„ცუმბო პოპსი“ პირველი ქართული ხილის პოპსების ბრენდია, რომელიც ბაზარზე 2017 წლიდან ოპერირებს. წარმოების პროცესში გამოიყენება მხოლოდ ჯანსაღი, სეზონური და ადგილობრივი ინგრედიენტები. მეტი ინფორმაციისთვის, Business Insider Georgia კომპანიის დამფუძნებელს მარიამ ჭუმბურიძეს ესაუბრა.

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

"ცუმბო პოპსი" არის პირველი ქართული ხილის პოპსების ბრენდი, რომელიც მომხმარებელს სთავაზობს სეზონური ხილითა და მაღალი ხარისხის ინგრედიენტებით დამზადებულ პროდუქტს.

როგორია მიმდინარე ასორტიმენტი?

ჩვენი ასორტიმენტი სეზონურ ხილზეა დამოკიდებული, რადგან ვიყენებთ მხოლოდ ადგილობრივ და ჯანსაღ ნედლეულს. ამ ეტაპზე გვაქვს მარწყვის, ჟოლოს, მაყვლის, ბანანის, ალუბლის, ნესვისა და სხვა გემოების პოპსები. ყოველი პარტია ხელით, დიდი სიყვარულითა და განსაკუთრებული ყურადღებით მზადდება.

როგორ აფასებთ მოთხოვნას ზოგადი თვალსაზრისით?

მოხარულები ვართ, რომ მოთხოვნა წლიდან წლამდე იზრდება და ჩვენი ერთგული მომხმარებლების რიცხვი მუდმივად მატულობს. განსაკუთრებით სასიამოვნოა მათგან გამოხატული კმაყოფილება და მხარდაჭერა, რაც გვაძლიერებს და მოტივაციას გვაძლევს.

რას მიიჩნევთ კომპანიის კონკურენტულ უპირატესობად?

ჩვენი მთავარი უპირატესობა სიჯანსაღე და გულწრფელობაა. არ ვიყენებთ არანაირ ხელოვნურ არომატიზატორებს, საღებავებსა თუ დანამატებს. ჩვენი პროდუქტი არ შეიცავს რაფინირებულ შაქარს, რძეს და გლუტენს. მხოლოდ ჯანსაღი ხილით მზადდება, ამიტომ თამამად შეუძლიათ მისი მოხმარება, როგორც ბავშვებს, ისე დიდებს. მომხმარებელი ჩვენს გულწრფელ დამოკიდებულებას გრძნობს და ამას განსაკუთრებით აფასებს.

როგორია კომპანიის სამომავლო გეგმები?

ჩვენი მიზანია, რომ "ცუმბო პოპსი" კიდევ უფრო ხელმისაწვდომი გახდეს თბილისის სხვადასხვა უბანში, რეგიონებში და საერთაშორისო ბაზარზე. ვმუშაობთ მიტანის სერვისის გაფართოებაზე და პარალელურად ვდგამთ ნაბიჯებს ექსპორტის მიმართულებით, რათა ქართული ხილით შექმნილ პროდუქტს სხვა ქვეყნებშიც გაეცნონ.

აღსანიშნავია, რომ "ცუმბო პოპსი" იქმნება ფერადი და გრილი დღეებისთვის.