ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს ორგანიზებით, პროექტის “მოგზაურობა ინოვაციების და ტექნოლოგიების სამყაროში” მორიგი შეხვედრა ქალაქ ფოთში, ახალგაზრდული ინოვაციების ჰაბში გაიმართა. ღონისძიების მიზანია ადგილობრივ მოსახლეობაში ინოვაციებისა და ტექნოლოგიების შესახებ ცნობადობის ამაღლება და სააგენტოს პროექტებისა და პროგრამების შესახებ ინფორმაციის გავრცელება.

ღონისძიების დამსწრეებმა მოისმინეს ინოვაციების და ტექნოლოგიების ეკოსისტემის შესახებ პრეზენტაცია და შემეცნებითი ლექცია, ასევე გაეცნენ სააგენტოს 2026 წლის ღონისძიებების კალენდარს და ყველა პროგრამის შესახებ ინფორმაციას. შეხვედრის დასასრულს 3D მოდელირებისა და 3D ბეჭდვის პრაქტიკული სემინარი გაიმართა.

“ინოვაციების დანერგვა ყველაზე ეფექტურია იქ, სადაც ბიზნესი და ინდუსტრია ძლიერია. ფოთი ამ მხრივ გამორჩეული ქალაქი და ქვეყნის ერთ-ერთი მნიშვნელოვანი ლოგისტიკური ცენტრია. მოხარული ვართ, რომ ღონისძიებას ფოთში ბევრი ახალგაზრდა დაესწრო. იმედია, ისინი დაინტერესდებიან სააგენტოს პროექტებით და მათი აქტიური ბენეფიციარები გახდებიან.” - აღნიშნა ინოვაციების და ტექნოლოგიების სააგენტოს პროექტების მენეჯერმა ზურა ძიძიგურმა.

პროექტის ფარგლებში შეხვედრები უკვე გაიმართა ქვემო ქართლის, მცხეთა-მთიანეთის, რაჭა-ლეჩხუმისა და ქვემო სვანეთის, სამცხე-ჯავახეთის, იმერეთისა და სამეგრელო-ზემო სვანეთის რეგიონების მუნიციპალიტეტებში. პროექტის ფარგლებში შეხვედრები საქართველოს 55 მუნიციპალიტეტში ჩატარდება და მისი მთავარი მიზანი რეგიონებში ინოვაციური მეწარმეობის განვითარება და სტარტაპ ეკოსისტემის გაძლიერებაა.

პროექტის პარტნიორები არიან - სსიპ ახალგაზრდობის სააგენტო, ალტა, გამომცემლობა "ლურჯი ოკეანე", კომპანია “ნატახტარი” და "ჩემპი".