პირველად შეიქმნა ის გარემოება, როდესაც მთავრობამ აგრესიული ქმედითი ნაბიჯები გადადგა იმისთვის, რომ ერთხელ და სამუდამოდ უპასუხოს იმ მავნე პრაქტიკას, რომელიც ამ სექტორში არსებობდა წლების განმავლობაში, - განაცხადა ჟუნალისტებთან ინფრასტრუქტურის მშენებელთა ასოციაციის თავმჯდომარემ, ირაკლი გიორგობიანმა.

ის პრემიერ ირაკლი კობახიძესა და ინფრასტრუქტურის მინისტრ რევაზ სოხაძესთან შეხვედრას გარდამტეხ შეხვედრად აფასებს.

„ეს არის გარდამტეხი შეხვედრა, სადაც მნიშვნელოვანი სიახლეები გამოგვიცხადეს, რომელიც პირდაპირ მიმართული არის სექტორის გაჯანსაღებაზე სწორი ადეკვატური ფასწარმოქმნის კუთხით. პირველად შეიქმნა ის გარემოება, როდესაც მთავრობამ აგრესიული ქმედითი ნაბიჯები გადადგა იმისთვის, რომ ერთხელ და სამუდამოდ უპასუხოს იმ მავნე პრაქტიკას, რომელიც ამ სექტორში არსებობდა წლების განმავლობაში. ეს თავის მხრივ უზრუნველყოფს როგორც კაპიტალური ხარჯების შესყიდვის ეფექტიანობას, ასევე ხელს შეუწყობს ადგილობრივი სამშენებლო კომპანიების კაპიტალიზაციის ზრდას“, - აღნიშნა გიორგობიანმა.

მთავრობა სახელმწიფო სამშენებლო პროექტების მარეგულირებელ საკანონმდებლო ნორმებში ცვლილებების ახალ პაკეტს ამზადებს. ცვლილებების მიზანია ინფრასტრუქტურული პროექტების განხორციელების პროცესის გაუმჯობესება, პროექტების შეჩერების რისკების შემცირება და სამშენებლო სექტორში უფრო მდგრადი და პასუხისმგებლობის მქონე გარემოს შექმნა. სწორედ ეს საკითხი განიხილეს პრემიერმა და ინფრასტრუქტურის მინისტრმა სამშენებლო კომპანიების და კომერციული ბანკების წარმომადგენლებთან შეხვედრაზე.