რა უნდა გაითვალისწინოს ბიზნესმა კონცენტრაციისას

ბიზნეს მრჩეველი

იურიდიული ფირმა „ბი ვი ქონსალთინგი“ ივნისის თვის მნიშვნელოვანი საკანონმდებლო სიახლეების შესახებ

07.07.2026.17:31

2026 წლის ივნისის თვეში განხორციელებული საკანონმდებლო ცვლილებები არსებითად შეეხო სამშენებლო სექტორს. კერძოდ, მიღებულ იქნა საქართველოს მთავრობის №245 დადგენილება „ინფრასტრუქტურული პროექტების განხორციელების ხელშეწყობის მიზნით ფასთა ინდექსაციის გამოყენების საფუძვლების, პრინციპებისა და წესის დამტკიცების შესახებ“.

ცვლილებები შეეხო „ტექნიკური რეგლამენტის − სამშენებლო სამუშაოების სახელმწიფო შესყიდვისას ზედნადები ხარჯების, გეგმური მოგებისა და სხვა დანარიცხების განსაზღვრის წესის დამტკიცების შესახებ“ საქართველოს მთავრობის დადგენილებასაც. დადგენილების ამოქმედებამდე არსებულ ინფრასტრუქტურულ პროექტებზე, რომლებზეც მიმდინარეობს სამშენებლო სამუშაოები ან გამოცხადებულია ელექტრონული ტენდერები, გავრცელდება ძველი რეგულირება ზედნადები ხარჯებისა და გეგმური მოგების განსაზღვრის მიზნით.

დამატებით, მნიშვნელოვანი ცვლილებები განხორციელდა კონკურენციის სამართლის მიმართულებით. „კონცენტრაციის თაობაზე შეტყობინების წარდგენისა და განხილვის წესის დამტკიცების თაობაზე” სააგენტოს თავმჯდომარის №39 ბრძანებაში დაზუსტდა კონცენტრაციაში მონაწილე პირთა/მხარეთა წრე. ახალი რეგულაციით კონცენტრაციის მონაწილეთა ერთობლივი შემოსავლის გამოთვლისას მხედველობაში მიიღება, მათ შორის, კონცენტრაციაში მონაწილე ეკონომიკურ აგენტთა პირდაპირ ან/და არაპირდაპირ მაკონტროლებელი პირ(ებ)ის კონტროლს დაქვემდებარებული ეკონომიკური აგენტებიც. ამასთან, საჯარიმო სანქციები შეტყობინების წარუდგენლობის ან სხვა დარღვევისათვის დაეკისრება ფიზიკურ პირსაც 10 000 ლარის ოდენობით.

გარდა ამისა, 2026 წლის ივნისის თვეში გახანგრძლივდა არაერთი საკანონმდებლო აქტის ძალაში შესვლის ვადა. მაგალითისათვის, „საჯარო შესყიდვების შესახებ“ საქართველოს კანონი ამოქმედდება 2030 წლის 1 იანვრიდან, ხოლო საზოგადოებრივი კვების ობიექტების მიერ მომხმარებლისთვის საქართველოს მთავრობის №106 დადგენილებით განსაზღვრული სასმელების პლასტმასის ბოთლებით მიწოდების აკრძალვა - 2031 წლის 1 თებერვლიდან.

ამ და სხვა მნიშვნელოვანი საკანონმდებლო სიახლეების დეტალურად გასაცნობად ეწვიეთ ბი ვი ქონსალთინგის საკანონმდებლო სიახლეების ცნობარს:

https://www.linkedin.com/newsletters/legal-newsletter-7437383869311500288/