„ვაინ კახეთი“ ამჟამად განვითარების იმ ეტაპზეა, როცა არსებული ინფრასტრუქტურა სრულად არის მიმართული გლობალური ბაზრების ათვისებაზე , - ამის შესახებ, Business Insider Georgia-ს კომპანიის დამფუძნებელმა და დირექტორმა ლევან ზილფიმიანმა განუცხადა.

როგორია „ვაინ კახეთის“ მიმდინარე განვითარების ეტაპი და რა მთავარი სიახლეები გაქვთ კომპანიაში?

„ვაინ კახეთი“ ამჟამად განვითარების იმ ეტაპზეა, როცა არსებული ინფრასტრუქტურა სრულად არის მიმართული გლობალური ბაზრების ათვისებაზე. თელავში მოქმედი ჩვენი საწარმო, რომელიც აღჭურვილია უახლესი ევროპული ტექნოლოგიებით, სტაბილურად უზრუნველყოფს მაღალ წარმადობას - ჩამოსხმის ხაზის სიმძლავრე წელიწადში 10 მილიონ ბოთლს შეადგენს. 

მთავარი სიახლე საექსპორტო სტრატეგიის გააქტიურებაა: კომპანია გადავიდა პირდაპირი წარმომადგენლობების მოდელზე. ამის პირველი მაგალითია ამერიკის შეერთებულ შტატებში, პენსილვანიის შტატში, „ვაინ კახეთის“ ოფიციალური წარმომადგენლობის გახსნა. დღეს ჩვენი ღვინო ამერიკულ ბაზარზე უკვე ხელმისაწვდომია და ნებისმიერ მსურველს შეუძლია მისი, მათ შორის, ონლაინ შეძენაც. ეს მოდელი საშუალებას გვაძლევს, ვიყოთ უფრო მოქნილები და კონკურენტუნარიანები საერთაშორისო ბაზარზე, რაც პირდაპირ აისახება ჩვენი ექსპორტის მაჩვენებლებზე.

რომელ მიმართულებებზე აკეთებთ ახლა ძირითად აქცენტს - ბაზრები, პროდუქტი თუ ექსპორტის გაფართოება?

ჩვენი ფოკუსი ამ მიმართულებების ერთდროულ განვითარებაზეა. პროდუქტის ხარისხს ჩვენი საკუთარი ნედლეულის ბაზა უზრუნველყოფს - ვფლობთ 200 ჰექტარამდე ვენახს, სადაც თითოეული ჯიში საუკეთესო მიკროზონებშია გაშენებული.

რაც შეეხება ბაზრებს, სტრატეგია მკაფიოდ ექსპორტზეა ორიენტირებული. მთავარი აქცენტი ახლა ამერიკის შეერთებულ შტატებზეა, თუმცა პარალელურად აქტიურად ვმუშაობთ ევროპისა და აზიის მიმართულებით. ჩვენი მიზანია, „ვაინ კახეთი“ საერთაშორისო ასპარეზზე ქართული ხარისხის სტაბილურ გარანტად იქცეს.

როგორია მოთხოვნის დინამიკა ქართულ ღვინოზე ბოლო პერიოდში და რა ტენდენციებს ხედავთ?

ტენდენცია ცალსახად პოზიტიურია - ქართული ღვინო „ეგზოტიკური აღმოჩენიდან“ უკვე „ხარისხიან არჩევანში“ გადადის. საერთაშორისო გამოფენებმა, მათ შორის Wine Paris-მა, აჩვენა, რომ პროფესიონალი სომელიეები და იმპორტიორები სულ უფრო მეტად ინტერესდებიან ჩვენი აბორიგენული ჯიშებით, როგორიცაა ქისი, მწვანე და საფერავი.

მომხმარებელი ეძებს ისტორიას და ავთენტურობას, რასაც „ვაინ კახეთი“ 1921 წლიდან მემკვიდრეობით მიღებული სამეცნიერო გამოცდილებით სრულად პასუხობს. ვგულისხმობთ, მევენახეობისა და მეღვინეობის ინსტიტუტს, რომელმაც გადაარჩინა და დაიცვა ქართულ ვაზის უძველესი აბორიგენული ჯიშები.

რა არის კომპანიის მთავარი გეგმა და პრიორიტეტი უახლოეს მომავალში?

ჩვენი უახლოესი პრიორიტეტია წარმოების გაფართოება და პროდუქციის ასორტიმენტის გაზრდა. ამ ეტაპზე აქტიურად ვმუშაობთ სპირტის სახდელის გაფართოებაზე, რაც საშუალებას მოგვცემს, პრემიუმ ხარისხის ღვინოებთან ერთად, ბაზარს უმაღლესი სტანდარტის სპირტიანი სასმელებიც შევთავაზოთ.

სტრატეგიული ამოცანა კი უცვლელია: 10-მილიონიანი წარმადობის პირობებშიც კი, თითოეულ ბოთლში შევინარჩუნოთ ის სამეცნიერო სიზუსტე და ხარისხი, რომელიც 1921 წლიდან მოგვყვება. ჩვენი მიზანია, „ვაინ კახეთი“ გახდეს სტაბილური და მასშტაბური მიმწოდებელი. კომპანია ნებისმიერი მოცულობის შეკვეთისას ხარისხის უმაღლეს სტანდარტს უზრუნველყოფს.

ინფორმაციისთვის, „ვაინ კახეთი” - ს ისტორია იწყება 2017 წლიდან, როცა კომპანიამ გადაწყვიტა, უნიკალური ცოდნითადა გამოცდილებით უმაღლესი ხარისხის ქართული ღვინო შეექმნა. საწარმო, კახეთში, თელავში მდებარეობს.