წლის პირველ ნახევარში გაიზარდა მოთხოვნა აუთსორსინგულ იურიდიულ მომსახურებებზე, რაც, ჩვენი შეფასებით, ბიზნესისთვის იურიდიული ფუნქციის უფრო ეფექტიანად მართვის სურვილს უკავშირდება - „ბი ვი ქონსალთინგის“ მმართველი პარტნიორი
2026 წლის პირველი ნახევარი „ბი ვი ქონსალთინგისთვის“ დინამიკური და შედეგიანი აღმოჩნდა. კომპანიაში ამ პერიოდში გაიზარდა როგორც კლიენტების რაოდენობა, ისე მოთხოვნა გრძელვადიან და კომპლექსურ იურიდიულ მომსახურებაზე, მათ შორის აუთსორსინგულ მხარდაჭერაზე.
Business Insider Georgia „ბი ვი ქონსალთინგის“ მმართველ პარტნიორს, ვახტანგ შურღაიას, 2026 წლის პირველი ნახევრის შედეგებზე, იურიდიულ მომსახურებაზე გაზრდილ მოთხოვნასა და კომპანიის სამომავლო გეგმებზე ესაუბრა.
როგორი იყო „ბი ვი ქონსალთინგისთვის“ 2026 წლის პირველი ნახევარი - რა ძირითად შედეგებს, ცვლილებებსა და მიღწევებს გამოყოფდით ამ პერიოდის
შეჯამებისას?
2026 წლის პირველი ნახევარი „ბი ვი ქონსალთინგისთვის“ საკმაოდ დინამიკური და შედეგიანი იყო. ამ პერიოდის ერთ-ერთ მთავარ ტენდენციად აუცილებლად გამოვყოფდით, როგორც კლიენტების რაოდენობის, ისე არსებული კლიენტების მხრიდან მოთხოვნების ზრდას. განსაკუთრებით შესამჩნევი გახდა ბიზნესების მხრიდან არა მხოლოდ ერთჯერად, კონკრეტულ საკითხზე იურიდიული კონსულტაციის მიღების, არამედ გრძელვადიანი და კომპლექსური იურიდიული მხარდაჭერის საჭიროება.
პირველ ნახევარში გაიზარდა მოთხოვნა აუთსორსინგულ იურიდიულ მომსახურებებზე, რაც, ჩვენი შეფასებით, ბიზნესისთვის იურიდიული ფუნქციის უფრო ეფექტიანად მართვის სურვილს უკავშირდება. კომპანიებისთვის სულ უფრო მნიშვნელოვანი ხდება, რომ ყოველდღიურ საქმიანობაში იურიდიული საკითხები დროულად იყოს იდენტიფიცირებული და რისკები პრობლემად ქცევამდე იქნეს მართული. სწორედ ამ მიმართულებით ვხედავთ ჩვენი მომსახურების ერთ-ერთ მნიშვნელოვან ღირებულებას კლიენტისთვის არა მხოლოდ უკვე არსებული პრობლემის გადაწყვეტაში, არამედ პრევენციულ სამართლებრივ მხარდაჭერაში.
ამასთან, პოზიტიურად შევაფასებდით სასამართლო წარმომადგენლობის მიმართულებასაც. 2026 წლის პირველ ნახევარში გაიზარდა ჩვენი სასამართლო დავების მიმართულებით მიღწეული შედეგების ეფექტიანობა და მოგებული დავების პროცენტული მაჩვენებელი. ჩვენთვის ეს განსაკუთრებით მნიშვნელოვანია, რადგან სასამართლო პრაქტიკაში წარმატება მხოლოდ საქმის მოგებას არ ნიშნავს მნიშვნელოვანია სწორი სამართლებრივი სტრატეგიის შემუშავება, მტკიცებულებების ეფექტიანი მართვა და კლიენტის ინტერესების მაქსიმალურად დაცვა პროცესის ყველა ეტაპზე.
საბოლოო ჯამში, პირველი ნახევრის მთავარი შედეგი ჩვენთვის არის ის, რომ „ბი ვი ქონსალთინგი“ კიდევ უფრო მეტად ჩამოყალიბდა ბიზნესისთვის ყოველდღიურ სამართლებრივ პარტნიორად, რომელიც კლიენტს ეხმარება, როგორც მიმდინარე საქმიანობის სამართლებრივ მართვაში, ისე უფრო რთული და მაღალი რისკის მქონე საკითხების გადაწყვეტაში.
როგორ შეიცვალა კომპანიების მხრიდან იურიდიულ მომსახურებაზე მოთხოვნა 2026 წლის პირველ ნახევარში და რომელ მიმართულებებზე გაიზარდა ყველაზე მეტად დაინტერესება?
