მნიშვნელოვანია, რომ კომპანია „ჰანიველ პარტნერსი“ სრულიად არის გაქართულებული, ადგილობრივი ჯგუფი მართავს ამ კომპანიას, რამაც მოგვცა უზარმაზარი წინსვლა და ის გზა, რომელიც ჩვენ გავიარეთ, არის ზუსტად ამის შედეგი - ირაკლი რუხაძე
მნიშვნელოვანია, რომ კომპანია „ჰანიველ პარტნერსი“ სრულიად არის გაქართულებული, ადგილობრივი ჯგუფი მართავს ამ კომპანიას, რამაც მოგვცა უზარმაზარი წინსვლა და ის გზა, რომელიც ჩვენ გავიარეთ, არის ზუსტად ამის შედეგი, - განაცხადა კომპანია „ჰანიველ პარტნერსის“ მმართველმა პარტნიორმა ირაკლი რუხაძემ კასპის ქარხანაში ახალი 70 მილიონი აშშ დოლარის ღირებულების საინვესტიციო პროექტის დაწყების ცერემონიაზე.
მისივე თქმით, კომპანია აგრძელებს ზრდას და მათი მიზანია, საქართველოს განვითარებისთვის დაგეგმილ მნიშვნელოვან პროექტებში წვლილის შეტანა.
„ბატონო პრემიერო, ქალბატონო მინისტრო, ძალიან დიდი მადლობა, რომ გვეწვიეთ დღეს. ჩვენთვის ძალიან მნიშვნელოვანი დღეა. მე ამაყი ვარ, რომ ვარ ამ წარმოუდგენლად წარმატებული კომპანიის ნაწილი. ჩემი კომპანია და თანადაფინანსების ფონდი დაახლოებით, 8-9 წლის წინ შემოვიდა ამ კომპანიაში, გავხდით თანამფლობელები და ამ დროის განმავლობაში მოვახერხეთ 200 მილიონ დოლარზე მეტი დაგვებანდებინა ამ კომპანიის განვითარებაში. შევქმენით დამატებითი სამუშაო ადგილები, გვქონდა უპრეცედენტო ზრდა, გავაკეთეთ ახალი ინოვაციური პროექტები, მაგალითად ამ ხაზს, რომელსაც ხედავთ, ის დღეს საქართველოში გადაყრილი საბურავების დაახლოებით 10 პროცენტს ამუშავებს და ამას ყველაფერს ჩვენ კიდევ უფრო გავზრდით. ეს ყველაფერი ხდება, რა თქმა უნდა, ეკოლოგიურად სუფთა გზით.
რაც მთავარია, ეს კომპანია სრულებით გაქართულდა. რას ნიშნავს ეს, რომ ჩვენ გვყავს გენერალური დირექტორი, რომელიც არის ქართველი, დათო ჯუღაშვილი და მე თუ მკითხავთ, ამ გაქართულებამ და იმის შესაძლებლობამ, რომ ადგილობრივი ჯგუფი მართავს ამ კომპანიას, მოგვცა უზარმაზარი წინსვლა და ის გზა, რომელიც ჩვენ გავიარეთ, არის ზუსტად ამის შედეგი.
ჩვენ ველოდებით, რომ საქართველო გააგრძელებს განვითარებას. ის პროექტები, რომელიც ალბათ ყველაზე საინტერესოა ჩვენი ქვეყნის მომავლისთვის, ჯერ კიდევ არ მომხდარა - პორტები, ჰიდროელექტროსადგურები, ახალი აეროპორტი, პროექტები, რომელზეც ბევრი საუბარი მიდის და იმედი გვაქვს, რომ მალე დაიწყება. ამისთვის ვემზადებით ჩვენ, რომ მივაწოდოთ ის ცემენტი და ბეტონი, რომელიც ამ პროექტებს დასჭირდება. ამიტომ, ჩვენ ვამატებთ არა მხოლოდ კლინკერის წარმოებას, ჩვენ ქვეყანაში კლინკერის ერთადერთი მწარმოებლები ვართ, არამედ ასევე წისქვილის მოცულობებსაც. ჩვენ გავზრდით წისქვილის მოცულობებს, როგორც აღმოსავლეთ, ისევე დასავლეთ საქართველოში. მინდა წარმატება ვუსურვო ამ კომპანიას. უღრმესი მადლობა გადავუხადო ჩვენს თანამშრომლებს იმიტომ, რომ ამ კომპანიის სიძლიერე დგას მათზე და სწორედ მათ გამოა, რომ ამდენი ხალხი დაინტერესებულია ამ კომპანიით. ახლა სტუმრებს შორის არიან მსოფლიოში ყველაზე დიდი ცემენტის მწარმოებელი კომპანიის წარმომადგენლები, რომლებსაც აინტერესებთ, რომ ჩვენი თანამფლობელები გახდნენ და ეს თუ მოხდა კიდევ უფრო სხვა დონეზე გადაგვიყვანს ჩვენ, როგორც კომპანიას“, - აღნიშნა რუხაძემ.
