ღვინის ეროვნული სააგენტოს ფინანსური მხარდაჭერით და სააგენტოს კონტრაქტორი მარკეტინგული კომპანიის „Red Bridge“-ის ორგანიზებით, იაპონიის სხვადასხვა ქალაქში ქართული ღვინის დეგუსტაციები გაიმართა, სადაც მონაწილეებს შორის მეღვინეობა Vinotells-იც იყო წარმოდგენილი. ღონისძიების დეტალებზე Business Insider Georgia მეღვინეობა Vinotells-ის მარკეტინგის და საზოგადოებასთან ურთიერთობების მენეჯერს, მარი ჭყოიძეს ესაუბრა.

როგორ შეაფასებდით იაპონიის საერთაშორისო გამოფენის მნიშვნელობას თქვენი კომპანიისთვის?

ღვინის ეროვნული სააგენტოს ფინანსური მხარდაჭერით და სააგენტოს კონტრაქტორი მარკეტინგული კომპანიის ,,Red Bridge” ორგანიზებით, ქართული ღვინის დეგუსტაცია-სემინარები, ე.წ. „Road Show“ იაპონიის ქალაქებში - საპორო, სენდაი და ტოკიო, 7-13 აპრილის პერიოდში გაიმართა.

აღნიშნულ ღონისძიებაში მონაწილეობა ჩვენი კომპანიისთვის მრავალმხრივ სტრატეგიულ მნიშვნელობას ატარებს.

პირველ რიგში, ასეთი პლატფორმა გვაძლევს შესაძლებლობას გავაძლიეროთ ბრენდის საერთაშორისო პოზიციონირება ერთ-ერთ ყველაზე განვითარებულ და მოთხოვნად ბაზარზე. იაპონია ცნობილია ხარისხისადმი განსაკუთრებული მოთხოვნებით, შესაბამისად, აქ წარდგენა წარმოადგენს სანდოობისა და მაღალი სტანდარტების დადასტურებას.
მეორე მხრივ, მსგავსი ღონისძიება ქმნის უნიკალურ შესაძლებლობას საქმიანი კავშირების გაფართოებისთვის. ადგილობრივ იმპორტიორებთან, დისტრიბუტორებთან და ჰორეკა სექტორის წარმომადგენლებთან პირდაპირი კომუნიკაცია გვაძლევს საშუალებას დავამყაროთ გრძელვადიანი პარტნიორობები და უკეთ გავიგოთ ბაზრის სპეციფიკა.
გარდა ამისა, ასეთი ღონისძიებები მნიშვნელოვანია ბაზრის კვლევის თვალსაზრისითაც - ვეცნობით მომხმარებელთა გემოვნებას, ტრენდებსა და კონკურენტულ გარემოს, რაც გვეხმარება პროდუქტისა და მარკეტინგული სტრატეგიის დახვეწაში.

გაქვთ თუ არა დაინტერესება ახალ პარტნიორებთან თანამშრომლობის დაწყების კუთხით?

დიახ, ახალი პარტნიორებთან თანამშრომლობა ჩვენთვის მნიშვნელოვანი პრიორიტეტია. სემინარების ფარგლებში ღვინის მაგისტრმა Kenichi Ohashi განსაკუთრებული ყურადღება გაამახვილა დაცული ადგილწარმოშობის ღვინოებზე, მათ შორის Napareuli წითელზე, რომელიც მან შეაფასა როგორც ელეგანტური და მაღალი ხარისხის ღვინო. მისმა რეკომენდაციებმა კიდევ უფრო გაზარდა ჩვენი ინტერესიც და მზადყოფნაც ახალი პარტნიორული ურთიერთობების დასაწყებად.

დაინტერესებულ პირებთან ჩვენი ღვინოების წარდგენა გაცილებით სიღრმისეულ და პროფესიულ ფორმატში წარიმართა. განსაკუთრებული ყურადღება დაეთმო დეგუსტაციის ნაწილს, სადაც საშუალება ჰქონდათ დეტალურად გაცნობოდნენ ჩვენი ღვინოების სტილს, არომატულ და ტექნოლოგიურ თავისებურებებს. თითოეული ნიმუში წარმოდგენილი იყო მისი წარმოშობის, ჯიშური შემადგენლობისა და წარმოების მეთოდის კონტექსტში, რაც სტუმრებს აძლევდა სრულყოფილ წარმოდგენას როგორც პროდუქტის ხარისხზე, ასევე მის უნიკალურობაზე.

ამგვარმა ინტერაქტიულმა ფორმატმა მნიშვნელოვნად გააძლიერა ჩვენი ბრენდის აღქმა და შექმნა მყარი საფუძველი მომავალში პარტნიორული ურთიერთობების განვითარებისთვის.

როგორია კომპანიის სამომავლო გეგმები და განვითარების ხედვა?

კომპანიის სამომავლო განვითარების ხედვის საფუძველს წარმოადგენს ხარისხზე მკაფიო და შეუცვლელი აქცენტი. ჩვენი მთავარი პრიორიტეტია თითოეული ეტაპის მაქსიმალური კონტროლი - ვენახში ნიადაგის მოვლიდან დაწყებული, ყურძნის შერჩევითა და გადამუშავებით გაგრძელებული და საბოლოოდ ბოთლში მოხვედრილი ღვინით დასრულებული. სწორედ ეს უწყვეტი კონტროლი გვაძლევს საშუალებას შევინარჩუნოთ სტაბილურად მაღალი ხარისხი და პროდუქტის იდენტობა.

ამ მიზნის უზრუნველსაყოფად აქტიურად ვიყენებთ ისეთ აგროტექნიკურ მეთოდებს, როგორიცაა „მწვანე რთველი“, რაც ხელს უწყობს ყურძნის კონცენტრაციისა და არომატული პოტენციალის გაუმჯობესებას. შედეგად, მიღებული ღვინოები გამოირჩევა დახვეწილი სტრუქტურითა და გამოკვეთილი ხასიათით.

წელსაც, ისევე როგორც გასულ წელს, ვგეგმავთ კლასიკური მეთოდით დაყენებული ღვინოების წარმოებას, მათ შორის - „ნაფარეული თეთრი“ და „მუსკატური რქაწითელი“, რომლებიც გამოირჩევიან ელეგანტურობითა და ჯიშური თავისებურებების მკაფიო გამოხატულებით.

კომპანიის განვითარების სტრატეგიაში განსაკუთრებული ადგილი უკავია საერთაშორისო ბაზრებს. ჩვენი ძირითადი აქცენტი კვლავ ექსპორტის გაფართოებასა და გლობალურ ბაზრებზე პოზიციონირების გაძლიერებაზეა, რაც უზრუნველყოფს ბრენდის მდგრად ზრდასა და კონკურენტუნარიანობას საერთაშორისო დონეზე.