Galt & Taggart-ი ტურიზმის 2026 წლის I კვარტლის შეჯამებას აქვეყნებს. ანგარიშის თანახმად, 2026 წლის I კვარტალში საერთაშორისო ვიზიტორების რაოდენობა წლიურად 0.2%-ით შემცირდა და 1.2 მლნ შეადგინა. ვიზიტორების რაოდენობა მოიცავს როგორც ტურისტულ, ისე ერთდღიან ვიზიტებს. შესაბამისად, 2026 წლის I კვარტალში ტურისტების რაოდენობა წლიურად 4.0%-ით გაიზარდა და 1.0 მლნ-ს მიაღწია, ხოლო ერთდღიანი ვიზიტორები წლიურად 19.0%-ით შემცირდა და 0.2 მლნ შეადგინა.

,,საერთაშორისო ვიზიტორების ზრდამ რუსეთიდან (+5.2% წ/წ), თურქეთიდან (+5.8% წ/წ), უკრაინიდან (+24.5% წ/წ), ჩინეთიდან (+48.6% წ/წ) და ევროკავშირიდან (+30.2% წ/წ) დააკომპენსირა ვიზიტორების კლება ახლო აღმოსავლეთიდან, ინდოეთიდან, სომხეთიდან და აზერბაიჯანიდან. ირანის კონფლიქტის ფონზე, ისრაელიდან ვიზიტორები წლიურად 17.5%-ით, ირანიდან კი 48.8%-ით შემცირდა. ინდოეთიდან ვიზიტორების 29.5%-იანი კლება ორ ძირითად ფაქტორს უკავშირდება: ინდოეთის უმსხვილესი ავიაკომპანიის, IndiGo-ს მიერ თბილისის მიმართულებით ფრენების შეჩერებას და ინდოეთიდან ქუთაისის მიმართულებით არაპირდაპირი ფრენების შეზღუდვას.

ჩვენი მოლოდინით, 2026 წელს საერთაშორისო ტურისტების რაოდენობა დაბალი ერთნიშნა ტემპით გაიზრდება. ისრაელ-ირანის კონფლიქტთან დაკავშირებული შემაფერხებელი ფაქტორები, მათ შორის საავიაციო ხარჯების ზრდა, სავარაუდოდ, წლის პირველ ნახევარზე იქონიებს გავლენას. თუმცა, მეზობელი ქვეყნებიდან სახმელეთო ტურისტების ზრდა, ასევე, ჩინეთიდან, ევროკავშირიდან და რუსეთიდან მზარდი საჰაერო ნაკადები, ხელს შეუწყობს ტურისტების საერთო ზრდას 2026 წელს. ამასთან, აზერბაიჯანთან სარკინიგზო მიმოსვლის შესაძლო აღდგენა ვიზიტორების დამატებით ზრდის პოტენციალს წარმოადგენს”, - წერს Galt & Taggart-ი.

2026 წლის I კვარტალში ტურიზმიდან მიღებული შემოსავლები წლიურად 0.5%-ით გაიზარდა და 829.8 მლნ აშშ დოლარი შეადგინა. ზრდა ძირითადად ევროკავშირიდან (+36.4% წ/წ), თურქეთიდან (+12.2% წ/წ), უკრაინიდან (+34.2% წ/წ) და საუდის არაბეთიდან (+47.6% წ/წ) მიღებულმა შემოსავლებმა განაპირობა, მაშინ, როცა ახლო აღმოსავლეთის სხვა ძირითადი ქვეყნებიდან შემოსავლები მნიშვნელოვნად შემცირდა. ,,ჩვენი პროგნოზით, ტურიზმიდან მიღებული შემოსავლები 2026 წელს 4.9 მლრდ აშშ დოლარს მიაღწევს. ეს მაჩვენებელი შემცირებულია ჩვენს თავდაპირველ პროგნოზთან შედარებით (5.0 მლრდ აშშ დოლარი) და ეფუძნება დაშვებას, რომ ირანის ესკალაცია მოკლევადიანი იქნება”, - აღნიშნავს Galt & Taggart-ი.

Galt & Taggart-ის ანგარიშის თანახმად, თბილისში სასტუმროების KPI-ები გაუმჯობესებულია. ,,თბილისში სასტუმროების KPI-ები გაუმჯობესდა - საშუალო დატვირთულობა გაიზარდა 43%-მდე (1Q25-ის 39%-იდან), ხოლო საშუალო დღიური ტარიფი (ADR) გაიზარდა 89 აშშ დოლარამდე (1Q25-ის 83 დოლარიდან). აღნიშნული, განპირობებულია ევროკავშირიდან ჩამოსულ ვიზიტორთა ძლიერი ნაკადით და წლის პირველი ორი თვის განმავლობაში დაფიქსირებული მყარი ზრდით”, - წერს  Galt & Taggart-ი.