„ლორუკა“ რაჭული ლორის მწარმოებელი კომპანიაა, რომელიც ბაზარზე უკვე 6 წელია ოპერირებს. ამ პერიოდის განმავლობაში კომპანიამ წარმოება განავითარა და საქმიანობა ეტაპობრივად გააფართოვა. Business Insider Georgia კომპანიის მიმდინარე სიახლეების, საქმიანობის განვითარების მიმართულებებისა და 2027 წლის სამომავლო გეგმების შესახებ „ლორუკას“ დამფუძნებელს, მარიამ ლებანიძეს ესაუბრა.

რა სიახლეები აქვს „ლორუკას“ ამ ეტაპზე და როგორ ვითარდება კომპანიის საქმიანობა მიმდინარე წელს? რა შედეგებით აფასებთ 2026 წლის განვლილ პერიოდს?

2026 წელი კომპანიისთვის აქტიური ზრდის პერიოდია. თანამშრომლობა კიდევ სამ რესტორანთან დავიწყეთ და ამ ეტაპზე წარმოება დაახლოებით 30%-ით გვაქვს გაზრდილი. კვლავ ვინარჩუნებთ ჩვენს ნიშას ქართულ ბაზარზე და ვაგრძელებთ საქმიანობის განვითარებას.

როგორ შეიცვალა მომხმარებლის მოთხოვნა რაჭულ ლორზე და რა ფაქტორებმა განაპირობა წარმოების ზრდა?

ამ ეტაპზე წარმოებაში მხოლოდ ლორი დავტოვეთ, რადგან ის ჩვენი ძირითადი პროდუქტია და მასზე მოთხოვნა მნიშვნელოვნად გაიზარდა. რესტორნები თავად გვიკავშირდებიან თანამშრომლობის დასაწყებად ან განახლებისთვის. მათ შორის არიან ისეთი ობიექტებიც, რომლებთანაც სხვადასხვა მიზეზით თანამშრომლობა დროებით შეწყდა და რომლებმაც ახლა ჩვენი პროდუქტის მიწოდების აღდგენა მოისურვეს.

ამასთან, ჩვენს პროდუქციას ახალი რესტორნები და ბარებიც ამატებენ. მოთხოვნის ზრდის პარალელურად ვცდილობთ, ფეხი ავუწყოთ არსებულ ტემპს და მომხმარებლების საჭიროებები მაქსიმალურად დავაკმაყოფილოთ.

ვთანამშრომლობთ საქართველოში წამყვან, პრემიუმ სეგმენტზე ორიენტირებულ რესტორნებსა და ბარებთან. ისინი ჩვენი პროდუქციით კმაყოფილი არიან, რაც ჩვენთვის განსაკუთრებით მნიშვნელოვანია და განვითარების კიდევ უფრო დიდ მოტივაციას გვაძლევს.

როგორია კომპანიის გეგმები 2026 წლის დარჩენილი პერიოდისთვის და რა მიმართულებებით აპირებთ საქმიანობის განვითარებას 2027 წელს?

გვინდა, თანამშრომლობა კიდევ რამდენიმე რესტორანთან გავაფორმოთ. როგორც 2026 წელი დაეთმო წარმოების ზრდასა და საქმიანობის გაფართოებას, ანალოგიური ტენდენციის შენარჩუნებას ვგეგმავთ 2027 წელსაც. ჩვენი მიზანია, გავზარდოთ წარმოების მოცულობა და ვითანამშრომლოთ უფრო მეტ პარტნიორთან.

ინფორმაციისთვის, კომპანია, პროდუქციისთვის საჭირო ნედლეულს ადგილობრივი ფერმერებისგან ყიდულობს.