აქონდროპლაზიის სამკურნალო მედიკამენტ „ვოსორიტიდის“ შესყიდვა/დანერგვისთვის 10,5 მლნ ლარი დაიხარჯება

სახელმწიფო აქონდროპლაზიის სამკურნალო მედიკამენტ „ვოსორიტიდს“ ყიდულობს, შესყიდვა გამარტივებული შესყიდვის წესით მოხდება და სსიპ ჯანმრთელობის ეროვნული სააგენტო „ვოსორიტიდს“ და 2023-2024 წლების განმავლობაში ქვეყანაში მისი ეტაპობრივი დანერგვისთვის 10 450 022 ლარს გადაიხდის.

მედიკამენტი წარმოადგეს ინოვაციურ სამკურნალო საშუალებას და პროტოკოლით რეკომენდებულია მისი გამოყენება მულტიდისციპლინური ჯგუფის გადაწყვეტილებით აქონდროპლაზიის გენეტიკურად დადასტურებულ შემთხვევებში (შესაბამის ასაკობრივ ჯგუფებში).

გეგმის მიხედვით, საწყის ეტაპზე, 2023 წელს, მკურნალობის პროგრამაში უნდა ჩაერთოს 5-6 პაციენტი, ვისთვისაც „შესაძლებლობის ფანჯარა“ შედარებით ხანმოკლეა, ასევე, მძიმე კლინიკური გამოვლინებების მქონე შედარებით ადრეული ასაკის პაციენტები (მულტიდისციპლინური ჯგუფის გადაწყვეტილების საფუძველზე). ამასთან, მედიკამენტის ინექციები უნდა ჩატარდეს მულტიპროფილურ კლინიკაში დღის სტაციონარის პირობებში. გეგმის თანახმად, ამ ეტაპზე „ვოსორიტიდით“ მკურნალობის პროგრამა განხორციელდება მხოლოდ ქ. თბილისში, 2024 წლიდან ეტაპობრივად მოხდება მომლოდინე პაციენტების ჩართვა ასაკობრივი ზღვარის და „შესაძლებლობის ფანჯრის“ გათვალისიენბით. დაახლოებით 2024 წლის III კვარტლის დასაწყისში ყველა ბენეფიციარი უზრუნველყოფილი იქნება მედიკანენტით, რომელიც განაცხადებს წერილობით თანხმობას მედიკამენტით მკურნალობის დაწყებაზე.

კომპანია "ბიომარინის" მიერ წარმოებულ ინოვაციურ მედიკამენტს "ვოსორიტიდს" 2021 წლის 19 ნომბერს მიენიჭა აშშ საკვებისა და წამლის ადმინისტრაციის (FDA) დაჩქარებული ავტორიზაცია, ხოლო ევროპის წამლის სააგენტოს (EMA) მიერ სავაჭრო ავტორიზაცია გაიცა 2021 წლის 26 აგვისტოს. სამინისტრომ, ჯანმრთელობის მსოფილო ორგანიზაციის მხარდაჭერითა და ჩართულობით, 2023 წლის თებერვლიდან დაიწყო კონსულტაციები ევროპის იშვიათი დაავადებების ასოციაციასთან (EURODIS).

მედიკამენტის ქვეყანაში შემოტანა შესაძლებელია „განსაკუთრებულ პირობებში (სტიქიური უბედურება, მოსახლეობის მასობრივად დაზიანება, ეპიდემია, იშვიათი დაავადება) ჰუმანიტარული მიზნით, აგრეთვე სხვა განსაკუთრებული სახელმწიფოებრივი ინტერესების არსებობისას, საქართველოს შრომის, ჯანმრთელობისა და სოციალური დაცვის სამინისტროს თანხმობით საქართველოს ბაზარზე დაშვების უფლების არმქონე ფარმაცევტული პროდუქტის დაშვების რეჟიმების გვერდის ავლით, არაკომერციული მიზნით შემოტანის წესის დამტკიცების შესახებ“ საქართველოს შრომის, ჯანმრთლობისა და სოციალური დაცვის მინისტრის 2009 წლის 13 ოქტომბრის №327/ნ ბრძანების თანახმად, მედიკამენტის აღიარებითი რეჟიმით რეგისტრაციამდე.

მედიკამენტის ქვეყანაში დანერგვის საკითხი შესწავლილ იქნა სამუშაო ჯგუფის ფორმატში, შესაბამისი დარგის ექსპერტების, საჭიროების შემთხვევაში, უცხოელი სპეციალისტების ჩართულობით. სამუშაო ჯგუფმა განიხილა და შეაფასა ამ დაავადების მკურნალობის ყველა არსებული, მათ შორის ქირურგიული მეთოდი, მოამზადა დაავადების კლინიკური მართვის პროტოკოლი და განსაზღვრა პაციენტების ჩართვის კრიტერიუმები. მნიშვნელოვანია შემთხვევების ინდივიდუალურ დონეზე შესწავლა, ვინაიდან შესაძლოა ამ მედიკამენტის გამოყენება ყველა პაციენტის შემთხვევაში არ იყოს მიზანშეწონილი.

ქვეყანაში დღევანდელი მონაცემებით გენეტიკურად დადასტურებული აქონდროპლაზიის დიაგნოზი აქვს 19 ბავშვს.