ქსელური მარკეტების დახლები „პოპორელისთვის“ კვლავ მიუწვდომელია - „კეთილი და პატიოსანი“

კომპანია ,,კეთილი და პატიოსანის" დირექტორი გიორგი ახალაძე Business Insider Georgia- თან ამბობს, რომ 2023 წელი საკმაოდ მნიშვნელოვანი იყო, რადგან წარმოებაში ჩაუშვეს სოუსების პროექტი და ბრენდი „პოპორელი“, რომლის ქვეშაც 7 ახალი დასახელების სოუსი გამოვიდა.

„მათ შორის არის ტყემალი და საწებელი. ამის გარდა გვაქვს კივის, შინდის, წითელი და მწვანე წიწაკის და „წოწოლას საწებელი“, ტყემალი ჭარხლით, რომელიც ძველი ქართული, აჭარული რეცეპტით მომზადდა. ეთნოგრაფიული კვლევა ჩავატარეთ, ძველი რეცეპტები გავაცოცხლეთ და ასე შეიქმნა ბრენდი „პოპორელი“ რომელიც მომხმარებელს შევთავაზეთ“, - ამბობს გიორგი ახალაძე.  

როგორც კომპანიის დირექტორი ამბობს, წარმოებამ გაამართლა, თუმცა მწვავედ დგას გასაღების პრობლემა, რადგან ქსელური მარკეტები 2024 წელსაც „პოპორელისთვის“ მიუწვდომელია.

„ადგილობრივ ბაზარზე გაყიდვების კუთხით 40%-იანი ზრდა გვაქვს, თუმცა სამწუხაროდ, ყველა ქსელში ვერ შევდივართ. სერიოზული პრობლემები შეგვექმნა, განსაკუთრებით საწებლების რეალიზაციაზე“, - ამბობს მეწარმე.

მისი თქმით, ამ ეტაპზე პროდუქცია იყიდება ,,ევროპროდუქტში", ,,ფრესკოსა" და ,,ვან პრაისში",  დანარჩენ სუპერმარკეტებში განთავსების საკითხი გაიყინა.

,,სამი სუპერმარკეტის დახლებზე ვართ წარმოდგენილი, როდესაც ბაზრის დიდი წილის მოცვას ვგეგმავდით.  ისე მოხდა, რომ ადგილობრივ ბაზარზე გაფართოების შესაძლებლობა შეგვეზღუდა.  ქსელებში  ვერ შევდივართ, რადგან თავიანთი პროდუქცია აქვთ. კონკურენციის საკითხი, არ აწყობთ ჩვენი შესვლა, როცა რამდენიმე უკვე თვითონაც ქმნის ანალოგიურ პროდუქტს. ადგილობრივ წარმოებას არ აძლევენ საშუალებას, რომ თავიანთი პროდუქციით შევიდნენ ქსელებში, ასეთი არასახარბიელო მდგომარეობაა.  შესაბამისად, საექსპორტო ბაზრებს ვეძებთ, რომ ამ კუთხით გავაძლიეროთ ნიშა", - ამბობს გიორგი ახალაძე.

მისი თქმით, ამ დროისთვის ცდილობენ ბრენდი საუბნო მაღაზიებში შეიტანონ და სადისტრიბუციო კომპანიებთან ამ საკითხზე მოლაპარაკებები აქვთ.

„მსხვილი ქსელები არიან ძირითადი რეალიზატორები. ბაზრის 50%-ს ისინი ფლობენ. აქ სერიოზული პრობლემა გვაქვს, არა მხოლოდ ჩვენ, არამედ ბევრ მცირე წარმოებას“, - ამბობს კომპანიის ხელმძღვანელი.

კეთილი და პატიოსანი“ ჯამში 15 დასახელების პროდუქციას აწარმოებს. აქედან 8 დასალევი ხილ-ბოსტნეულია, 7 - ,,პოპორელის“ სოუსები.

ბრენდი ექსპორტზე გადის აშშ-სა და საფრანგეთში, ასევე რეგიონის ქვეყნებში, რასაც უახლოეს პერიოდში ჩინეთი დაემატება.

„კეთილი და პატიოსანი“ გურჯაანში, სოფელ ჩუმლაყში კომპანია „ქართული აგროპროდუქტის" საწარმოში მზადდება. 

ამ ეტაპზე კომპანიაში 26 ადამიანია დასაქმებული.