საქართველოს ინოვაციების და ტექნოლოგიების სააგენტოს თავმჯდომარის, ავთანდილ კასრაძის განმარტებით, აქსელერაციის პროგრამა უნიკალური შესაძლებლობაა ქართული სტარტაპებისთვის ისარგებლონ საერთაშორისო გამოცდილებით და ამასთანავე მიიღონ საგრანტო დაფინანსება.

GITA-ს საგრანტო კონკურსის „ინოვაციური სტარტაპების აქსელერაციის პროგრამის” გამარჯვებულმა კიდევ ორმა აქსელერატორმა 500 Global- მა და Founder Institute-მა 2080 Ventures-თან ერთად აქსელერაციის პროგრამაზე განაცხადების მიღება დაიწყო. პროგრამა სრულად დაფინანსებულია ინოვაციების და ტექნოლოგიების სააგენტოს მიერ და ის ადგილობრივი და რეგიონული სტარტაპების მხარდაჭერის კიდევ ერთი მექანიზმია, რომელიც განვითარების ადრეულ ეტაპზე მყოფ ინოვაციურ სტარტაპებს გლობალურ ბაზარზე გასვლაში, ინვესტიციების მოზიდვასა და განვითარებაში ეხმარება.

„შეგვიძლია უკვე თამამად ვთქვათ, რომ საქართველოში საერთაშორისო აქსელერაციის პროგრამა სრულფასოვნად ამოქმედდა. ექვსი თვის წინ ორმა საერთაშორისო აქსელერატორმა დაიწყო განაცხადების მიღება და ახლა უკვე დარჩენილმა ორმა, წამყვანმა მსოფლიო აქსელერატორმა დაიწყო ეს პროცესი. ეს არის უნიკალური შესაძლებლობა თითოეული ქართველი სტარტაპისთვის, ინოვატორისთვის, რომლებიც მუშაობენ ახალ ინოვაციურ იდეებზე, გაიარონ აქსელერაციის პროგრამა, მიიღონ საერთაშორისო დონის წამყვანი ცოდნა, გამოცდილება, „მენტორშიპი“ და ამასთან ერთად ისარგებლონ საქართველოს ინოვაციების და ტექნოლოგიების სააგენტოს საგრანტო დაფინანსებით 200 000 ლარამდე თითოეულ სტარტაპთან მიმართებაში. ერთობლიობაში ეს შესაძლებლობას მოგვცემს, ქართული სტარტაპ ეკოსისტემა კიდევ უფრო სწრაფად განვითარდეს, სტარტაპები გავიდნენ საერთაშორისო ბაზრებზე და მოიზიდონ მსხვილი საერთაშორისო ინვესტიციები ჩვენს ქვეყანაში“- განაცხადა ავთანდილ კასრაძემ.
პროგრამის ფარგლებში გამარჯვებული საერთაშორისო აქსელერატორები - Plug and Play, Startupbootcamp, 500 Global და Founder Institute 2080 Ventures-თან ერთად - განახორციელებენ ერთწლიან აქსელერაციის პროგრამას.

ამჟამად მიმდინარეობს აქსელერაციის პროგრამის დანარჩენი ორი გამარჯვებული აქსელერატორის - Startupbootcamp- ისა და Plug and Play- ის აქსელერაციის მეორე ფაზა - MVP, რაც მოიცავს ოთხთვიან პროცესს. თითოეული აქსელერატორის პროგრამაში მონაწილეობს 20-20 სტარტაპი.