დღის ტოპ 10 სიახლე
სხვა სიახლეები
მარიამ ქვრივიშვილმა კომპანია „ჰანიველ ცემენტის" ახალი საინვესტიციო პროექტის დაწყებასთან დაკავშირებულ ღონისძიებაში მიიღო მონაწილეობა
15.05.2026.16:13
ეკონომიკისა და მდგრადი განვითარების მინისტრმა მარიამ ქვრივიშვილმა საქართველოს პრემიერ-მინისტრ ირაკლი კობახიძესთან ერთად კომპანია „ჰანიველ ცემენტის" ახალი საინვესტიციო პროექტის დაწყებასთან დაკავშირებულ ღონისძიებაში მიიღო მონაწილეობა. მინისტრმა სიტყვით გამოსვლისას ქვეყნის ეკონომიკის ზრდის პროცესში ინდუსტრიული სექტორის როლზე და ამ კუთხით ადგილობრივი წარმოების განვითარების მნიშვნელობაზე ისაუბრა.
„ჰანიველ ცემენტი", რომელიც უკვე წლებია, ქვეყნის სამშენებლო სექტორის ერთ-ერთი წამყვანი კომპანიაა, განვითარების ახალ ეტაპზე გადადის - აფართოებს წარმოებას, ნერგავს თანამედროვე ტექნოლოგიებს და მნიშვნელოვნად ზრდის საკუთარ შესაძლებლობებს. მისი გაფართოება ნიშნავს, რომ საქართველოში იზრდება წარმოება, ვითარდება ინდუსტრია და იქმნება ახალი ეკონომიკური შესაძლებლობები, ჩნდება მეტი მოთხოვნა და, ბუნებრივია, რომ ჩნდება მიწოდებაც. დღეს განსაკუთრებით მნიშვნელოვანია ძლიერი საწარმოო და ინდუსტრიული სექტორის განვითარება, სწორედ წარმოება, ინდუსტრია და ინფრასტრუქტურული პროექტებია ეკონომიკური მდგრადობის, ახალი სამუშაო ადგილებისა და ქვეყნის კონკურენტუნარიანობის მთავარი საფუძველი", - განაცხადა მარიამ ქვრივიშვილმა.
„ჰანიველ ცემენტის" ახალი საინვესტიციო პროექტის ჯამური ღირებულება 70 მლნ აშშ დოლარია, ის კლინკერის წარმოებისა და ცემენტის დაფქვის თანამედროვე ტექნოლოგიური ხაზის მშენებლობას ითვალისწინებს. პროექტის ფარგლებში კლინკერის წლიური წარმოება 400,000 ტონით გაიზრდება და ჯამურად 2 მილიონ ტონას მიაღწევს. პარალელურად, შენდება ცემენტის დაფქვის ახალი ხაზი, შედეგად, ცემენტის წლიური წარმოება 2.7 მილიონ ტონას მიაღწევს. ორივე ქარხნის ექსპლუატაციაში შესვლა 2028 წლიდან იგეგმება.
როგორც მინისტრმა აღნიშნა, მშენებლობის სექტორი ეკონომიკის ერთ-ერთ მთავარ მამოძრავებელ ძალად რჩება - 2025 წელს მისი წილი მშპ-ში 8 % იყო, ხოლო სექტორში შექმნილმა დამატებულმა ღირებულებამ 7.3 მლრდ ლარს მიაღწია.
„70 მილიონი აშშ დოლარის ინვესტიცია ნიშნავს, რომ მოხდება თანამედროვე ინდუსტრიული წარმოების გაძლიერება, ტექნოლოგიური განახლება და წარმოების შესაძლებლობების მნიშვნელოვანი ზრდა. პროექტის ფარგლებში დაინერგება ენერგოეფექტური და საერთაშორისო სტანდარტების შესაბამისი თანამედროვე ტექნოლოგიები, რაც კიდევ უფრო გაზრდის ქართული პროდუქციის ხარისხსა და კონკურენტუნარიანობას", - განაცხადა მარიამ ქვრივიშვილმა.
მინისტრმა ასევე ხაზი გაუსვა, რომ კომპანია ამ ეტაპზე 1200-მდე ადამიანს ასაქმებს, ხოლო საინვესტიციო პროექტი დამატებით, ახალ სამუშაო ადგილებს შექმნის, მათ შორის, კონტრაქტორი კომპანიების მიმართულებით.
„განსაკუთრებით უნდა აღვნიშნო ინვესტორების წვლილი და როლი, მათი ნდობა საქართველოს ეკონომიკის, ბიზნესგარემოსა და იმ დადებითი პერსპექტივის მიმართ, რომელიც ჩვენს ქვეყანაში არსებობს. მათი ნდობა რეალურად იქცევა ასეთი მნიშვნელოვანი ინიციატივების საფუძვლად", - განაცხადა მარიამ ქვრივიშვილმა.