2026 წლის პირველ ნახევარში კომპანიების მხრიდან იურიდიულ მომსახურებაზე მოთხოვნა როგორც მოცულობის, ისე შინაარსის თვალსაზრისით შეიცვალა. განსაკუთრებით გაიზარდა მოთხოვნა ისეთ მომსახურებებზე, რომლებიც ბიზნესს ყოველდღიური საქმიანობის სამართლებრივად სწორად და ეფექტიანად მართვაში ეხმარება. კომპანიებისთვის სულ უფრო მნიშვნელოვანი ხდება არა მხოლოდ უკვე წარმოშობილი სამართლებრივი პრობლემის გადაწყვეტა, არამედ რისკების წინასწარ იდენტიფიცირება და მათი პრევენცია.
ცალკე აღსანიშნავია შრომითი მიგრაციის მიმართულება, სადაც მოთხოვნა განსაკუთრებით გაიზარდა პრაქტიკული ხასიათის მომსახურებებზე. კომპანიებს სულ უფრო ხშირად სჭირდებათ კვალიფიციური მხარდაჭერა უცხოელი თანამშრომლების დასაქმებასთან, შესაბამის პროცედურებთან და დოკუმენტაციასთან დაკავშირებული საკითხების სამართლებრივად სწორად და ეფექტიანად მოსაგვარებლად.
საერთო ჯამში, ვფიქრობთ, რომ ბაზარზე იურიდიული მომსახურების მიმართ დამოკიდებულება უფრო პრაქტიკული და შედეგზე ორიენტირებული ხდება. ბიზნესს დღეს სჭირდება არა მხოლოდ სამართლებრივი მოსაზრება ან ცალკეული დოკუმენტის მომზადება, არამედ პარტნიორი, რომელიც კონკრეტულ საკითხს ბოლომდე მიჰყვება, სწორად აფასებს შესაძლო რისკებს და სამართლებრივ ცოდნას რეალურ, პრაქტიკულ გადაწყვეტილებად ქმნის. სწორედ ასეთი კომპლექსური და პრაქტიკაზე ორიენტირებული მიდგომა, ჩვენი შეფასებით, არის „ბი ვი ქონსალთინგის“ მომსახურებებზე გაზრდილი მოთხოვნის ერთ-ერთი მთავარი მიზეზი.
რა გეგმები აქვს „ბი ვი ქონსალთინგს“ 2026 წლის მეორე ნახევრისთვის?
2026 წლის მეორე ნახევარში ჩვენი მთავარი მიზანია იმ ტემპის შენარჩუნება და კიდევ უფრო გაძლიერება, რომელიც კომპანიამ წლის პირველ ნახევარში აიღო. პირველ რიგში, გვინდა კიდევ უფრო განვავითაროთ „ბი ვი ქონსალთინგის“ როგორც ბიზნესის გრძელვადიანი სამართლებრივი პარტნიორის როლი და კლიენტებს შევთავაზოთ მომსახურება, რომელიც მაქსიმალურად პასუხობს მათი საქმიანობის რეალურ საჭიროებებს.
ვფიქრობთ, რომ თანამედროვე ბიზნესგარემოში იურიდიული მომსახურების მთავარი ღირებულება მხოლოდ სამართლებრივი ცოდნა აღარ არის. მნიშვნელოვანია, რამდენად სწრაფად შეგიძლია პრობლემის იდენტიფიცირება, რამდენად პრაქტიკულად შეგიძლია მისი გადაწყვეტა და რამდენად ეფექტიანად შეგიძლია კლიენტის სამართლებრივი ინტერესების დაცვა.
მეორე ნახევარში ასევე განსაკუთრებულ ყურადღებას დავუთმობთ იმ სერვისების განვითარებას, რომლებზეც ბიზნესის მხრიდან მოთხოვნა ბოლო პერიოდში გაიზარდა.
საბოლოო ჯამში, მიმდინარე წლის მეორე ნახევრში, ჩვენი მთავარი ამოცანა არის ხარისხის, ეფექტიანობისა და ნდობის კიდევ უფრო გაძლიერება. ჩვენი მიზანია, „ბი ვი ქონსალთინგი“ ბიზნესისთვის იქცეს გრძელვადიან სამართლებრივ პარტნიორად, რომელიც არა მხოლოდ უკვე არსებულ გამოწვევებზე რეაგირებს, არამედ კომპანიებს ეხმარება, შესაძლო რისკები წინასწარ დაინახონ, გადაწყვეტილებები სწორად შეაფასონ და საკუთარი საქმიანობა უფრო დაცულად და ნაკლები რისკით განავითარონ.
სხვა სიახლეები
მეწარმეობის მხარდაჭერის სახელმწიფო პროგრამა - რა ფინანსურ შესაძლებლობებს სთავაზობს სახელმწიფო ბიზნესს?
06.11.2026.15:05
2026 წლის 2 ნოემბერს საქართველოს მთავრობის №517 დადგენილებით დამტკიცდა მეწარმეობის მხარდაჭერის სახელმწიფო პროგრამა, რომლის მიზანია ადგილობრივი მეწარმეობის ხელშეწყობა და კერძო სექტორის საჭიროებებზე მორგებული ფინანსური ინსტრუმენტების შეთავაზება. აღნიშნული ინსტრუმენტები მეწარმე სუბიექტებს საინვესტიციო პროექტების განხორციელებისთვის დაფინანსების ალტერნატიულ შესაძლებლობებს სთავაზობს.
