გავხსენით საკუთარი შოურუმი და ავიყვანეთ მეტი თანამშრომელი, - ასე აფასებს Emocia Wines-ს 2024 წლის საქმიანობას.
„ 2024 წლის 15 მარტს გავხსენით საკუთარი შოურუმი, რომელსაც ასე ელოდებოდა მომხმარებელი. თუ აქამდე ამდენი წელი ონლაინ გვენდობოდნენ და ყიდულობენ ახლა ადგილზე შერჩევის საშუალებაც აქვთ. გვაქვს ჩვენი საკუთარი ოფისი, ავიყვანეთ მეტი თანამშრომელი, ვართ გუნდი და კიდევ ვიზრდებით“, - აღნიშნავს კომპანიის დამფუძნებელი თამარ აბულაძე.

საგულისხმოა, რომ კომპანიის ნამუშევრები რამდენიმე წელია ნიუ-იორკში ერთ-ერთ აქსესუარებისა და სუვენირების მაღაზიაში იყიდება.

„ჩვენი ნამუშევრები იყიდება ნიუ-იორკში. არსებობს მაღაზია, სადაც იყიდება ასეთი ტიპის სუვენირები და სამკაულები. დაახლოებით, 3 წელია ამ მაღაზიასთან ვთანამშრომლობთ. გვინდა გავაძლიეროთ ონლაინ გაყიდვები ევროპისა და ამერიკის მიმართულებით“, - განმარტავს  თამარ აბულაძე.

„ღვინის ემოციის“ დამფუძნებელი ამბობს, რომ აქტიურად იგეგმება კომპანიის მხრიდან ონლაინ გაყიდვების გაძლიერება.

„ჩვენი საკუთარი ვებ გვერდისა და სოც - ქსელებისა,  გაყიდვებისთვის ვიყენებთ კიდევ VELI.store-ს, Extra.ge-ს და mymarket.ge-ს. ასევე ვგეგმავთ, გვქონდეს უფრო განვითარებული კონტენტი. იდეის დონეზე ვფიქრობთ და სურვილი გვაქვს, რომ ბათუმშიც გავხსნათ ჩვენი მაღაზია “, - აღნიშნავს კომპანიის დამფუძნებელი.

ცნობისთვის, Emocia Wines ქართული ბრენდია, რომელიც 2020 წელს გაჩნდა. ჩვენ ვქმნით სრულიად განსხვავებულ სუვენირებს, სამკაულებს და აქსესუარებს ღვინის თემატიკის გარშემო.