ჩვენი მიზანია, კორუფციის აღქმის ინდექსის მიხედვით, ევროპის TOP 3 ქვეყანას შორის მოვხვდეთ,- ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას საქართველოს მთავრობის ადმინისტრაციის უფროსმა, ლევან ჟორჟოლიანმა განაცხადა. მისი თქმით, ადმინისტრაცია სხვადასხვა მიმართულებით ფართო კომპეტენციებს ფლობს, რაც სამთავრობო უწყებებს შორის კოორდინაციის უზრუნველყოფას, სამართლებრივ ზედამხედველობასა და სახელმწიფო ინსტიტუტების ეფექტიანობის კონტროლს მოიცავს. 
„მთავრობის ადმინისტრაციის კომპეტენციები არის ერთმანეთისგან ძალიან განსხვავებული, თუმცა მთავარ კომპეტენციებში მაინც შედის სამთავრობო უწყებებს შორის კოორდინაცია იმისთვის, რომ გადაწყვეტილებები აღსრულდეს. ასევე არის ზედამხედველობის კონტროლის ფუნქცია, რომელიც იყოფა ორ ნაწილად - ეს არის სამართლებრივი ზედამხედველობა ყველა იმ განკარგულებაზე, კანონპროექტზე თუ დადგენილებაზე, რომელსაც კონკრეტული სამინისტრო წარმოგვიდგენს, ასევე მუნიციპალიტეტების სამართლებრივი ზედამხედველობა დადგენილებების მიმართულებით. ასევე ეფექტიანობის კონტროლი, რომელიც მათ შორის დიდწილად მოიცავს სახელმწიფო შესყიდვების და საჯარო შესყიდვების ეფექტიან კონტროლს და არა მარტო. საკმაოდ დიდი არის ამ მიმართულებით მთავრობის ადმინისტრაციის მოქმედების არეალი“. - აღნიშნა ლევან ჟორჟოლიანმა.
მისივე განმარტებით, მთავრობის ადმინისტრაციის კომპეტენციები მოიცავს როგორც უწყებებს შორის კოორდინაციასა და სამართლებრივ ზედამხედველობას, ისე სახელმწიფო სისტემის ეფექტიანობის კონტროლს და საჯარო სექტორში ადამიანური კაპიტალის განვითარებას. 
„საჯარო სამსახურში ადამიანური კაპიტალის განვითარებაც მთავრობის ადმინისტრაციის კომპეტენციას განეკუთვნება და ჩვენ ახლა გვექნება 2025 წლის ანგარიში ამ მიმართულებით თუ რა გავაკეთეთ. გვინდა, რომ საჯარო მოხელეებისთვის, ზოგადად საჯარო სამსახურის სისტემის განვითარებისთვის სიახლეები შევთავაზოთ საჯარო მოხელეებს, ადამიანებს, რომლებიც ემსახურებიან ყოველდღიურად ჩვენს სამშობლოს, ჩვენს სახელმწიფოს.
ასევე მნიშვნელოვანი გვაქვს გრანტების მიმართულება - მთავრობის ადმინისტრაცია მუშაობს იმ შემთხვევაში, როდესაც გრანტს იღებს, მაგალითად, სახელმწიფო დაწესებულება და მას სჭირდება თანხმობა მთავრობისგან, ასევე როდესაც უცხოელი დონორი გასცემს კერძო არასამთავრობო ორგანიზაციაზე გრანტს, ასევე ჩვენს კომპეტენციაში შედის აღნიშნულთან დაკავშირებით საკითხის მომზადება მთავრობაზე განსახილველად.
ყველა ძალიან მნიშვნელოვანია და განსაკუთრებული ყურადღება ექცევა, ეს შეიძლება ითქვას, რომ არის ზუსტად ის პრიორიტეტები, რომელიც ჩვენ 2026 წელს გვექნება, განსაკუთრებით კონტროლის და მონიტორინგის მიმართულებით. იცით, რომ ძალიან ამბიციური გეგმები გვაქვს, ზოგადად მთავრობას აქვს და პრემიერ-მინისტრის ინიციატივაა ეს, რომ გვინდა ტოპ სამ ქვეყანაში მოვხვდეთ - ეს არის კორუფციისგან თავისუფლების აღქმის ინდექსით ევროპაში. გვაქვს ამის რეალური საშუალება. ხედავთ, რომ ბოლო ერთი წლის განმავლობაში დრამატულად არის ამ მიმართულებით მუშაობა გაზრდილი. ეს ეხება როგორც სამართალდამცავ უწყებებს, ასევე ეხება სხვა უწყებებსაც, მათ შორის არის მთავრობის ადმინისტრაცია, რომელსაც 300 მილიონის ეფექტი ჰქონდა მხოლოდ ექვს თვეში დაზოგილი ტენდერებიდან.
4 თვის შედეგები რაც გვაქვს - 118 მილიონი არის ეფექტი ბიუჯეტთან მიმართებაში. პირდაპირი ეკონომიები 84 მილიონი არის და ეს საკმაოდ შთამბეჭდავი შედეგია. თუმცა რაც უფრო სისტემა გაუმჯობესდება და გაჯანსაღდება, ყველა ლოგიკით ეს რიცხვები უნდა ჩამოვიდეს ქვემოთ, ანუ მთავრობის ადმინისტრაციას ნაკლები ჩარევა უნდა დასჭირდეს კონკრეტული.
შესაბამისად, ამ მიმართულებით ჩვენ ვგეგმავთ სერიოზულ ნაბიჯებს. ანტიკორუფციული პოლიტიკის ფარგლებში შესყიდვების კანონში გვინდა საკანონმდებლო ცვლილებების განხორციელება. ამასთან მიმართებაში შიდა სამუშაოები თითქმის ბოლოში არის გასული და რასაკვირველია ბიზნესთან ძალიან აქტიურად ვთანამშრომლობთ, მათ შორის ბიზნეს ასოციაციასთან. ამ საკითხებს შესაბამის ასოციაციებთანაც გავივლით, იმიტომ რომ შესყიდვები არის ერთ-ერთი საკითხი, რომელიც აწუხებს ხშირად ბიზნესს და გვინდა, რომ მაქსიმალურად გავაჯანსაღოთ და გავაუმჯობესოთ ამ მიმართულებით გარემო.
და რასაკვირველია, შევამციროთ მაქსიმალურად კორუფციული რისკები. კორუფციული რისკების შემცირება რას ნიშნავს? რომ ესე იგი უფრო მეტი თანხის დახარჯვა შეიძლება კონკრეტული პროექტებისთვის, ეს იქნება ინფრასტრუქტურული პროექტი თუ სოციალური პროექტი. ანუ რაც უფრო ხარჯვით ნაწილს ვუდგებით ასეთი ჯანსაღი მიდგომებით, ამ შემთხვევაში სახელმწიფოსაც და შემსყიდველ ორგანიზაციებსაც, კონკრეტულ სამინისტროებს, სსიპ-ებს თუ სხვას, თუ მუნიციპალიტეტებს იქვე უფრო მეტი რჩებათ იმისთვის, რომ ეს თანხები სხვადასხვა პროექტებს მოახმარონ“, - განაცხადა ლევან ჟორჟოლიანმა.