Galt & Taggart-ი განახლებულ პუბლიკაციას აქვეყნებს ,,ელექტროენერგიით ვაჭრობის პერსპექტივები საქართველოსა და კავკასიის რეგიონში".

,,ჩვენი მოლოდინით, საქართველოში ელექტროენერგიის მოხმარება 2035 წლისთვის 20.0 ტვტ.სთ-ს მიაღწევს, რაც 2025 წლის 14.9 ტვტ.სთ-თან შედარებით წლიური 3.4%-იანი ზრდაა. მოთხოვნის ზრდას ძირითადად ეკონომიკური აქტივობა და ელექტრიფიკაცია განაპირობებს, მათ შორის კონდიციონერებისა და საოჯახო ტექნიკის უფრო ფართო გამოყენება და ელექტრომობილების რაოდენობის მატება.2007-26 წლებში განახლებადი ელექტროსადგურების 94% სახელმწიფოს მხრიდან წახალისების მექანიზმით აშენდა. 2017 წელს PPA-ს შეჩერებამ ინვესტორის ინტერესი შეანელა, ხოლო 2022 წლის ბოლოს CFD მექანიზმის ამოქმედებამ ინვესტორების ინტერესი კვლავ გააქტიურა. ჩვენი საბაზისო სცენარით, ელექტროსადგურების მშენებლობის ტემპი დაჩქარდება, რის შედეგადაც საქართველოს დადგმული სიმძლავრე 2035 წლისთვის 8.8 გვტ-ს მიაღწევს. ამისთვის საჭირო იქნება $4.5 მლრდ-ის ინვესტიცია გენერაციის ობიექტებში და $1.0 მლრდ-ის ინვესტიცია ქსელის განვითარებაში. ამ სცენარის შემთხვევაში საქართველო ელექტროენერგიის წმინდა ექსპორტიორი გახდება, ხოლო პროექტების შეფერხების შემთხვევაში იმპორტზე დამოკიდებულება გაღრმავდება. რეგიონული ვაჭრობის შესაძლებლობები ქვეყანათაშორისი ხაზების გამტარუნარიანობაზე, რეგიონულ გენერაციის მიქსზე, ელექტროენერგიის ფასებსა და ბაზრის წესებზე იქნება დამოკიდებული. ისტორიულად საქართველოს მთავარი საექსპორტო ბაზარი თურქეთი იყო, თუმცა დაგეგმილმა ინფრასტრუქტურულმა პროექტებმა შესაძლოა სავაჭრო შესაძლებლობები გააფართოოს. შავი ზღვის წყალქვეშა კაბელი ევროპაში ექსპორტის ახალ გზას შექმნის და გააძლიერებს საქართველოს როლს რეგიონულ ელექტროენერგიით ვაჭრობაში", - აღნიშნულია ანგარიშში.

პუბლიკაციის თანახმად, რეგიონში განახლებადი ენერგიის ყველაზე მაღალი წილი გენერაციაში საქართველოს აქვს.

,,შავი ზღვის კაბელი ევროპაში ექსპორტის ახალ შესაძლებლობას შექმნის. საგარეო ვაჭრობის აქტივობა დამოკიდებული იქნება ფასზე, გადამცემ ინფრასტრუქტურაზე და რეგიონში განახლებადი ენერგიის ათვისების დონეზე", - წერს Galt & Taggart-ი.