BUS LANE-ზე ავტომობილების მოძრაობის, გაჩერების ან დგომისათვის 6 თვეში ბიუჯეტში ჯარიმის სახით 2 მლნ ლარზე მეტი შევიდა

დედაქალაქში BUS LANE-ზე ავტომობილების მოძრაობის, გაჩერების ან დგომისათვის 2023 წლის ექვს თვეში ბიუჯეტში ჯარიმის სახით 26%-ით მეტი თანხა შევიდა ვიდრე 2022 წლის ანალოგიურ პერიოდში. 

სახელმწიფო ხაზინის ვებგვერდზე განთავსებული მონაცემებიდან ირკვევა, რომ  2023 წლის იანვარ-ივნისში თბილისის ადმინისტრაციულ საზღვრებში სამარშრუტო სატრანსპორტო საშუალებების მოძრაობისთვის განკუთვნილ სპეციალურ ზოლში (BUS LINE) სამარშრუტო სატრანსპორტო საშუალებების გარდა სხვა სახის სატრანსპორტო საშუალებების მოძრაობის, გაჩერების ან დგომისათვის ბიუჯეტში სანქციებიდან (ჯარიმები და საურავები)  შესულმა შემოსავალმა 2,265,528.14 ლარი შეადგინა. აქედან 1,359,316.8 ლარი იყო ტერიტორიული ერთეულის ბიუჯეტი შემოსავალი, ხოლო 906,211.28 ლარი სახელმწიფო ბიუჯეტის. 

ამასთან, 2022 წლის ანალოგიურ პერიოდში  BUS LANE-ზე გავლისთვის ან დგომისთვის ჯარიმის საერთო მოცულობამ 1,795,601.92 ლარი შეადგინა. 

როგორც თბილისის მერიის საიტზე განთავსებული ინფორმაციიდან ირკვევა, საქართველოს ადმინისტრაციულ სამართალდარღვევათა კოდექსის 125-ე მუხლის მე-12 ნაწილის თანახმად - სამარშრუტო სატრანსპორტო საშუალების მოძრაობისათვის განკუთვნილ სპეციალურ ზოლში („BUS LANE“) სამარშრუტო სატრანსპორტო საშუალების გარდა სხვა სახის სატრანსპორტო საშუალების მოძრაობა, გაჩერება ან დგომისთვის – ჯარიმა 100 ლარია;