საქართველოს ბანკის, ისევე სხვა ქართული კომპანიების წარმატება საერთაშორისო საფინანსო ბაზრებზე ადასტურებს საერთაშორისო ინვესტორების მაღალ სანდოობას საქართველოს ეკონომიკისადმი - მარიამ ქვრივიშვილი
ეკონომიკისა და მდგრადი განვითარების მინისტრმა მარიამ ქვრივიშვილმა მონაწილეობა მიიღო საქართველოს ბანკის, როგორც Lion Finance Group-ის წევრი კომპანიის, FTSE 100 ინდექსში გაწევრიანებასთან დაკავშირებულ ცერემონიაში - ამ ფაქტის აღსანიშნავად ლონდონის საფონდო ბირჟაზე სავაჭრო დღე ზარის დარეკვით დაიხურა. ბანკი პირველი კომპანია გახდა საქართველოდან, რომელმაც ლონდონის საფონდო ბირჟის 100 წამყვან კომპანიას შორის დაიკავა ადგილი.
როგორც მინისტრმა აღნიშნა, საქართველოს საფინანსო სექტორი გამოირჩევა ფართო რეგიონში სიჯანსაღით, სტაბილურობით, მდგრადობითა და მაღალი ლიკვიდურობით, რასაც ადასტურებს ინვესტორთა ნდობა, საფინანსო სექტორის ძირითადი მაჩვენებლები და საერთაშორისო სარეიტინგო სააგენტოების შეფასებები.
„საქართველო დღეს ღიაა ინვესტირებისთვის და საერთაშორისო კაპიტალს სთავაზობს სტაბილურ და მდგრად ეკონომიკურ ზრდას, ბიზნესმეგობრულ გარემოსა და განვითარებულ საფინანსო ინფრასტრუქტურას. ამდენად, როგორც საქართველოს ბანკის, ისე სხვა ქართული კომპანიების წარმატება საერთაშორისო საფინანსო ბაზრებზე კიდევ ერთხელ ადასტურებს საერთაშორისო ინვესტორების მაღალი სანდოობას საქართველოს ეკონომიკისადმი," - აღნიშნა მარიამ ქვრივიშვილმა.
ზარის დარეკვის ცერემონია სიმბოლურ და ტრადიციულ ხასიათს ატარებს. საქართველოს ბანკის ღონისძიებას როგორც ქართული, ისე საერთაშორისო ფინანსური ინსტიტუტების წარმომადგენლები და ინვესტორები დაესწრნენ.
დღის ტოპ 10 სიახლე
სხვა სიახლეები
რეგიონული სტარტაპებისთვის საქართველო ერთ-ერთი მნიშვნელოვანი მიზიდულობის წერტილი გახდა - ირაკლი ნადარეიშვილი
12.10.2026.16:11
„ქართული ეროვნული სტარტაპ ეკოსისტემა გამოირჩევა თავისი მდგრადობით და მიმზიდველობით, მათ შორის რეგიონის ჭრილში", - ამის შესახებ ეკონომიკისა და მდგრადი განვითარების მინისტრის მოადგილე ირაკლი ნადარეიშვილმა განაცხადა.
მინისტრის მოადგილემ ხაზგასმით აღნიშნა, რომ ცოდნაზე და ინოვაციებზე დაფუძნებული ეკონომიკის განვითარება საქართველოს მთავრობის ერთ-ერთი პრიორიტეტია და მის ფარგლებში ბოლო დაახლოებით 10 წლის განმავლობაში მთავრობა ძალიან აქტიურად ახორციელებს როგორც პოლიტიკის, ასევე პრაქტიკულ ნაწილში სტარტაპების მხარდაჭერას, ტექნოლოგიური სექტორის განვითარებას, გლობალური ტექ კომპანიების მოზიდვას და სხვა.
„ყველა ის ღონისძიება, ყველა ის ინიციატივა, რომელიც დაკავშირებული იყო სტარტაპის სტატუსის შემოღებასთან, მასთან დაკავშირებული მთელი რიგი საგადასახადო შეღავათები, საგრანტო პროგრამები, რომელთაც სახელმწიფო წლების განმავლობაში ახორციელებს, ასევე ჩვენს ქვეყანაში შემოსული უმსხვილესი აქსელერატორები და ვენჩურული კაპიტალი განაპირობებს იმას, რომ რეგიონული სტარტაპებისთვის საქართველო ერთ-ერთი მნიშვნელოვანი მიზიდულობის წერტილი გახდა", - აღნიშნა მინისტრის მოადგილემ.
ამასთან, ირაკლი ნადარეიშვილის შეფასებით, შედეგად, დღეს სახეზეა ტალანტის და სტარტაპების ძალიან პოზიტიური მიგრაცია რეგიონიდან საქართველოში.
„საქართველოდან რეალურად მათ ძალიან ეფექტურად ეხსნებათ წვდომა დასავლურ კაპიტალზე, საერთაშორისო ქსელებზე, მომხმარებლებზე და ასე შემდეგ", - განაცხადა ირაკლი ნადარეიშვილმა.
