ტრენინგები, ჯგუფური შეხვედრები და თემატური ღონისძიებები. გაიზრდება ცნობიერება იმასთან დაკავშირებით, რომ მშობლობა მხოლოდ მოვალეობა კი არა, ურთიერთპატივისცემაზე დაფუძნებული, უანგარო სიყვარულით სავსე პროცესია, რომელიც უკეთეს საზოგადოებას ქმნის.

ცნობისთვის, ამჟამად მომხმარებლებს ბოქსების შეძენა მხოლოდ ონლაინ შეუძლიათ.