სავალდებულო დაზღვევა არა მხოლოდ სოციალური რისკების შემცირების, არამედ სადაზღვევო კულტურის განვითარების მნიშვნელოვანი ინსტრუმენტია, - მიიჩნევს სადაზღვევო კომპანია „არდის" გენერალური დირექტორი, მიხეილ ჯაფარიძე, რომელიც ტელეკომპანია „მაესტროს" ეთერში, გადაცემა Business Insider Georgia-ს სტუმარი იყო.

მისი თქმით, სავალდებულო დაზღვევის პროდუქტები მოსახლეობაში ცნობადობას ზრდის და სხვა ტიპის დაზღვევების მიმართ ინტერესსაც აჩენს, ხოლო საქართველოში ამ ეტაპზე განსაკუთრებით ავტოდაზღვევის მიმართულებით შესაბამისი სისტემის ამოქმედების მოლოდინია. 

„სავალდებულო დაზღვევის კონტექსტში ინდუსტრიას ბევრჯერ გვქონია საუბარი და ყოველთვის გვსურს ხაზი გავუსვათ მის მნიშვნელობას. პირველ რიგში, ეს არის სოციალური და არა კლასიკური კომერციული პროდუქტი, რადგან იგი მნიშვნელოვნად ამცირებს სოციალურ შოკებს ავტოსაგზაო შემთხვევით გამოწვეული ფინანსური გამოწვევების მართვის კუთხით. გარდა ამისა, სავალდებულო დაზღვევა ზრდის საზოგადოების ცნობადობას, როდესაც ადამიანები ხედავენ ამ პროდუქტის რეალურ სიკეთეს. მათ უჩნდებათ ლოგიკური კითხვა თუ სავალდებულო დაზღვევამ ასეთი შედეგი მოიტანა, რატომ არ შეიძლება სხვა ნებაყოფლობითმა პროდუქტმაც იმუშაოს? სწორედ ასე განვითარდა დაზღვევის კულტურა ყველა წარმატებულ ქვეყანაში.

დაკვირვება ცხადყოფს, რომ ყველა ქვეყანაში, სადაც მოსახლეობამ სავალდებულო დაზღვევის „გემო გაიგო", 2-3 წლის შემდეგ დაზღვევის სხვა სახეობებმაც ზრდა დაიწყო. ჩვენს ქვეყანაში ჯერ კიდევ მოლოდინის რეჟიმში ვართ და არ ვიცით, როდის ამოქმედდება ავტომფლობელთა მესამე პირის პასუხისმგებლობის სავალდებულო დაზღვევა. წელს სავალდებულო გახდა სამოგზაურო დაზღვევა შემომყვანი ტურიზმისთვის და ამ მცირე ინიციატივამ სადაზღვევო ინდუსტრიას უკვე მისცა გარკვეული შედეგი. მართალია, მოცულობები დიდი არ არის, თუმცა სექტორისთვის ასეთი პატარა პროდუქტებიც კი მნიშვნელოვანია", - აცხადებს მიხეილ ჯაფარიძე. 

„არდის" გენერალური დირექტორის თქმით, უცხოელი ტურისტებისთვის სავალდებულო სამოგზაურო დაზღვევა როგორც ტურიზმის, ისე ჯანდაცვის სისტემისთვის მნიშვნელოვანი მექანიზმია.

მისი თქმით, ხშირ შემთხვევაში უცხოელ ვიზიტორებს საერთაშორისო სადაზღვევო პოლისი აქვთ, თუმცა საქართველოში შესაბამისი სერვისებისა და ქოლ-ცენტრების არქონის გამო პოლისი პრაქტიკულად ვერ მუშაობს, რის გამოც მომსახურების ორგანიზება ადგილობრივ სისტემას უწევს. 

მისივე თქმით, მიუხედავად იმისა, რომ ტურისტებს ხშირად საერთაშორისო სადაზღვევო პოლისი აქვთ, საქართველოში მომსახურების ორგანიზება ადგილობრივ ჯანდაცვის სისტემას უწევს, რაც დამატებით ადმინისტრაციულ სირთულეებს ქმნის.

ჯაფარიძე მიიჩნევს, რომ ქართული სადაზღვევო სერვისის სავალდებულო მოდელი და საერთაშორისო კომპანიებთან კონტრაქტირება სისტემას უფრო ეფექტიანსა და მდგრადს გახდიდა.