„ჩვენთან“ არის კომპანია, რომელიც მეექვსე წელია სოფლის ტურიზმის განვითარებას ემსახურება. მას ჰყავს შვილობილი კომპანია „სკა ჩვენთან“, რომელიც 5 სახეობის თაფლსა და სხვა ფუტკრის პროდუქტებს აწარმოებს. მეტი ინფორმაციისთვის Business Insider Georgia-ს კომპანიის თანადამფუძნებელსა და პროექტის მენეჯერს, ქეთი დვალს ესაუბრა.

„მეექვსე წელია რაც მეუღლესთან ერთად ვუძღვები ბიზნეს საქმიანობას. კომპანია “ჩვენთან” ემსახურება სოფლის ტურიზმის განვითარებას. ვატარებთ სხვადასხვა აგრო-შემეცნებით გაკვეთილებს და მასტერკლასებს, როგორც ბავშვებისთვის, ისე მოზარდებისთვის. ჩვენი მთავარი მიმართულება მეფუტკრეობაა.

აღსანიშნავია, რომ პირველად ჩვენ შევთავაზეთ საზოგადოებას მსგავსი სერვისი ბავშვბისთვის, რომელიც დიდი პოპულარობით სარგებლობს. ჩემს მეუღლეს ფუტკართან მუშაობის 20 წლიანი გამოცდილება აქვს და ვცდილობთ ჩვენთან ჩამოსულ ბავშვებს და მათ მშობლებს გავაცნოთ ქართული ფუტკარი და თაფლი, დავაინტერესოთ სოფლის ცხოვრებით, შევაყვაროთ ბუნება და ვასწავლოთ მისი დაცვა. ვფიქრობთ,მეფუტკრეობის დარგს დიდი პოტენციალი აქვს საქართველოში და მისი პოპულარიზაცია ძალიან მნიშვნელოვანია ჩვენი ქვეყნისთვის “, - ამბობს ქეთი დვალი.

გარდა ტურიზმის მიმართულებისა, კომპანია დაკავებულია თაფლისა და სხვა ფუტკრის პროდუქტების წარმოებითა და რეალიზებით.

„გარდა ტურიზმის მიმართულებისა, გვაქვს პროდუქტის გაყიდვების გვერდი „სკა ჩვენთან“ – ონლაინ პლატფორმა, სადაც ვყიდით 5 სახეობის თაფლს და სხვა ფუტკრის პროდუქტებს.

ასევე გვაქვს ფუტკრის სადედე რძე, რომლის უნიკალურობა და სასარგებლო თვისებები ყველამ იცის. თუმცა ნაკლებადაა ცნობილი მისი კოსმეტიკური დანიშნულება. განსაკუთრებით ქალბატონებს გაუხარდებათ ფაქტი, რომ ფუტკრის რძე შესაძლებელია გამოყენებულ იქნას ნიღაბად სახეზე როგორც ბუნებრივი გამაახალგაზრდავებელი საშუალება.

ერთი წელია სატესტო რეჟიმში მუშაობს ონლაინ პლატფორმა „სკა ჩვენთან“. მიუხედავად იმისა, რომ ქართულ თაფლზე დიდი მოთხოვნაა ბაზარზე, თავად პროდუქტის მიმართ არსებობს უნდობლობა, რაც საკმაოდ კომპლექსური საკითხია და წლების განმავლობაში დაგროვილი პრობლემების შედეგია.

მიუხედავად იმისა, რომ საქართველო მეფუტკრეობის უძველესი ქვეყანაა, მომხმარებელი ხშირად ეჭვით უყურებს დახლზე დებულ პროდუქტს, რაც გამოწვეულია ფალსიფიცირებული თაფლით, ლაბორატორიული კონტროლის სიმწირით, ასევე განათლების და ინფორმაციის ნაკლებობით (მაგ. კრისტალიზაცია “ჩაშაქრება”), ბევრ მომხმარებელს ჰგონია, რომ თუ თაფლი ჩაშაქრდა, ის ნამდვილი არ არის. სინამდვილეში, ნამდვილი თაფლის უმეტესობა უნდა კრისტალიზდეს. ამ მითის გამო, მომხმარებელი ხშირად იწუნებს ხარისხიან პროდუქტს.

აქედან გამომდინარე, ჩვენი მთავარი ამოცანა გამჭვირვალობაა. მომხმარებლისთვის თაფლი დღეს „იდუმალებით მოცული“ პროდუქტია, ამიტომ ნდობის მოსაპოვებლად ეს იდუმალება უნდა გავაქროთ. ამის საშუალებას გვაძლევს სოციალური ქსელები, ამიტომ გვინდა, მომხმარებელი ყველა პროცესში ჩავრთოთ.

სიახლეები გვაქვს ტურიზმის მიმართულებით, ჩვენს მეფუტკრეობის მასტერკლასს, სადაც ბავშვები გადიან თეორიას, პრაქტიკას, არტ-თერაპიას და საკუთარი ხელით წურავენ თაფლს, დავამატეთ ლაბორატორიული სმაუშაო “ექსპედიცია ფუტკრებზე”. ჩვენთან ჩამოსულ ბავშვებს საშუალება ექნებათ მიკროსკოპში ფუტკრების დათვალიერების (ნახავენ ფუტკრის ნესტარს, ფეხებზე დაუთვალიერებენ სამტვერე ჯიბეებს, აღმოაჩენენ ხუთ თვალს და ა.შ).

ასევე გემაში გვაქვს მულტიფუნქციური შენობის აშენება, სადაც მეფუტკრეობის გაკვეთილებს ჩავატარებთ უკვე ზრდასრულებისთვისაც (მოთხოვნა თავად მომხმარებლებისგან წამოვიდა) “, - აცხადებს კომპანიის თანადამფუძნებელი.

2025 წელი კომპანიისთვის საკმაოდ წარმატებული აღმოჩნდა. 

„2025 წელი იყო საკმაოდ ნაყოფიერი, დატვირთული და ამავე დროს ძალიან ემოციური, რადგან ჩვენი მექვსე ბიჭი დაიბადა იოანე, რომელმაც კიდევ უფრო დაათბო და დაატკბო ჩვენი ოჯახური ცხოვრება.

2025 წელს წინა წლებთან შედარებით 50 % გაიზარდა ვიზიტორების რაოდენობა, რაც კიდევ უფრო მეტ სტიმულს და წინსვლის მოტივაციას გვაძლევს “, - აღნიშნავს ქეთი დვალი.