დადგენილების თანახმად, კორპორაცია პროგრამას ახორციელებს შემდეგი სახის ფინანსური ინსტრუმენტების გამოყენებით:
სინდიცირებული სესხი - წარმოადგენს დაფინანსების მექანიზმს, რომლის ფარგლებშიც მეწარმე სუბიექტს სესხი ერთობლივად მიეწოდება კორპორაციისა და ერთი ან რამდენიმე ფინანსური ინსტიტუტის მიერ. ამ მოდელის ფარგლებში კორპორაციის თანამონაწილეობა არ უნდა აღემატებოდეს სესხის ძირითადი თანხის 45%-ს. რაც შეეხება საპროცენტო განაკვეთს, კორპორაციის მიერ გაცემულ თანხაზე დასარიცხი პროცენტი არ უნდა იყოს ამავე დადგენილებით განსაზღვრულ მაჩვენებელზე დაბალი.
ამავდროულად, სინდიცირებულ სესხში კორპორაციის მონაწილეობაზე გადაწყვეტილება მიიღება მისი მონაწილეობით დაფინანსების ოდენობის მიხედვით (5 მილიონ ლარამდე – კომიტეტის, 5-20 მილიონი ლარის ჩათვლით – საბჭოს, ხოლო 20 მილიონ ლარზე მეტი თანხის შემთხვევაში – საქართველოს მთავრობის მიერ).
პირდაპირი ან/და ჰიბრიდული სესხი - პროგრამის თანახმად, მეწარმე სუბიექტის მიერ საინვესტიციო პროექტის განხორციელების მიზნით, გაიცემა:
ა) პირდაპირი სესხი (საქართველოს კანონმდებლობით განსაზღვრული სესხი) ან/და
ბ) ჰიბრიდული სესხი, რომელიც აერთიანებს სასესხო და წილობრივი დაფინანსების მახასიათებლებს, მათ შორის: სესხიდან გამომდინარე ფულადი მოთხოვნის მეწარმე სუბიექტის წილში (აქციებში) კონვერტაციის შესაძლებლობას ან/და კორპორაციის უფლებას, სესხის სანაცვლოდ მიიღოს მეწარმის მოგების შეთანხმებული ნაწილი, ან/და სასესხო და წილობრივი დაფინანსების მახასიათებლების მქონე სხვა მექანიზმებს.
დადგენილებით განსაზღვრულია მსგავსი სესხის გაცემის წინაპირობაც - მეწარმე სუბიექტის თანამონაწილეობა საინვესტიცო პროექტის დაფინანსებაში, კაპიტალური ხარჯების არანაკლებ 30%-ის ოდენობით.
რაც შეეხება საპროცენტო განაკვეთს, პირდაპირი სესხის თანხაზე დასარიცხი მინიმალური საპროცენტო განაკვეთი არ უნდა იყოს დადგენილებით განსაზღვრულ მაჩვენებელზე ნაკლები. ამავდროულად, გადაწყვეტილება, ისევე, როგორც სინდიცირებული სესხის შემთხვევაში, მიიღება სესხის ოდენობის მიხედვით (2 მილიონ ლარამდე – კომიტეტის, 2-10 მილიონი ლარის ჩათვლით – საბჭოს, ხოლო 10 მილიონ ლარზე მეტი თანხის შემთხვევაში – საქართველოს მთავრობის მიერ). სესხის ტიპები, სარგებლობის პირობები და კრიტერიუმები დამატებით დგინდება კორპორაციის დირექტორის მიერ.
პირდაპირი წილობრივი მონაწილეობა - კორპორაცია ახორციელებს მეწარმე სუბიექტის კაპიტალში პირდაპირ წილობრივ მონაწილეობას, რის შესახებაც გადაწყვეტილებას იღებს საქართველოს მთავრობა. დეტალური კრიტერიუმები, შეფასების წესები, მოთხოვნები და ინსტრუმენტის განხორციელების წესები დგინდება კორპორაციის დირექტორის მიერ.
ამრიგად, მეწარმეობის მხარდაჭერის ახალი სახელმწიფო პროგრამა ბიზნესს დაფინანსების განსხვავებულ მექანიზმებს სთავაზობს და ქმნის შესაძლებლობას, საინვესტიციო პროექტების საჭიროებებისა და სპეციფიკის გათვალისწინებით, მეწარმე სუბიექტებმა ისარგებლონ როგორც სასესხო, ისე - წილობრივი დაფინანსებით. პროგრამის ეფექტიანობა და კონკრეტული ფინანსური ინსტრუმენტების ხელმისაწვდომობა კი მნიშვნელოვნად იქნება დამოკიდებული მის ფარგლებში განსაზღვრულ დამატებით კრიტერიუმებსა და დაფინანსების პირობებზე.